1 KIULONG THSÜRÜ 15 - AMÜSÜH HÜM CL Bible (BSI)

Juda Kiulongthsüpuh Abija

¹ Kheakü Nebat tsührü Jeroboam kiulongthsükhi kam thürükheak tizheahpü ching, Abijanü Juda kurungkheak kiulongthsüpü tankih.

² Apinü Jirusalem ching kam mahsam kiulongthsü. Abe mung ju Abishalom tsührü Maaka lakheah.

³ Anihbuh abuhnü api müngüh rhimokhi nangde apinü neak alala yihbeak; abuh David mulong nangde, api mulong ju Atungpuh api Thrünpuh kilim thiyuro mülakheah.

⁴ Judüalalashe David mung chingnü api dunglim atsührü zojihde, tüsho Jirusalem züngkümde Atungpuh api Thrünpuhnü Jirusalem ching api kilim tsünpung khülang jih;

⁵ tümütüsho tümü Atungpuh miki alungkianü Davidnü rhimo, tüsho Hitbuh Uria dünkheak hode, apinü anihbuh kilim thiyukhüm jihkhi tümü ching lang she api rhangdung amuyung rholode mutso.

⁶ Rehoboam tüsho Jeroboam ane dükeak thirithsü tankihkhi ju api rhangdung amuyung lakheah.

⁷ Abija rhimobo aningkhi, tüsho apinü arhimokhi alala, Juda kiulongthsürübo yukhean hüm ching thrüta müla de? Judüki Abija tüsho Jeroboam dükeak thirithsü lakheah.

⁸ Abija ju nihbuh jipürü lung yap, tüsho arünü api David kiuto ching kiuyukabah. Jushu atsührü Asanü api khah müthri.

Juda Kiulongthsüpuh Asa

⁹ Israel kiulongthsüpuh Jeroboam kam mukupü ching, Asanü Juda kurungkheak kiulongthsüpü tankih;

¹⁰ apinü Jirusalem ching kam yirükheak khülang kiulongthsü. Aji mung ju Abishalom tsührü Maaka lakheah.

¹¹ Abuh Davidnü arhimokhi nangde, Atungpuh miki tümü alungkianü Asanü rhimo.

¹² Apinü lomi ching arüngyam ching athrürü müzammüramkhi yihkhita bah, tüsho api jipürübonü sangthsü thsükhibo yihkhita bah.

¹³ Apinü aji Maaka she kiulongthsüberü chingnü yihkhita bah, tümütüsho anihbenü athraneanbe Ashera thsü; Asanü anihbe mejak rüngkheam tüsho Kidron dükhün chingnü takabah.

¹⁴ Tüshe achang dangpungbo a lubah mutso. Judüalalashe Asa mulong a api rhangdung amuyung Atungpuh kilim thiyuro lakheah.

¹⁵ Abuhnü müsühkhitkhi kukrukbo shotoyinchi, suna tüsho pungphurubo apinü Atungpuh yam ching lude yüzah.

¹⁶ Judüki Asa tüsho Israel kiulongthsüpuh Baasha dükeak arü kiulongthsü amuyung thirithsü lakheah.

¹⁷ Israel kiulongthsüpuh Baashanü Juda azhihde wutu, tüsho Juda kiulongthsüpuh Asa kilim wukhiukla yüzahla de athsükhi zhipdopü thsüde Rama chipi ayün.

¹⁸ Judüki Asanü Atungpuh yam ching le kiulongthsüpuh yam ching lakhi rahpungbo shotoyinchi tüsho suna alala lubah api yamlarübo khah ching jih. Kiulongthsüpuh Asanü jurübo Aramrü Hezion tsührü Tabrimmon kiulongthsüpuh Ben-hadad Damaska ching labuh kilim mühah-a yüshihde tha,

¹⁹ “I buh le nü buh ane dükeak nangde, ike dükeak arihde laanü: Inü nü kilim shotoyinchi tüsho suna thsambah mühahchoh; yüang, Israel kiulongthsüpuh Baasha kheak duduachihkhi thsümünimang, junangde api I kheaknü atsolobah.”

²⁰ Ben-hadadnü kiulongthsüpuh Asa ki ani, tüsho Israel kiutobo azhihde api bonungrü limthorübo yüshih. Naphtali lo alala bede Kinnereth alala kuk.

²¹ Küyimki Baashanü ju sokhea, api Rama chipi thsükhi chingnü tuklo tüsho Tirza ching la.

²² Judüki Asa kiulongthsübuhnü sheshe maningshihde Juda alala ki zhiyuk: arünü Baashanü athsükhi Rama ching lungbo tüsho arhütsangbo lubah tso; jurü lua kiulongthsüpuh Asanü Benjamin ching Geba tüsho Mizpa chipi ayün.

²³ Kheakü Asa rhimo aningkhi alala, api wu-sühmüh, apinü arhimokhi alala, tüsho apinü athsükhi kiutobo Juda kiulongthsürübo yukhean hüm ching thrüta müla de? Tüshe api ashinbuhrü kamchoki ajing ching tukthsü lakheah.

²⁴ Jushu Asa nihbuh jipürü lung yap, tüsho abuh David kiuto ching kiuyukabah; api tsührü Jehoshaphatnü api müthri.

Israel Kiulongthsüpuh Nadab

²⁵ Juda kiulongthsüpuh Asa kam mahnepü ching Jeroboam tsührü Nadabnü Israel kurungkheak kiulongthsüpü tankih; apinü Israel kurungkheak kam mahne kiulongthsü.

²⁶ Api jipürü limro ching tsahde Atungpuh miki tümü amütsüanü apinü ju rhimo tüsho api neak ching Israel neak yihbeakshih.

²⁷ Issakar yamkhün chingnü, Ahija tsührü Baashanü api azhihde mulomülap; tüsho Filistiarü kiuto Gibbethon ching Baashanü api laksah; tümüde Nadab tüsho Israel alalanü Gibbethon yanpü thsüde alakheah.

²⁸ Junangde Juda kiulongthsüpuh Asa kam mahsampü ching Baashanü Nadab laksah, tüsho api khah müthri.

²⁹ Api kiulongthsü tankih akede apinü Jeroboam yamkhün alala laksah; apinü api yamlarü Shilonrü Ahija hode asukkhi Atungpuh yu ayannü, apinü müdükheakshihyi khiungde, Jeroboam yamkhün ching sheak thsükhi khülang she maningshih–

³⁰ tümütüsho Jeroboamnü neak yihbeak tüsho apinü Israel neak yihbeakshih tüsho Israel Thrünpuh bukakhiukshih.

³¹ Kheakü Nadab rhimobo aningkhi, tüsho apinü arhimokhi alala Israel kiulongthsürübo yukhean hüm ching thrüta müla de?

³² Judüki Asa tüsho Israel kiulongthsüpuh Baasha dükeak ane kiulongthsü amuyung thirithsü lakheah.

Israel Kiulongthsüpuh Baasha

³³ Juda kiulongthsüpuh kam mahsampü ching, Ahija tsührü Baashanü Tirza ching Israel alala kurungkheak kiulongthsüpü tankih; apinü kam mukukheak phüyi kiulongthsü.

³⁴ Apinü Jeroboam limro ching tsahde, Atungpuh miki amütsü rhimo tüsho Israel neak yihbeakshih.