1 KIULONG THSÜRÜ 16 - AMÜSÜH HÜM CL Bible (BSI)

¹ Hanani tsührü Jehu kilim Baasha azhihde Atungpuh yu arü,

² “Tümütüsho inü asungthulung chingnü nü shuhkih-a I mihtsürü Israel kurungkheak limberü kamshih, tüsho nünü Jeroboam limro ching tsah, tüsho I mihtsürü Israel neak yihbeakshihde, arü neakbo kheak I bukakhiukshih,

³ jumonü inü Baasha tüsho api yamkhün muyuabahbah, tüsho inü nü yamkhün Nebat tsührü Jeroboam yamkhün nangde akamshihbah.

⁴ Baasha mihtsürü sherü kiuto ching shebanü khihnubonü atsühbah; tüsho api mihtsürü khürü mükeak ching shesho thüning wuhnubonü atsühbah.”

⁵ Kheakü Baasha rhimobo aningkhi, apinü arhimokhibo, tüsho api kiulongthsükhi Israel kiulongthsürübo yukhean hüm ching thrüta müla de?

⁶ Baasha nihbuh jipürü lung yap, tüsho Tirza ching kiuyukabah; tüsho atsührü Elanü api khah müthri.

⁷ Kheaküshe apinü Atungpuh miki amütsü rhimokhi, Jeroboam yamkhün nangde alakhi tüsho apinü ayamkhün laksahkhi, api khahnü arhimokhi kheak api bukakhiukshihkhi hode Hanani tsührü wukihbuh Jehu hode Atungpuh yu Baasha tüsho api yamkhün azhihde arü.

Israel Kiulongthsüpuh Ela

⁸ Juda kiulongthsüpuh Asa kam mukukheak thurukpü ching, Baasha tsührü Elanü Tirza ching Israel kurungkheak kiulongthsüpü tankih; apinü kam mahne kiulongthsü.

⁹ Tüshe api yo atorü Zimri, api khora-lolungbe chamkhüh kurungkheak limthobuhnü api azhihde rük yim. Api ju Tirza ching kiulongthsürü yam aheangbuh Arza yam ching müshanga yapchoki,

¹⁰ Juda kiulongthsüpuh Asa kam mukukheak thünepü ching, Zimri azahbah api kinga lungshih tüsho laksah, tüsho api khah müthri.

¹¹ Küyimki api kiulongthsüpü tankihkhea, api kiulongthsü-binkiu kheak binakede apinü Baasha yamkhün alala laksah; apinü anihbuh keoniorü yungsho amüyamrü athrürü khülang she maningshih.

¹² Hanangde apinü wukihbuh Jehu hode, Baasha azhihde asukkhi, Atungpuh yu yande Zimrinü Baasha yamkhün alala laksahkham–

¹³ tümütüsho Baasha neakbo tüsho api tsührü Ela neakbo, arünü ayihbeakkhi tüsho arü sangthsübo kheak Atungpuh Israel Thrünpuh bukakhiukshihde, arünü Israel neak yihbeakshihkhi alala dünkheak lakheah.

¹⁴ Kheakü aningkhi Ela rhimobo, tüsho api kiulongthsü, Israel kiulongthsürübo yukhean hüm ching thrüta müla de?

Israel Kiulongthsüpuh Zimri

¹⁵ Juda kiulongthsüpuh Asa kam mukukheak thünepü ching, Zimrinü Tirza ching nimung thüne kiulongthsü. Kheakü thirithsürübo Filistiarü kiuto Gibbethon yanpü binkheampung mukhung,

¹⁶ tüsho binkheampung mukhungrü thirithsürübonü ha thade so, “Zimrinü rük yimdo, tüsho apinü kiulongthsüpuh laksahdo”; jumonü Israel alalanü ju nimung binkheampung ching bonungrü limthobuh Omri ju, Israel kurungkheak kiulongthsürü kamshih.

¹⁷ Jumonü Israel alala Omri lung Gibbethon chingnü wutu, tüsho arünü Tirza yan.

¹⁸ Küyimki kiuto yankhi Omrinü angükhea, apinü kiulongthsüpuh yam ching alungbe chipi ching yüzah; apinü kiulongthsüpuh ju anihbuh bede monü takabah, tüsho sheabah–

¹⁹ tümütüsho apinü Atungpuh miki amütsü rhimode neak yihbeakkhi, Jeroboam limro ching tsahkhi, tüsho Israel neak yihbeakshihde, apinü neak yihbeakkhi dünkheak lakheah.

²⁰ Kheakü aningkhi Zimri rhimobo, tüsho apinü rük thsükhi, Israel kiulongthsürübo yukhean hüm ching thrüta müla de?

Israel Kiulongthsüpuh Omri

²¹ Judüki Israel mihtsürü shihcham mahne thsüde chamnak; mihtsürü chamkhühnü Ginath tsührü Tibni, kiulongthsürü kamshihpü api yan, tüsho chamkhühnü Omri yan.

²² Tüshe Omri yanrü mihtsürübonü Ginath tsührü, Tibni yanrü mihtsürü kukabah; jumonü Tibni sheabah tüsho Omri kiulongthsürü kam.

²³ Juda kiulongthsüpuh Asa kam samrükheak khülangpü ching, Omrinü Israel kurungkheak kiulongthsüpü tankih; apinü kam thürükheak mahne kiulongthsü, akhuhde kam thuruk Tirza ching kiulongthsü.

²⁴ Apinü Shemer kheaknü Samaria wung shotoyinchi 6000nü thulo; apinü awung chipi ayün tüsho apinü athrünkhi kiuto Samaria ju awung putungpuh Shemer mung yande ji.

²⁵ Omrinü Atungpuh miki amütsü rhimo; apinü api müngüh larü alala kheaknü alübe thsüde amütsü rhimo.

²⁶ Tümüde apinü Nebat tsührü Jeroboam limro ching tüsho apinü arü sangthsübo kheak Israel Thrünpuh, Atungpuh bukakhiukshihde, Israel neak yihbeakshihkhi ching tsah.

²⁷ Kheakü aningkhi Omri rhimo alala tüsho apinü ahuhkhi wu-sühmüh, Israel kiulongthsürübo yukhean hüm ching thrüta müla de?

²⁸ Omri ju nihbuh jipürü lung yap, tüsho Samaria ching kiuyukabah; api tsührü Ahabnü akhah müthri.

Israel Kiulongthsüpuh Ahab

²⁹ Juda kiulongthsüpuh Asa kam samrükheak tizheahpü ching, Omri tsührü Ahabnü Israel kurungkheak kiulongthsüpü tankih; Omri tsührü Ahabnü Samaria ching Israel kurungkheak kam mukukheak mahne kiulongthsü.

³⁰ Omri tsührü Ahabnü api müngüh larü alala kheaknü alü thsüde Atungpuh miki amütsü rhimo.

³¹ Nebat tsührü Jeroboam neakbo ching tsahpü ju api thsungkheaknü athülih müdam, apinü Sidonrü kiulongthsüpuh Ethbaal tsührü Jezebel aniube thsüpü lu, tüsho yübah Baal tankih tüsho api kingaün.

³² Apinü Samaria ching thsükhi, Baal yam ching Baal thsungkheak kingaün sadam khülang thsü.

³³ Ahabnü Ashera sangthsü she thsü. Ahabnü api müngüh larü Israel kiulongthsürübo kheaknü alü thsüde Israel Thrünpuh, Atungpuh bukakhiukshihde rhimo.

³⁴ Api kim ching Bethelrü Hielnü Jirikho thrünlo; Nun tsührü Jihusua hode apinü asukkhi Atungpuh yu yande, api tsührü adüjibuh Abiram jihde khimtan thsü, tüsho api tsührü akheambuh Segub jihde ripitbo thsü.