1 KIULONG THSÜRÜ 11 - AMÜSÜH HÜM CL Bible (BSI)

Solomonnü Thrünpuh kheaknü Achamkhikhi

¹ Kiulongthsüpuh Solomonnü Pharao tsührü lungnü khiungkerü liberü ahihdo muzho: Moabberü, Amonberü, Edomberü, Sidonberü, tüsho Hitberü.

² Arübo ju trükshihbo chingnü, küpü thsungkheak Atungpuhnü Israelrü ki tha, “Nüsanü arü lung düyihluachih; tümüde tsükjide arünü nüsa mulong bephülapa arü thrünpuhbo yanshihbah”; judüalalashe Solomonnü arü kheak muzhode mürip.

³ Api niuberü 700 tüsho hanniuberü 300 lakheah; tüsho api niuberübonü api mulong bephülapjih.

⁴ Tümüde küyimki ashinbuhrü kamkhea, api niuberübonü api mulong arü thrünpuhbo kilim bephülap; tüsho abuh David mulong nangde api mulong ju Atungpuh api Thrünpuh kilim thiyuro mülakheah.

⁵ Tümüde Solomonnü Sidonrü aliberü thrünpuh Astar tüsho Amonrü athraneanbe thrünpuh Molek yan.

⁶ Jumonü Solomonnü küpü Thrünpuh miki amütsü lakheanü ju rhimo, tüsho abuh Davidnü arhimokhi nangde shahde Atungpuh müyan.

⁷ Judüki Solomonnü Jirusalem aniakhiuklim awung kheak, Moab athraneanbe thrünpuh Kemosh, tüsho Amonrü athraneanbe thrünpuh Molek thsungkheak kingaünpung thsü.

⁸ Apinü api niuberübo arü thrünpuhbo kilim rhümthüneabe jihrü tüsho laksah-a kingaünrübo khiungkerübo thsungkheak ju ruk thsü.

⁹ Judüki Atungpuhnü Solomon kheak bukakhiuk, tümütüsho api ki mahne ki akhiuka huhbuh Israel Thrünpuh, Atungpuh kheaknü api mulong rholode tso.

¹⁰ Apinü Solomon ki püpü thrünpuhbo müyanpü thiyukhüm jihjih she, Solomonnü Atungpuh yukhüm manidebah.

¹¹ Jumonü Atungpuhnü Solomon ki tha, “Tümütüsho nünü ha rhimodo tüsho inü nü ki thiyukhüm jihkhi I tangzüngkhi tüsho I yakzanbo mani, tsükjide inü nü kiulongthsü nü kheaknü thorüpbah tüsho nü yamlarü kilim jihbah.

¹² Tütüshe nü buh David mung chingnü nü rhangdung lachoki inü mürhimo; inü nü tsührü khah chingnü athorüpbah.

¹³ Judüalalashe inü kiulongthsü abümnü muthorüp; inü trük khülang nü tsührü kilim, I yamlarü David tüsho inü amokhitkhi Jirusalem mung chingnü ajihbah.”

Solomon Riribo

¹⁴ Judüki Atungpuhnü Solomon azhihde, Edomrü Hadad tuthsukmusu; api ju Edom ching kiulongthsü yamkhün lakheah.

¹⁵ Küyimki David ju Edom ching lakhea tüsho bonungrü limthobuh Joab asherü kiuyuka bahpü wutukhea, apinü Edom ching athrürü alala laksah.

¹⁶ (Tümüde arünü Edom ching athrürü alala müdükheakkhamyi khiungde, Joab tüsho Israel alala ju ching khinu thuruk la);

¹⁷ tüshe Hadad lung abuh yamlarü Edomrü khürü Ijip ching tsoyuk. Judüki api azürü nunu lakheah.

¹⁸ Arü Midia chingnü tsahmusu tüsho Paran ching arü; arünü mihtsürübo Paran chingnü arü lung bea lu tüsho Ijip ching, Ijip kiulongthsüpuh Pharao kilim arü, apinü anihbuh kilim thüyam, tsühyungbe tüsho alo jih.

¹⁹ Pharao miki Hadad tode muzhoabah, junangde apinü anihbuh kilim aniube thsüshihpü aniube kiulongthsübe Tapenes niurü jih.

²⁰ Tapenes niurünü api kilim athrürü amung Genubath zübejih, apijü Tapenesnü Pharao yam chingnü bezomusu; Genubath ju Pharao tsührü bolung Pharao yam ching lakheah.

²¹ Küyimki David ju nihbuh jipürü lung shedo tüsho bonungrü limthobuh Joab shedo de Hadadnü Ijip chingnü asokhea, Hadadnü Pharao ki tha, “I chamachihanü, junangde inü I lomi lim yüanü.”

²² Tüshe Pharaonü api ki tha, “Nü I kilimnü tümü müngükhi kheakü nü lomi lim yüpü yimcho?” Tüsho apinü tha, “Yung, I yüshang.”

²³ Solomon azhihrü püpü Eliada tsührü Rezon Thrünpuhnü akhiukshih, api ju nihbuh putungrü Zoba kiulongthsüpuh Hadadezer kheaknü atsokheah.

²⁴ Davidnü alaksahshu apinü anihbuh mükamde ajingyanrü bemukhung tüsho mihkhukrü khunung kurungkheak limberü kam; arübo Damaska ching yübah la, tüsho api Damaska ching kiulongthsürü kamshih.

²⁵ Hadadnü thsümüchide arhimokhi nangde Solomon nimungbo alala ching api Israel azhihrü lakheah; apinü Israel mükhemürang thsü tüsho Siria kurungkheak kiulongthsü.

Thrünpuhnü Jeroboam ki Alokhikhi

²⁶ Ephraim ching Zeredarü Nebat tsührü, khimobe Zeruia tsührü Solomon yamlarü Jeroboamnü kiulongthsüpuh kheak azhih.

²⁷ Apinü kiulongthsüpuh azhihkhi amütsan ju ha lakheah: Solomonnü Jirusalem aniakhiuklim alo kiua dangkih tüsho abuh David kiuto chipi khünbitbo yihdo.

²⁸ Jeroboam ju khide amüzhak mihtsürü lakheah, tüsho küyimki athrününgtsüngbuh ju rhimo mükheahrü ah de Solomonnü angükhea, apinü anihbuh ju Josep yamkhün ching rhimo amüküp alala kurungkheak hahmülang jih.

²⁹ Ju kim ching, küyimki Jeroboam ju Jirusalem chingnü akhinkhea, Shilonrü wukihbuh Ahijanü api limro ching ngü. Ahijanü khim aso api kheak phukihjih. Lomi athüyang ching ane zangrü lakheah,

³⁰ judüki apinü phuyua lakhi khim aso kheak Ahijanü ramlo tüsho büm 12 kamde thonak.

³¹ Judüki apinü Jeroboam ki tha: Nü thsungkheaknü büm 10 luang; tümüde ha Israel Thrünpuh, Atungpuhnü thachoh, “ Kheahang, Solomon khah chingnü inü kiulongthsü thorüppü thsüchoh, tüsho nü kilim trük 10 jihbah.

³² I yamlarü David tüsho Israel trükbo alala lungnü inü amokhitkhi kiuto, Jirusalem mung chingnü trük 1 api yo thsüpü aningbah.

³³ Ha tümütüsho apinü I bahyukbah Sidonrü thrünbebo, Moab thrünpuh Kemosh tüsho Amonrü thrünpuh Molek kingaün tüsho abuh Davidnü arhimokhi nangde I miki alungki, I yakzanbo tüsho I yuzüngbo rhimode I limrobo ching mütsah.

³⁴ Judüalalashe inü kiulongthsü abümnü api kheaknü lubah mutso tüshe inü amokhitkhi I yamlarü David tüsho apinü I yukhümbo le I yakzanbo anikhi mung chingnü api rhangdung lakhi amuyung yakzanshuhrü thsüshihbah;

³⁵ tüshe inü atsührü kheaknü kiulongthsü hanakhinbah tüsho ju nü kilim jihbah–ju trük 10.

³⁶ Tütüshe api tsührü kilim inü trük 1 jihbah, junangde I mung zopü inü amokhitkhi kiuto, Jirusalem ching David thsungkheak tsünpung khülang kamruhroro I miki labah.

³⁷ Inü nü lubah, tüsho nü menü akünkhi alala kurungkheak nünü kiulongthsübah; Israel kurungkheak nü kiulongthsürü thsübah.

³⁸ Nünü I yukhüm alala anide, I limrobo ching tsahsho, tüsho I yamlarü Davidnü arhimokhi nangde, I yakzanbo tüsho I yukhümbo anide I miki alungki rhimosho, I nü lung labah, tüsho inü David khilim thsüjihkhi nangde nü khilim atsüpbe yam thsüjihbah, tüsho inü nü kilim Israel jihbah.

³⁹ Ha dünkheaknü inü David tsühsoniusobo thsümüchibah, tüshe lünnü yung.”

⁴⁰ Jumonü Solomonnü Jeroboam laksahpü yim; tüshe Jeroboamnü mürangde Ijip kiulongthsüpuh Shishak kilim tsode yü, tüsho Solomon müsheyi khiungde Ijip ching la.

Solomon Shekhi

⁴¹ Kheakü Solomonnü rhimokhi alala, api lümlung, jurübo Solomon rhimokhibo hüm ching thrüta müla de?

⁴² Solomonnü Jirusalem ching Israel kurungkheak kiulongthsükhi kim ju kam yirü lakheah.

⁴³ Solomon nihbuh jipürü lung yap tüsho abuh David kiuto ching kiuyukabah; tüsho atsührü Rehoboamnü api khah müthri.