1 KIULONG THSÜRÜ 14 - AMÜSÜH HÜM CL Bible (BSI)

Jeroboam Tsührü Shekhi

¹ Ju kim ching Jeroboam tsührü Abija tukthsü.

² Jeroboamnü aniube ki tha, “Yüang, nü jak müthriang, junangde arünü nü Jeroboam niube ah de mümükheah, tüsho Shilo ching yüang; tümütüsho I ha mihtsürü kurungkheak kiulongthsürü thsübah de athabuh wukihrü Ahija ju ching lah.

³ Nü lung yikhap nungkhi 10, yikhap zünkhi khürü tüsho mukhuke phüh hanang tüsho api kilim yüang; azübuh kheak tümü dünjibanü apinü athabah.”

⁴ Jeroboam niubenü jude rhimo; alibenü tsahmusubah Shilo lim yü, tüsho Ahija yam lim arü. Kheakü Ahijanü mükheahkhuk, tümüde api kam hihmonü amük thrimthrimde alakheah.

⁵ Tüshe Atungpuhnü Ahija ki tha, “Jeroboam niubenü anihbe tsührü dünkheak nü ki keokhipü arüchoh; tümüde api tukthsülah. Nünü ha ruk alibe ki thaang.” Küyimki alibe arükhea, alibenü püpürü liberü nangde rük thsü.

⁶ Tüshe alibe khimdopü ki arüchoki, küyimki Ahijanü ajing khün sokhea, apinü tha, “Azahang, Jeroboam niube; tümüde nünü püpürü thsüpü rük thsücho? Tümütüsho nü thsungkheak I kilim thiyusheak amütsü lah.

⁷ Yüang, Jeroboam ki thaang, ‘Atungpuh , Israel Thrünpuhnü ha thachoh: Tümütüsho mihtsürü bolungnü inü nü shuhkihde, I mihtsürü Israel kurungkheak limberü thsüshih,

⁸ tüsho nü kilim jihpü David yamkhün kheaknü kiulongthsü thokhide tso; tütüshe I yamlarü Davidnü, I yukhüm anide tüsho I miki alungki lang rhimode api mulong athrünkhinü I yankhi nangde müthsü,

⁹ tüshe nünü nü müngüh larü alala kheaknü alübe amülim rhimodo tüsho nü thsungkheaknü püpü thrünpuhbo tüsho sangthsübo I bukakhiukshihde thsü, tüsho nü dunglim I nima bahdo;

¹⁰ jumonü, Jeroboam yamkhün ching inü thsümütsü handarübah. Israel ching azhorü tüsho zuzu lakhi athrürü aban Jeroboam kheaknü akheamshihbah, tüsho khürünü alala mükheamkhamyi khiungde khih takkhi nangde Jeroboam yamkhün aniuabahshihbah.

¹¹ Jeroboam betsührü shepü kiuto ching shebanü, khihnunü atsühbah; tüsho khürü mükeak ching shesho, thüning wuhnubonü atsühbah; tümüde Atungpuhnü asukdo.’

¹² Jumonü tsahmusuang, nü yam lim yüang. Küyimki kiuto ching nü jing yüzahbanü, azübuh ashebah.

¹³ Israel alalanü api thsungkheak tüzhobah tüsho api kiuyuka bahbah; tümüde api lang Jeroboam yamkhün chingnü mibahpung arübah, tümütüsho Jeroboam yamkhün ching, api kheak Israel Thrünpuh, Atungpuh asühshihbe tümükhüh lah.

¹⁴ Kheaküshe Jeroboam yamkhün kheamshihpü thsüde, Atungpuhnü api thsungkheak Israel kurungkheak kiulongthsürü khülang khihni akhiukshihbah, kheakü tsütsünü she!

¹⁵ “ Ke ching kiupung niukkhi nangde Atungpuhnü Israel shikbah; apinü arü jipürü kilim jihkhi lo atsü chingnü apinü Israel rukkhita bahbah, tüsho Euphra hode arü hiumüzütshihbah, tümütüsho arünü Atungpuh bukakhiukshihde amüsüh Ashera thsüdo.

¹⁶ Jeroboam neak dünkheaknü apinü Israel bahyukbah, küpü apinü neak yihbeak tüsho apinü Israel neak yihbeakshih.”

¹⁷ Judüki Jeroboam niubenü asürübahle tsoabah, tüsho alibenü Tirza lim arü. Alibe thüyam ripit ki arüchoki, azübuh ju sheabah.

¹⁸ Tüsho apinü ayamlarü wukihbuh Ahija hode asukkhi, Atungpuh yu yande, Israel alalanü api kiuyukabah tüsho api thsungkheak tüzho.

Jeroboam Shekhi

¹⁹ Kheakü Jeroboamnü arhimokhi lüpdükhi, apinü thirithsükhi tüsho kiulongthsükhibo Israel kiulongthsürübo yukhean hüm ching thrüta lah.

²⁰ Jeroboamnü kiulongthsükhi kim ju kam mukukheak mahne lakheah; jushu api nihbuh jipürü lung yap, tüsho api tsührü Nadabnü api khah müthri.

Juda Kiulongthsüpuh Rehoboam

²¹ Kheakü Solomon tsührü Rehoboamnü Juda ching kiulongthsü. Rehoboam kiulongthsüpü tankihchoki api kam 41 azorü lakheah, tüsho Atungpuhnü api mung zopü Israel trük alala bolungnü amokhitkhi kiuto Jirusalem ching apinü kam thrürükheak thüne kiulongthsü. Abe ju Amonrü Naama lakheah.

²² Atungpuh miki tümü amütsüanü Judanü rhimo; arü jipürünü arhimokhi alala kheaknü alübe arünü yihbeakde arü neakbo kheak api bukakhiukshih.

²³ Tümüde arünü she arü thsungkheak awung achangbo, dungjingbo, tüsho Ashera mejakbo awung achang tüsho sangdung phüyakbo khüp thsü;

²⁴ judüki lomi ching athrürünü arüngyam ching müzammüramrü she alakheah. Atungpuhnü Israel müngüh, yankhita bahkhi trükshihbo athraneanbebo alala arünü yihbeak.

²⁵ Kiulongthsüpuh Rehoboam kam phüngüpü ching Ijip kiulongthsüpuh Shishaknü Jirusalem azhihde atu;

²⁶ apinü Atungpuh yam ching rahpungbo tüsho kiulongthsüpuh yam ching rahpungbo lubah tso; apinü lüpdükhi lu. Solomonnü athsükhi suna tsungbo she alala apinü lubah tso;

²⁷ jumonü kiulongthsüpuhnü jurü müthri müwayinchi tsung thsü, tüsho jurübo kiulongthsüpuh ripit aheangrü torü khah ching jih.

²⁸ Kiulongthsüpuh Atungpuh yam ching yü abande aheangbuhnü jurü han tüsho aheangpung khiungshak ching lubah arü.

²⁹ Kheakü Rehoboamnü arhimokhi alala Juda kiulongthsürübo yukhean hüm ching thrüta müla de?

³⁰ Judüki Rehoboam le Jeroboam ane dükeak mutukzhakde thirithsü lakheah.

³¹ Rehoboam ju nihbuh jipürü lung David kiuto ching kiuyukabah. Abe mung ju Amonrü Naama lakheah. Atsührü Abijanü api khah müthri.