1 KIULONG THSÜRÜ 19 - AMÜSÜH HÜM CL Bible (BSI)

Sinai Müzüng kheak Elija

¹ Elijanü arhimokhi, tüsho apinü künangde nukshangnü wukihrübo laksahkheanü Ahabnü Jezebel ki alala tha.

² Judüki Jezebelnü Elija kilim thiyusheak yüshihde tha, “Mürangkhüh shido ha kim ching arü rhangdung nangde inü mürhimoa lasho, thrünpuhbonü I kheak alü she rhimoshang.”

³ Judüki api trede alakheah; apinü asürü tüsho api rhangdung thsungkheak alihde tso, tüsho Juda ching Beersheba lim arü; apinü ayamlarü ju ching zojih.

⁴ Tüshe api a nimung khülang hantsahde sunglo ching yü, tüsho arübahle sunglo phütdungsang khüp bin. Api ashebah de apinü keokhi: “Ha suhdahdo; O Atungpuh , kheakü I rhangdung lubah tsoang, tümüde I a isa jipürü kheaknü atsü yung.”

⁵ Judüki apinü phütdungsang khüp bin tüsho yapabah. Zukleangnü yunirü khülangnü api qiu tüsho api ki tha, “Asürang tüsho yimtsühang.”

⁶ Apinü kheah, tüsho api ku ki mokhih alamlam kheak yikhap khülang, tüsho ke phüh khülang de ngü. Apinü tsüh tüsho yungbah yaplo.

⁷ Atungpuh yunirü mahne kipü arübah api qiu, tüsho tha, “Asürang tüsho yimtsühang, jude müthsüsho nü thsungkheaknü hantsahpü khide akhibah.”

⁸ Apinü asürübah tsühyung; jushu apinü ju tsühyungkhi sühmühnü nimung yirü tüsho tsüngre yirü Atungpuh wung Sinai lim yü.

⁹ Ju dangpung ching apinü lungkhün khülang ching arü, tüsho ju tsüngre ju ching bin. Judüki Atungpuh yu api kilim arüde tha, “Nü ha ching tümü thsücho, Elija?”

¹⁰ Apinü alo, “Wuto Thrünpuh, Atungpuh thsungkheak I khide künsahde alakheah; tümüde Israelrünü nünü tangzüngkhi bahyukbah nü kingaün sadam lukkheamdo, tüsho nü yo wukihrübo nukshangnü laksahkhamdo. I lang aninga lah, tüsho arünü I laksahpü yimchoh.”

¹¹ Apinü tha, “Wukhiukang tüsho awung kheak Atungpuh miki zhipang, tümüde Atungpuh hode ayüpü thsüchoh.” Kheakü apung ato lakheah, khide amüküpkhinü awungbo tüsho lungbo Atungpuh miki adütre kamde trüabah, tüshe apung ching ju Atungpuh mülakheah; tüsho apung dunglim muliuyuk züng tüshe Atungpuh ju muliuyuk ching mülakheah;

¹² tüsho muliuyuk dunglim mo lakheah, tüshe Atungpuh ju mo ching mülakheah; tüsho mo dunglim düsheak athünak lakheah.

¹³ Küyimki Elijanü ju sokhea, akhim aleangbenü ajak phudobah wukhiuk tüsho lungkhün ripit ki zhip. Judüki düsheak khülang api ki arü tüsho tha, “Nü ha ching tümü thsücho, Elija?”

¹⁴ Apinü alo, “Wuto Thrünpuh, Atungpuh thsungkheak I khide künsahde alakheah: tümüde Israelrünü nünü tangzüngkhi bahyukbah nü yo kingaün sadam lukkheama bahdo, tüsho nukshangnü nü yo wukihrübo laksahkhamdo. I lang aninga lah, tüsho arünü I laksahpü yimchoh.”

¹⁵ Judüki Atungpuhnü api ki tha, “Yüang, Damaska sunglo ching nü limro lim rholoang; küyimki nü akhiungbanü, nünü Aram kurungkheak kiulongthsürü thsüpü Hazael mujudemokhitang.

¹⁶ Kheaküshe nünü Israel kurungkheak kiulongthsürü thsüpü Nimshi tsührü Jehu mujudemokhitang; tüsho Abelmeholarü Shaphat tsührü Elisha nü müthri wukihrü thsüpü mujude-mokhitang.

¹⁷ Sherübo Hazael nukshang kheaknü atsokhibanü, Jehunü alaksahbah; tüsho sherübo Jehu nukshang kheaknü atsokhibanü, Elishanü alaksahbah.

¹⁸ Judüalalashe Baal ki mukhukningrü alala tüsho api kheak mümüthsüprü aban, inü Israel ching 7000 lashihbah.”

Elisha Jikhi

¹⁹ Jumonü api ju chingnü tsahmusu, tüsho thulu wochakde alabuh, Shaphat tsührü Elisha ngü. Api müngüh moshipung dudu 12 lakheah, tüsho api akheambe lung bede alakheah. Elijanü api hode yü tüsho api khim anihbuh kheak phukihjih.

²⁰ Apinü moshipungbo zojihbah Elija dunglim alihde yü, tüsho tha, “Inü I buh le I be müthsüpde chode thaanü tüsho I nü yanbah.” Judüki Elijanü tha, “Alode yüang; tümüde inü nü ki tümü thsüa la?”

²¹ Apinü anihbuh yankhi chingnü alode yübah moshipungbo lua laksah; moshipungbo kheak yo sanglungbo lua takbah shih ju khiung, tüsho mihtsürübo kilim kip, tüsho arünü tsüh. Ju dunglim apinü tsahmusubah Elija dunglim yan, tüsho api yamlarü kamabah.