1 JOHAN 2 - AMÜSÜH HÜM CL Bible (BSI)

Khrista Isa Rungrü

¹ I tsührübo, nüsanü neak müyihbeakpü thsüde inü nüsa kilim thrütchoh; tüshe khürünü neak yihbeaksho, isa thsung thsüde mushujihrü thiyuro-lungkirü Jisu Khrista Abuh lung lah;

² api ju isa neak dünthsükhikhi lah, tüsho isa thsungkheak lang yung tüshe alomiküp athrünkhi thsungkheak ah.

³ Tüsho isanü api yuzüngbo zosho isanü api mükheahpü ha hode amütsanbah.

⁴ Shepünü “Inü api mükheahlah” de thabah api yuzüngbo maninü akeangyu tharü ah, tüsho thiyuro api kheak müla;

⁵ tüshe shepünü api yu zochonü, thiyuronü Thrünpuh muzhokhi banthsangde lah, ha hode isa api lung lah de amütsanbah:

⁶ Shepünü anihbuh api lung lah de thachonü apinü atsahkhi limro ching anihbuhnü atsahbeah.

Thiyuzüng Aso

⁷ Amuzho müyamrübo, inü nüsa kilim thiyuzüng aso tümü müthrüt, tüshe atankih chingnü nüsa lakhi awün yuzüng ah; awün yuzüng ju nüsanü asokhi lah.

⁸ Tütüshe api tüsho nüsa kheak thiyuro lakhi thiyuzüng aso inü nüsa kilim thrütchoh, tümütüsho amiting hode tsochoh tüsho thiyuro ayin kamruhroro tahde lah.

⁹ Shepünü api ayin ching lah de thabah keoniorü thraneanchonü kheakü khiungde amiting ching lah.

¹⁰ Shepünü nihbuh keoniorü muzhochonü ayin ching lah, tüsho ju ching jing mükheshihbe müla.

¹¹ Tüshe shepünü nihbuh keoniorü thraneanchonü amiting ching lah tüsho amiting ching tsahchoh, tüsho küching yüchonü apinü mümükheah, tümütüsho amitingnü api mükbo tukshihdo.

¹² I tsührübo, inü nüsa kilim thrütchoh, tümütüsho api thsülimnü nüsa neakbo bahjihdo.

¹³ Buhrübo, inü nüsa kilim thrütchoh, tümütüsho shepü atankih chingnü alakheanü nüsanü api mükheahlah. Athrününgtsüngbo, inü nüsa kilim thrütchoh, tümütüsho nüsanü amütsübe chingnü tsokhitdo. Azürübo, inü nüsa kilim thrütchoh, tümütüsho nüsanü Abuh mükheahlah.

¹⁴ Buhrübo, inü nüsa kilim thrütchoh, tümütüsho shepü atankih chingnü alakheanü nüsanü mükheahlah. Athrününgtsüngbo, inü nüsa kilim thrütchoh, tümütüsho nüsa sühmüh lah, tüsho Thrünpuh yu nüsa kheak lah, tüsho nüsanü amütsübe chingnü tsokhitdo.

¹⁵ Alomi yungsho alomi ching lakhi kukrukbo dümuzho. Khürünü alomi muzhosho, Abuh muzhokhi api kheak müla.

¹⁶ Tümüde alomi ching lakhi alala, shihnü akünkhi, müknü amürühkhi tüsho lülüshishi rhangdung ju Abuh yo yung tüshe alomi yo ah.

¹⁷ Tüsho alomi le junü akünkhi hode tsoabahchoh; tüshe shepünü Thrünpuh lümkhi rhimochonü lünnü lah.

Khrista Riri

¹⁸ Azürübo, ha akheam kim ah; Khrista azhihrü arüchoh de nüsanü asokhi nangde kheakü Khrista azhihrü ahihkhüh arüdo; jumonü ha akheam kim ah de isanü mükheahlah.

¹⁹ Arü isa kheaknü awukhiukkheah, tüshe arü a isa lung mübe; tümüde arü isa lung bekhülaa, arünü isa lung mutuklode alabah; tüshe arü alala isa lung mübe de amütsanpü arü wukhiukdo.

²⁰ Tüshe Amüsühbuh Khülangnü nüsa mujude-müsühkhit, tüsho nüsa alalanü mükheahlah.

²¹ Nüsanü thiyuro mümükheahkhinü yung, tüshe nüsanü ju mükheahkhinü tüsho akeangyu ju thiyuro yo yung de amükheahmonü inü nüsa kilim thrütchoh.

²² Shepü akeangyu tharü a? Jisu ju Khrista yung de atharü mihtsürü ah. Shepünü Abuh tüsho atsührü bahyukchonü, ju Khrista azhihrü ah.

²³ Shepünü atsührü bahyukchonü Abuh she bahyukchoh. Shepünü atsührü leangkhichonü Abuh she leangkhichoh.

²⁴ Atankih chingnü nüsanü tümü sodünü nüsa kheak lashang. Nüsanü atankih chingnü asokhi nüsa kheak lasho, nüsanü atsührü tüsho Abuh kheak labah.

²⁵ Tüsho ha lün rhangdung apinü isa ki alokhikhi lah.

²⁶ Sherünü nüsa mülapyukpü lanü ju dünkheak inü nüsa ki thrütchoh;

²⁷ tüshe nüsanü api kilimnü leangkhikhi mujude-müsühkhitkhi nüsa kheak lah, tüsho khürünü nüsa thsangyupü yihnüpü müla; apinü mujude-müsühkhitkhinü lüpdükhi dünkheak nüsa ki thsangyuchoh, tüsho ju thiyuro ah, tüsho akeangyu yung, nüsa ki thsangyukhi nangde api kheak laang.

²⁸ Tüsho kheakü azürübo, api kheak laang, junangde api amikheak akhiukchoki isa mulongram labah tüsho api arüchoki api miki achih müngü.

²⁹ Api thiyuro-lungki ah de nüsanü mükheahsho, alungki rhimorü aban api tsührü ah de nüsanü amütsanbah.