1 KIULONG THSÜRÜ 20 - AMÜSÜH HÜM CL Bible (BSI)

Siria kheak Thirithsükhi

¹ Siria kiulongthsüpuh Benhadadnü api bonungrü alala bemukhung; khorabo tüsho khoralolungbe lung kiulongthsürü 32 api lung lakheah. Apinü Samaria yanpü yübah zündo tüsho yanabah.

² Judüki apinü Israel kiulongthsüpuh Ahab kilim kiuto ching yunithsürübo yüshih, tüsho api ki tha: “Ben-hadadnü ha thachoh:

³ Nü yo shotoyinchi tüsho sunabo I yo ah; nü niube atsüdakbo tüsho tsührübo she I yo ah.”

⁴ Israel kiulongthsüpuhnü alo, “O kiulongthsüpuh, I tungpuh, nünü athakhi nangde I tüsho I yo alala nü yo ah.”

⁵ Yunithsürübo alode arü tüsho tha: “Ben-hadadnü ha thachoh: Inü nü kilim thaa arüshihdo, ‘Nü yo shotoyinchi, suna, nü niubebo tüsho tsührübo I kilim jihang’;

⁶ jude müthsüsho shido ha kim ching inü I yamlarübo thiyibah, tüsho arünü nü yo khorabo le nü yamlarübo yimbah, tüsho arü tsükhi khah chungbah, tüsho lude atsobah.”

⁷ Judüki Israel kiulongthsüpuhnü lomi ching azothsürü alala jibah tha, “ Kheakü kheahang! Künangde ha mihtsürünü küpkhuk yimcho; tümüde apinü I niuberü, I tsührübo, shotoyinchi tüsho suna thsungkheak I kilim arüshih-a lah; tüsho inü api kheak muthsunglo.”

⁸ Judüki azothsürü alala tüsho mihtsürü alalanü api ki tha, “Dani yungsho dalokhi.”

⁹ Jumonü apinü Ben-hadad yunithsürü ki tha, “I tungpuh kiulongthsüpuh ki thaang: Nü yamlarü ki nünü akhuhde akheangkhi ju inü arhimobah; tüshe hadürü a inü müthsükhuk.” Yunithsürübo tso tüsho api kilim thiyu hanlode arü.

¹⁰ Ben-hadadnü api kilim yüshih tüsho tha, “Mürangkhüh Samaria asungthulungnü I yanrü mihtsürübo müyi abansho thrünpuhbonü I kheak alü she rhimoshang.”

¹¹ Israel kiulongthsüpuhnü alo, “Api ki thaang: Atsütsü thirithsürünü a amüngüh yungde keochih dunglim kükheangchoh.”

¹² Ben-hadad tüsho kiulongthsürübo arü khimyambo ching yungde alachoki ha yusheak so, tüsho apinü api mihtsürübo ki thiyukhüm jih: “Ayanpü thsakhamang.” Jumonü arünü kiuto yanpü thsakham.

¹³ Judüki wukihrü khürü Israel kiulongthsüpuh Ahab kilim atu tüsho tha, “Atungpuhnü ha thachoh, Ha boto ato alala nünü ngüdü de? Kheahang, khihni inü nü khah ching jihbah; tüsho I Atungpuh de nünü amükheahbah.”

¹⁴ Ahabnü tha, “Shepünü?” Apinü tha, “Lomichamnakkhüh ching athrününgtsüng kovünorbonü de Atungpuhnü ha thachoh.” Judüki apinü tha, “Shepünü thirithsü tankihba?” Apinü alo, “Nü.”

¹⁵ Judüki apinü lomi-chamnakkhüh athrününgtsüng kovünorbo 232 jimukhung; arü dunglim apinü Israel mihtsürü alala, 7000 jimukhung.

¹⁶ Ben-hadad tüsho api lung arihrü kiulongthsürübo 32 khimyam ching müshangde yungde alachoki, arünü animuro yanmusu.

¹⁷ Lomichamnakkhüh athrününgtsüng kovünorbo akhuhde wukhiuk. Ben-hadadnü khuhto-bonungrü yüshih, tüsho arünü api ki thiyusheak jih, “Mihtsürübo Samaria chingnü akhiukdo.”

¹⁸ Apinü tha, “Mürangkhüh arü mungtsü yungsho thirithsüpü thsüa la, arübo arhangnü ramang.”

¹⁹ Tüshe lomi-chamnakkhüh athrününgtsüng kovünorbo tüsho arü dunglim yanrü bonungrü kiuto chingnü akhiuk.

²⁰ Mihbüm abannü nihbuhnü bede keochihkhi mihtsürü laksah; Siriarü alihde tso tüsho Israelnü arü yande müsham, tüshe Siria kiulongthsüpuh Ben-hadad ju a khoraberü bebah khora kheaknü tsoabah.

²¹ Israel kiulongthsüpuhnü wukhiukbah khorabo le khoralolungbebo yankhia lu, tüsho Siriarü kuk.

²² Judüki Israel kiulongthsüpuh ki wukihrü arü tüsho api ki tha, “Arang, nü reangzahang, tüsho nünü tümü thsübeanü düshihde lümakheahang; tümüde mükheankim ching Siria kiulongthsüpuh nü azhihde atulobah.”

Mahne Kipü Siria Yankhi

²³ Siria kiulongthsüpuh yamlarübonü api ki tha, “Arü thrünpuhbo ju awungbo thrünpuhbo ah, jumonü arübo isa kheaknü amürangbe lakheah; tüshe adükhün ching isanü arü bede keochihanü, tüsho tsükjide arü kheaknü isa amürangbe labah.

²⁴ Ha she rhimoang: kiulongthsürübo nihbuh rhimo chingnü yihkhitang tüsho arü müthri limthorübo yukang;

²⁵ tüsho nünü dükheakabahkhi bonungrü nangde khora tüsho khora-lolungbe khekhi dükhüh jimukhungang; jushu isanü arübo adükhün ching bede keochihbah, tüsho tsükjide arü kheaknü isa amürangbe labah.” Apinü arü yu ani, tüsho jude rhimo.

²⁶ Mükheankim ching Ben-hadadnü Siriarü jimukhung tüsho Israel bede keochihpü Aphek ching wutu.

²⁷ Küyimki Israelrübo she jimukhungbah thsühnuk thsakhamkhea, arünü arübo shorupü wukhiuk; Israel mihtsürübo a mihnu boto anini mahne nangde arü mikhuh ching binkheam, Siriarü a lomi mi.

²⁸ Thrünpuh mihtsürü arü tüsho Israel kiulongthsüpuh ki tha, “Atungpuhnü ha thachoh: Tümütüsho Siriarünü thado, ‘Atungpuh a awungbo thrünpuh ah tüshe api a adükhünbo thrünpuh yung,’ jumonü inü ha boto ato alala nü khah ching jihbah, tüsho I Atungpuh de nünü amükheahbah.”

²⁹ Arünü arü mikhuhachihde nimung thüne bin. Jushu nimung athüne nipü thirithsüpü tankih; Israelrünü Siriarü jingnü atsahrü bonungrü 100,000 nimungkhühnü laksah.

³⁰ Aningkhi Aphek kiuto ching tsode yüzah; tüsho aningkhi mihtsürü 27,000 kheak chipi keamkih. Ben-hadad she tsode yü, tüsho ajikpü kiuto ching yüzah.

³¹ Api yamlarübonü api ki tha, “ Kheahang, Israel yamkhün kiulongthsürübo a mihmüthsüm kiulongthsürü ah de isanü sodo; isanü shungliukhim isa chim kheak rümanü tüsho isa ku kheak shungliu hingbah Israel kiulongthsüpuh kilim wutuanü; khükijua apinü nü rhangdung lashihbah.”

³² Jumonü arünü arü chim kheak shungliukhim rümkih, arü ku kheak shungliu hingbah Israel kiulongthsüpuh ki yü, tüsho tha, “Nü yamlarü Ben-hadadnü tha, ‘ Muzhobah I lashang.’ ” Tüsho apinü tha, “Api kheakü khiungde la de? Api I keonio ah.”

³³ Kheakü mihtsürübonü athsülim khülang kheahde alakheah; arünü nahde api yu leangkhia lu tüsho tha, “Am, Ben-hadad nü keonio ah.” Judüki apinü tha, “Yüang tüsho api bebah arang.” Jumonü Ben-hadadnü api kilim akhiuk; tüsho apinü anihbuh khora-lolungbe ching akihshih.

³⁴ Ben-hadadnü api ki tha, “I buhnü nü buh kheaknü alukhi kiutobo jihlobah; tüsho I buhnü Samaria ching thsükhi nangde nünü nü thsungkheak Damaska ching yinzüyindopung thsübah.” Israel kiulongthsüpuhnü alo, “Jurübo dünkheaknü inü nü tsoshihanü.” Jumonü apinü anihbuh kheak binthrüm thsü tüsho api tsoshih.

Wukihrü Khülangnü Ahab Bahyukkhi

³⁵ Atungpuh yukhüm hode wukihrü boto bolung khülangnü khürü ki tha, “I kingang!” Tüshe mihtsürünü api kingpü thsunglo.

³⁶ Judüki apinü anihbuh ki tha, “Tümütüsho nünü Atungpuh yu mani, nü I kinü atso akede kekhüzü khülangnü nü nguhsahbah.” Tüsho küyimki apinü anihbuh kheaknü atsokhea, kekhüzü khülangnü api shoru tüsho nguhsah.

³⁷ Judüki apinü püpü mihtsürü ngü tüsho tha, “I kingang!” Jumonü apinü anihbuh kingbah api yurijih.

³⁸ Judüki wukihbuhnü chamachih, tüsho ajak müthride amük kumung arümbenü rümdobah limro ching kiulongthsüpuh aleang.

³⁹ Kiulongthsüpuh hode alachoki apinü kiulongthsüpuh ki zhi tüsho tha, “Nü yamlarü keochih phulung ching yükheah; judüki bonungrü khülangnü rholobah I kilim mihtsürü khülang bede arü tüsho I ki tha, ‘ Ha mihtsürü aheangang; api mülasho, api rhangdung dün nü rhangdung jihbah, yungsho nünü shotoyinchi 3000 jihbah.’

⁴⁰ Nü yamlarü halim julim münganchoki, api tsoabah.” Israel kiulongthsüpuhnü api ki tha, “Dale tüsho nü mah thsübah; nünü ju alokhikheah.”

⁴¹ Judüki apinü amük chingnü arümbe nahde yihkhiabah. Israel kiulongthsüpuhnü api wukihrü bolung khülang ah de kheahkhit.

⁴² Judüki apinü anihbuh ki tha, “Atungpuhnü ha thachoh, ‘ Tümütüsho inü athsümünimpü lakhi mihtsürü nünü tsoshihdo, jumonü nü rhangdung ju api rhangdung dün labah, tüsho nü mihtsürü ju api mihtsürü dün labah.’”

⁴³ Israel kiulongthsüpuhnü bukakhiukde tüsho mulong zhipzhipde thüyam lim tsahmusu tüsho Samaria ching arü.