1 KIULONG THSÜRÜ 12 - AMÜSÜH HÜM CL Bible (BSI)

Dukulim Trükbonü Azhihkhi

¹ Rehoboamnü Shekem ching yü, tümüde Israel alala api kiulongthsürü thsüshihpü Shekem ching arü.

² Küyimki Nebat tsührü Jeroboamnü ha sokhea (tümüde api kiulongthsüpuh Solomon kheaknü tsode ayükhi, Ijip ching lang alakheah), api Ijip chingnü alode arü.

³ Tüsho arünü yüshihbah api jidarü; tüsho Jeroboam le Israel amukhungrü alalanü arübah Rehoboam ki tha,

⁴ “Nü buhnü isa hah mülangde kamshihdo. Jumonü kheakü nü buhnü arhimokhibo amüküp tüsho api hahmülang isa kheak yihkihkhi hiphipde kamshang tüsho isanü nü tankihbah.”

⁵ Apinü arü ki tha, “Nimung mahsam thsungkheak tsoabahang, jushu I kilim alode arang.” Jumonü mihtsürübo tsoabah.

⁶ Judüki kiulongthsüpuh Rehoboamnü, abuh Solomon rhangdung lachoki api ki lakhi ashinbuhrübo ki lümkhi keokhi, “Ha mihtsürübo ki alopü nüsanü küruk I ki athsunganahba?”

⁷ Arünü api ki alo, “Mürangkhüh khihni harü mihtsürü yamlarü thsüpü tüsho arü tankihpü thsüsho, arü kilim atsükhinü alojang, arübo kamruhroro nü yamlarü thsübah.”

⁸ Tüshe ashinbuhrübonü api ki athsunganahkhi apinü müleangkhi, tüsho api lung zode asürübah kheakü api ki larü athrününgtsüng mihtsürübo kheak keokhikeora.

⁹ Apinü arü ki tha, “Nü buhnü isa kheak hahmülang yihkihjihkhi hiphipde kamshang de I ki tharü ha mihtsürübo ki isanü alopü thsüde nüsanü I ki tümü athsunganahba?”

¹⁰ Api lung zode asürükhi athrününgtsüngbonü api ki tha, “Nü buhnü isa hah mülangde kamshihdo, tüshe nünü isa thsungkheak hiphipshihbeah de nü ki tharü mihtsürübo ki nünü ha ruk thaang, ‘I yingkhing aninibe ju I buh chim kheaknü akheahbe ah.

¹¹ Kheakü, I buhnü nüsa kheak hahmülang yihkihdo, inü nüsa hahmülang khiojihbah. I buhnü nüsa rhaptsonü dando, tüshe inü nüsa kheak lungthsührinü adanbah.’ ”

¹² Jumonü kiulongthsüpuhnü asam nipü I kilim alodarang de athakhi nangde, Jeroboam tüsho mihtsürü alala Rehoboam kilim asam nipü arü.

¹³ Kiulongthsüpuhnü mihtsürübo ki müküpde alo. Ashinbuhrübonü api ki athsunganahkhi apinü mani

¹⁴ tüsho athrününgtsüngbonü athsunganahkhi yande apinü arü ki tha, “I buhnü nüsa hah mülangshihdo, tüshe inü nüsa hahmülang kheak khiojihbah; I buhnü nüsa rhaptsonü dando, tüshe inü nüsa lungthsührinü adanbah.”

¹⁵ Junangde kiulongthsüpuhnü mihtsürübo ki mani, tümütüsho apinü Nebat tsührü Jeroboam ki Shilonrü Ahija hode athakhi dünjipü Atungpuh lümkhi lakheah.

¹⁶ Küyimki kiulongthsüpuhnü arü ki mani de Israel alalanü angükhea, mihtsürübonü kiulongthsüpuh ki alo, “David lung isa tümü shihcham la? Jesse tsührü lung isa tümü yamrüplurüp müla. Nüsa khimyambo lim yüang, O Israel! Kheakü nüsa nihbuh yam lim kheahang, O David.” Jumonü Israelnü arü khimyam lim yüabah.

¹⁷ Tüshe Juda kiutobo ching larü Israel kurungkheak Rehoboamnü kiulongthsü.

¹⁸ Küyimki kiulongthsüpuhnü rhimo amüküp kurungkheak mükheahbuh Adoniram yüshihkhea, Israel alalanü api lungnü rusahabah. Judüki kiulongthsüpuhnü Jirusalem lim alihde ayüpü nihbuh khora-lolungbe kheak niokheamde künkih.

¹⁹ Jumonü khihni khiungde Israelnü David yamkhün azhihde arükheah.

²⁰ Küyimki Jeroboam alode arüdo de Israel alalanü asokhea, arünü yüshihbah api boto mukhung ching jidarü tüsho Israel alala kurungkheak api kiulongthsürü kamshih. Juda trük kheak hode David yamkhün yanrü sheshe mülakheah.

Shemaianü Müchitkhi

²¹ Küyimki Rehoboam Jirusalem ching arükhea, apinü anihbuh kiulongthsü ngülopü thsüde Israel trük bede keochihpü Juda yamkhün tüsho Benjamin trük alala, bonungrü 180,000 bemukhung.

²² Tüshe Thrünpuh mihtsürü Shemaia kilim Thrünpuh yu arü:

²³ Solomon tsührü Juda kiulongthsüpuh Rehoboam, Juda tüsho Benjamin guk alala, tüsho aningkhi mihtsürübo ki thaang.

²⁴ “Atungpuhnü ha thachoh, Israel mihtsürü nüsa keoniorü bede keochihpü nüsa duwutu. Mihbüm aban thüyam lim yüshang, tümüde ha I lümkhi ah.” Jumonü arünü Atungpuh yu ani tüsho Atungpuh yu ayannü thüyam lim alode yü.

Jeroboamnü Atungpuh kheaknü Alode Atsokhi

²⁵ Judüki Jeroboamnü Ephraim awung lomi ching Shekem chipi ayün, tüsho ju ching la; api ju chingnü wukhiukbah Penuel ching chipi ayün.

²⁶ Judüki Jeroboamnü nihbuh zangrü lüm, “ Kheakü kiulongthsü David guk ching yülopü labah.

²⁷ Mürangkhüh ha mihtsürübonü mutuklode Jirusalem ching Atungpuh yam ching laksah-a kingaünde wutusho, ha mihtsürübo mulong ju Juda kiulongthsüpuh Rehoboam, arü putungrü kilim rholobah; arünü I laksahbah tüsho Juda kiulongthsüpuh Rehoboam kilim alode ayübah.”

²⁸ Jumonü kiulongthsüpuhnü lümkhi lu tüsho suna moshi nunu mahne thsü. Apinü mihtsürübo ki tha, “Nüsa Jirusalem lim khide shude wutudo. O Israel, nüsa Ijip lo chingnü bekhitkhi nüsa thrünpuhbo ha kheak lah.”

²⁹ Apinü khülang Bethel ching zo, tüsho püpü Dan ching zo.

³⁰ Tüsho ha neak kamabah, tümüde mihtsürübonü yübah khülang miki Bethel ching tüsho püpü miki Dan khiungde kingaün.

³¹ Apinü awung achangbo kheak thüyambo she thsü, tüsho Levirü yungde, mihtsürü alala bolungnü amükeamrü zojih.

Bethel ching Kingaün Bahyukkhi

³² Jeroboamnü Juda ching lakhi thünio nangde khinu tizheah nimung thürükheak phüngü nipü thünio mungpü akhukhit, tüsho apinü kingaün sadam kheak laksah-a kingaünkhibo jih; junangde apinü athsükhi moshi nunubo kilim Bethel ching laksah-a kingaün. Tüsho apinü athsükhi awung achangbo amükeamrübo ju Bethel ching zojih.

³³ Api zangrünü akhukhitkhi khinu tizheah thürükheak phüngü nipü Bethel ching apinü athsükhi kingaün sadam lim wutu; apinü Israel mihtsürübo thsungkheak thünio akhukhit, tüsho rhümthüneabe jihpü api kingaün sadam lim wutu.