1 JOHAN 1 - AMÜSÜH HÜM CL Bible (BSI)

Rhangdung Yu

¹ Atankih chingnü alakhi, isanü asokhi, isa müknü angükhi, isanü kheahbah isa khahbonü aqiukhi rhangdung yu dünkheak–

² rhangdung ju amikheak akhiukshih tüsho isanü ju ngü, ju thiyumütsan thsü, tüsho Abuh lung lakhi lün rhangdung tüsho isa ki amikheak akhiukkhi nüsa ki zhiyuk–

³ nüsanü isa lung arihakode alapü thsüde isanü angükhi tüsho asokhi nüsa ki she zhiyuk; tüsho isa arihako ju Abuh tüsho atsührü Jisu Khrista kheak lah.

⁴ Tüsho isa asühkhi khiukdahde alapü thsüde isanü ha thrütchoh.

Thrünpuh Ju Ayin

⁵ Thrünpuh ju ayin tüsho api kheak amiting tümü mülade api kilimnü isanü asokhi thiyusheak ha lah tüsho isanü nüsa ki zhiyukchoh.

⁶ Isa amiting ching tsahde labah isa api lung arihako lah de isanü thasho, isanü akeangyu thachoh tüsho thiyuro yande müla;

⁷ tüshe api ayin ching lakhi nangde isanü ayin ching tsahsho, isanü khülangnü khülang ki arihako lah, tüsho api tsührü Jisu thiyihnü neak alala chingnü isa müsühjihchoh.

⁸ Isa neak müla de isanü thasho, isanü küdah thsüde mülapyukchoh, tüsho isa kheak thiyuro müla.

⁹ Isanü isa neakbo thakhitsho, api ju thiyuro tüsho alungki lah, tüsho apinü isa neakbo bahjihde thiyuro-mülungkikhi alala chingnü isa müsühjihbah.

¹⁰ Isanü neak müyihbeak de isanü thasho, isanü api ju akeangyu tharü kamshihchoh, tüsho api yu isa kheak müla.