1 KIULONG THSÜRÜ 17 - AMÜSÜH HÜM CL Bible (BSI)

Elija tüsho Tsüng Marükhi

¹ Kheakü Gilead ching, Tishbirü Elijanü Ahab ki tha, “Inü atankihbuh, Israel Thrünpuh, Atungpuh lale, I yu hode yungsho, arübe kam mahne yungsho mahsam ayinke yungsho tsüng marü.”

² Atungpuh yu Elija ki arü,

³ “Ha chingnü yüang tüsho aniakhiuklim peang anguhang, tüsho Jordan aniakhiuklim lakhi Kerith Ayung ching nü jikang.

⁴ Nünü ayung chingnü ayungbah, tüsho ju ching nü kipduhshihpü inü khüyakbo ki thiyukhüm jihdo.”

⁵ Jumonü A TUN GPU H yu yande apinü yü tüsho rhimo; apinü yü tüsho Jordan aniakhiuklim peang Kerith Ayung ching la.

⁶ Khüyakbonü api kilim yapsu le are aban yikhap tüsho shih hande arüjih; tüsho apinü ayung chingnü yung.

⁷ Tüshe anükhüh dunglim ayung ngahabah, tümütüsho lomi ching tsüng marü.

Zarephat ching Elija tüsho Khimoberü

⁸ Judüki Atungpuh yu api kilim arü,

⁹ “ Kheakü Sidon phüni Zarephat ching yüang, tüsho ju ching laang; tümüde ju ching nü kipduhpü inü khimoberü khülang ki thiyukhüm jihdo.”

¹⁰ Jumonü apinü Zarephat lim yü. Küyimki api kiuto ripit ki arükhea, ju ching khimoberü khülang sangjip mode alakheah; apinü alibe ki ji tüsho tha, “I yungpü thsüde, pangjiphüh chingnü ke anükhüh I kilim lubah arang.”

¹¹ Alibenü lude arüpü yüchoki, apinü alibe ki ji tüsho tha, “I kilim yikhap dütre she lubah arang.”

¹² Tüshe alibenü tha, “Atungpuh nü Thrünpuh lale, inü tümü she munung, alophüh ching jim müyikhüh, tüsho pung ching müdangke anükhüh lang ah; kheakü I sangjip momukhungchoh, junangde I thüyam lim yübah tüsho I le I tsührü thsungkheak mozümodobah, ike ju tsühbah, tüsho ashebah.”

¹³ Elijanü alibe ki tha, “Dütre; yüang tüsho nünü athakhi ruk thsang; tüshe akhuhde yikhap-zünkhi anikhüh I kilim lubah arang, tüsho ju dunglim nü tüsho nü tsührü thsungkheak tümükhüh mozümodoang.

¹⁴ Tümüde ha Israel Thrünpuh, Atungpuhnü thachoh: Atungpuhnü lomi ching tsüng marüshihyi khiungde jimphüh tüsho müdangke pung akeangkeang mükam.”

¹⁵ Elijanü athakhi nangde alibenü yübah rhimo, junangde alibe le api tüsho anihbe yamkhün nimung ashang tsüh.

¹⁶ Elija hode asukkhi Atungpuh yu yande jimphüh akeangkeang mükam, yungsho müdangke pung akeangkeang mükam.

¹⁷ Ha dunglim thüyam putungbe khimobe tsührü, ju tukthsü; api tukthsü mülangde akamkhinü api kheak sheak kheamabah.

¹⁸ Jumonü alibenü Elija ki tha, “O Thrünpuh mihtsürü, I azhihde nünü tümü thsükhea? Nünü I neak lümkhitloshihpü tüsho I tsührü sheshihpü nü I kilim arükhea de!”

¹⁹ Tüshe apinü alibe ki alo, “I kilim nü tsührü jihang.” Apinü azübuh ju alibe khüh kheaknü lubah api yappung achangbe khiungshak ching bebah wutu, tüsho anihbuh yapkiu kheak api yapshih.

²⁰ Apinü Atungpuh ki zhi, “O Atungpuh I Thrünpuh, I mühümpung khimoberü kheak she anihbe tsührü laksahkhinü nünü thsümütsü hande arükhea de?”

²¹ Judüki apinü azübuh kheak mahsam ki zünga yap, tüsho Atungpuh ki zhi, “O Atungpuh I Thrünpuh, ha azübuh rhangdung alode arüshang.”

²² Atungpuhnü Elija düsheak sojih; azübuh rhangdung alode api kilim arü tüsho api rhangdung la.

²³ Elijanü azübuh shuh-a lubah achangbe khiungshak chingnü thüyam ching aki tüsho abe kilim jih; judüki Elijanü tha, “ Kheahang, nü tsührü rhangdung lah.”

²⁴ Jumonü alibenü Elija ki tha, “ Kheakü nü Thrünpuh mihtsürü ah de inü mükheahlah, tüsho nü mün ching lakhi Atungpuh yu thiyuro ah.”