1 KIULONG THSÜRÜ 1 - AMÜSÜH HÜM CL Bible (BSI)

Kiulongthsüpuh David Ashinbuhrü Kamkhi

¹ Kiulongthsüpuh David khide shina lakheah; tüsho ayamlarübonü api khimnü phudodo she mülamlamde alakheah.

² Jumonü api yamlarübonü api ki tha, “I tungpuh kiulongthsüpuh thsungkheak atsangkhit anünürü khülang yimshang, tüsho alibe kiulongthsüpuh ki lashang, tüsho api kümshang; alibe nü treang kheak yapshang, junangde I tungpuh kiulongthsüpuh lamlambah.”

³ Jumonü arünü Israel lomi alala ching anünürü akheahakhamkhi yim, tüsho Shunamrü Abishag yimkhita kiulongthsüpuh ki bebah arü.

⁴ Alibe ju khide akheahakham lakheah. Anihbe kiulongthsüpuh kümrü kam tüsho api tankih, tüshe kiulongthsüpuhnü alibe kheak munung.

Adonijanü Kiulongthsü Jangachihkhi

⁵ Kheakü Haggith tsührü Adonijanü azangrü shuhkihde tha, “I kiulongthsürü thsübah”; apinü amüngüh alihshihpü khora-lolungbe tüsho khoraberü, tüsho mihtsürü 50 tsanglung.

⁶ Anihbuh abuhnü küyimkishe, “Tümüde nünü ha tüsho ha ruk rhimokhea?” de keokhide api müthürüh. Kheaküshe api khide akheahakham mihtsürü lakheah, tüsho api ju Absalom khin zübekheah.

⁷ Apinü Zeruia tsührü Joab tüsho amükeambuh Abiathar bebah asukachih, tüsho anenü Adonija rung.

⁸ Tüshe amükeambuh Zadok tüsho Jehoiada tsührü Benaia, tüsho wukihrü Nathan, Shimei, Rei tüsho David bonungrübonü Adonija kilim murung.

⁹ Adonijanü namfimihnu, moshipung, tüsho amüdangkhi moshibonü Enrogel yean lakhi Zoheleth lung kinü laksah-a kingaün, tüsho apinü akhiungmungrü alala, kiulongthsüpuh tsührübo, tüsho Juda kiulongthsü atorü alala jiyuk,

¹⁰ tüshe apinü wukihrü Nathan yungsho Benaia yungsho thirithsürübo yungsho anihbuh niurü Solomon müjiyuk.

Solomon Kiulongthsürü Kamshihkhi

¹¹ Judüki Nathannü Solomon abe Bathsheba ki tha, “Haggith tsührü Adonija kiulongthsürü kamkhi nünü musode tüsho isa tungpuh Davidnü ju mümükheah de?

¹² Kheakü jumonü arang, inü nü kilim rük jihanü, junangde nünü nü rhangdung tüsho nü tsührü Solomon rhangdung khümkhitbah.

¹³ Khülang ki kiulongthsüpuh David ki yübah thaang, ‘I tungpuh kiulongthsüpuh, nü tsührü Solomonnü kiulongthsürü thsülobah tüsho api I kiulongthsü-binkiu kheak binbah de nünü mütha de? Dale küde thsah Adonija kiulongthsürü kamkhea?’

¹⁴ Nü kiulongthsüpuh ki thiyu thachoki I nü dunglim arübah tüsho nü yubo thalangjihbah.”

¹⁵ Jumonü Bathshebanü kiulongthsüpuh ki api khiungshak ching yü. Kiulongthsüpuh ju khide shina lakheah; Shunamrü Abishagnü kiulongthsüpuh mütrüde alakheah.

¹⁶ Bathshebanü khukningde kiulongthsüpuh ki akin jih, tüsho api ki tha, “Nünü tümü lümla?”

¹⁷ Alibenü api ki tha, “I tungpuh, nünü Atungpuh nü Thrünpuh tamde nü yamlaberü ki thiyuchihchim: Nü tsührü Solomonnü I khinpü kiulongthsürü thsübah, tüsho api kiulongthsü-binkiu kheak binbah.

¹⁸ Tüshe nü I tungpuh, kiulongthsüpuhnü mümükheahkheah she, kheakü zukleangnü Adonija kiulongthsürü kamdo.

¹⁹ Apinü moshipung, amüdangkhi moshibo, namfimihnu suhdahde laksah-a kingaündo, tüsho kiulongthsüpuh tsührübo, amükeambuh Abiathar, tüsho bonungrü limthobuh Joab jiyukdo; tüshe apinü nü yamlarü Solomon a müjiyuk.

²⁰ Tüshe nü, I tungpuh kiulongthsüpuh dunglim kiulongthsü-binkiu kheak shepü binpü arü ki thabanü Israel alala mükji nü kheak lah.

²¹ Judüalalashe I tungpuh kiulongthsüpuh nihbuh jipürü lung sheabahshu I tsührü Solomon tüsho I ju mahmünitrü khejihbah.”

²² Alibenü kiulongthsüpuh ki asukachihchoki, wukihbuh Nathan azah.

²³ Kiulongthsüpuh ki tha, “Ha kheak wukihbuh Nathan lah.” Küyimki api kiulongthsüpuh ki azah khea, apinü alo kheak khukningde kiulongthsüpuh ki akin jih.

²⁴ Nathannü tha, “I tungpuh kiulongthsüpuh, Adonijanü I khin kiulongthsübah, tüsho api I kiulongthsübinkiu kheak binbah de nünü athakhea de?

²⁵ Tümüde api khihni yükido tüsho moshipung, amüdangkhi moshibo, tüsho namfimihnu suhdahde laksah-a kingaündo, tüsho kiulongthsüpuh tsührü alala, bonungrü limthobuh Joab, tüsho amükeambuh Abiathar jiyukbah kheakü tsühyungde arünü api miki thachoh, ‘ Kiulongthsüpuh Adonija kutsüpde laang!’

²⁶ Tüshe apinü I nü yamlarü, amükeambuh Zadok, Jehoiada tsührü Benaia, tüsho nü yamlarü Solomon müjiyuk.

²⁷ Hadürü I tungpuh kiulongthsüpuhnü handarükhea de tüsho I tungpuh kiulongthsüpuh dunglim akiulongthsü-binkiu kheak shepü binpü lanü nünü nü yamlarübo ki müthakhea de?”

²⁸ Kiulongthsüpuh Davidnü tha, “I kilim Bathsheba jidarang.” Jumonü alibe ju kiulongthsüpuh ki azahbah api miki zhip.

²⁹ Kiulongthsüpuhnü thiyuchihchimde tha, “Atungpuh lale, azhihrübo kheaknü shepünü I rhangdung khümkhit,

³⁰ Atungpuh Israel Thrünpuh tamde inü nü ki thiyuchihchimchoh, ‘Nü tsührü Solomonnü I dunglim kiulongthsübah, tüsho apinü I kiulongthsü-binkiu kheak I müthri binbah,’ inü ha khihni rhimobah.”

³¹ Judüki Bathshebanü alo kheak khukningde kiulongthsüpuh ki akin jih tüsho tha, “I tungpuh kiulongthsüpuh David lünnü laang!”

³² Kiulongthsüpuh Davidnü tha, “Amükeambuh Zadok, wukihbuh Nathan, tüsho Jehoiada tsührü Benaia I kilim jidarang.” Küyimki arü kiulongthsüpuh miki arükhea,

³³ kiulongthsüpuhnü arü ki tha, “Nüsa lung nüsa tungpuh yamlarübo bebah yüang tüsho I yo khoranunu kheak I tsührü Solomon binshihbah api Gihon ching bebah akiang.

³⁴ Ju ching amükeambuh Zadok tüsho wukihbuh Nathan anenü api Israel kurungkheak kiulongthsürü thsüpü mujude-mokhitshang; jushu hulipungpung khungang, tüsho thaang, ‘ Kiulongthsüpuh Solomon kutsüpde laang!’

³⁵ Nüsanü api yande wutubah. Api arübah tüsho I kiulongthsübinkiu kheak binbah; api I müthri kiulongthsürü thsübah; tümütüsho api Israel tüsho Juda kurungkheak yakzanshuhrü thsüpü inü moyukdo.”

³⁶ Jehoiada tsührü Benaianü kiulongthsüpuh ki tha, “Ju ruk thsang! I tungpuh kiulongthsüpuh Thrünpuh, Atungpuhnü ju ruk hahmülang jihshang.

³⁷ I tungpuh kiulongthsüpuh lung Atungpuh lakhi nangde Api Solomon lung lashang, tüsho api kiulongthsü-binkiu ju I tungpuh kiulongthsüpuh David kiulongthsübinkiu kheaknü atobe lashang.”

³⁸ Jumonü amükeambuh Zadok, wukihbuh Nathan, Jehoiada tsührü Benaia, tüsho Kerethrü le Pelethrü yükibah kiulongthsüpuh David khoranunu kheak Solomon binshih, tüsho api Gihon lim bebah arü.

³⁹ Ju ching amükeambuh Zadoknü müdangke pung khimyam chingnü lu tüsho Solomon mujude-mokhit. Jushu arünü hulipungpung müt tüsho mihtsürü alalanü tha, “Kiulongthsüpuh Solomon kutsüpde laang!”

⁴⁰ Tüsho mihtsürü alalanü khungpibo khungde tüsho arü alankhinü alo ajanpü thsüde khide asühachihde api yande wutu.

⁴¹ Adonija tüsho api lung larübonü arü yimtsühkhamshu ju so. Joabnü hulipungpung düsheak sochoki tha, “Tümüde kiuto ching ju alancho?”

⁴² Api thiyu thachoki, amükeambuh Abiathar tsührü Jonathan arünü khiung. Adonijanü tha, “Azahang, tümüde nü athülünkhi mihtsürü ah tüsho tsükjide nünü thiyusheak atsü handarüchoh.”

⁴³ Jonathannü Adonija ki alo, “Yung, tümüde isa tungpuh kiulongthsüpuh Davidnü Solomon kiulongthsürü kamshihdo;

⁴⁴ kiulongthsüpuhnü api lung amükeambuh Zadok, wukihbuh Nathan, Jehoiada tsührü Benaia, tüsho Kerethrü le Pelethrü yüshihdo; tüsho arünü api kiulongthsüpuh khoranunu kheak binshih;

⁴⁵ amükeambuh Zadok tüsho wukihbuh Nathan anenü api kiulongthsürü thsüpü Gihon ching mujudemokhitdo; tüsho ju chingnü arübo asühachihde wutudo, jumonü kiuto ju alanajikhi ching lah.

⁴⁶ Kheaküa Solomon kiulongthsü-binkiu kheak binlah.

⁴⁷ Kheaküshe kiulongthsüpuh yamlarübonü isa tungpuh kiulongthsüpuh David ki makshe jihpü arübah tha, ‘ Thrünpuhnü nü kheaknü Solomon alü mungthushang, tüsho nü kiulongthsü-binkiu kheaknü api kiulongthsü-binkiu atobe kamshang.’ Kiulongthsüpuhnü yapkiu kheak mükhümde kingaün

⁴⁸ tüsho ha ruk tamkhüntamnü, ‘ Khihni I kiulongthsü-binkiu kheak binpü thsüde I tsührü bolung khülang jihkhi tüsho ju ngüpü I ki mülüjihbuh Israel Thrünpuh Atungpuh shiang.’”

⁴⁹ Judüki Adonija hanrübo alala ajande wusurü tüsho arü limro ching tsoabah.

⁵⁰ Adonijanü Solomon trede wusubah kingaün sadam juhbo kheak ramlopü yü.

⁵¹ Solomon ki tha, “Adonijanü kiulongthsüpuh Solomon trelah; kheahang, apinü kingaün sadam juhbo kheak ramlobah thachoh, ‘ Kiulongthsüpuh Solomonnü api yamlarü nukshangnü mülaksahpü akhuhde I kheak thiyuchihchimshang.’”

⁵² Jumonü Solomonnü alo, “Apinü athülünkhi mihtsürü khülang ah de mütsansho, akuyü khülang she alo kheak mayokhi; tüshe api kheak mihbukmuyuk ngükhitsho, api ashebah.”

⁵³ Judüki kiulongthsüpuh Solomonnü api kingaün sadam kheaknü bedakipü thiyi. Apinü akin jihde kiulongthsüpuh kilim arü; tüsho Solomonnü api ki tha, “Thüyam lim yüang.”