Yohannis 1 - Gaddo Teyya

Yohannis Tichina Ha'oni Kaani Kaama

¹ Zeemmaneen kaam feer. Bar dey Ha'ooskitu fe; Kaamiis dey Ha'o;

² Bar dey zeemme Ha'oosneentu fe.

³ Zuuttambaase bariktu teste; teste wuzaas zuuttera barki kamotu teste; isa wuzane barneen gerakalo tester aafa.

⁴ Kaa barki faar; es kaas dey asunik chaarefa sinna faar.

⁵ Chaarefaas talmaassi chaarsir; talmaas baron aane merowa.

⁶ Ha'ooskin wostere ye sumba Yohannis yiste isa asu feer.

⁷ Zuuttambesiise barki kamo amanosonek bar chaarefaasi chowanon zaala makonaktu ye.

⁸ Chaarefaasi chowanon zaala makonaktu yeeteno bar chaarefte.

⁹ Asu zuuttambaase asik chaarsuni futoni chaarefa han daasta yaadifar.

¹⁰ Han daasta feer; han daas bariktu teste; sinfanaknu han daas aane ephphatowa.

¹¹ Basa keen sina baassoki ye; sinuntano baasso barin aane ephphetoosoto.

¹² Sinuntano ephpheteesere sunbaasik amanefe baasso zuuttere Ha'oni naanggota sinonek mabti imi.

¹³ Baasso Ha'oni naanggota sinetees asuni tumak wedey hannakin wedey ashakin wedey teegoni fiqadik aane koontosoto. Baasso koontesetees Ha'okingwa.

¹⁴ Kaamiis asha sinne inno ganeyaassi ha'i. Inno dey Ababaaski feena kabaasik fa ulfinbaasne fa isa naa bar basa ulfinaason biini. Bar dey [Ha'oni otumaknawa futokna tuum].

¹⁵ Yohannis basa chowaason zaala maket: « ‹Ta orfoosta yooni bar taneen sinak feer. Tayistan dey denalo› yira makenaas barwa» yire chaagi.

¹⁶ Basa tumaastan inno zuuttamniise otmaasta otma daysira ephphataani.

¹⁷ Tumaas Museniki kamo imte. Sinuntano otumnewa futone Yesus Kiristoosniki kamo ya.

¹⁸ Ha'ooson biyar oonu aafe. Sinuntano abani sina Ha'oosneen fe isa naas bar bar Ha'oos oo sinnamato innok ammanon besi.

Haphqife Yohannis Makena Zaala

¹⁹ Ayhudni meeni ha'sinynyani meya Yerusalemun maagni meenawa baassotin argassefe Lewini meena asin Yohannisniki wosisere: «Ne oonso?» yire mamussisete kabaasik makena zaalni kaamaas haniiswa.

²⁰ Bar dey aachunoy: «Yoonir yiste muudtos tatewa» yire ammanon make.

²¹ Baasso dey: «Eekin ne oonso? Eliyasnoso?» yire mamussete. Bar dey: «Indaanewa» yire wolgi. Baasso dey: «Eekin raajjunoso?» yisete. Bar dey: «Indaanewa» yire wolgi.

²² Baasso dey: «Eekin ne oonso? Innotin wosi baassok hamma makonik ne teetaason oo yifasso?» yisete.

²³ Bar: «Raajju Isayyasniissi maktenaasimato ‹Daamiisa ugnanon zeep'ti› yire ichma daassi chaagfe asusa kaamatawa» yi.

²⁴ Baasso wostere yeesetees Ferisawini meyakin.

²⁵ Baasso dey Yohannisnin: «Ese ne Kiristoos wedey Eeliyas wedey yoonir yiste raajjuus sina shakaatane awuniron haphqidifa?» yisere mamussete.

²⁶ Yohannis wolgire: «Ta akaktu haphquna. Sinuntano nitto arunoytir ganentiissi yereferwa.

²⁷ Ta orfoosta yooni basa chaa'maasi taar'anon kotak sholsunoynar barwa.»

²⁸ Han bar zuuttera sinnaas Yohannis haphqit feena Yordanosni akaasi yesalo awa kesnarki fa Bitaniyaktu sini.

Ha'oni Fantu

²⁹ Wonotirik Yesus Yohannisniki yeefeen biyaat ekka yi: «Ese han daasta fe asusa boor'anon baassostan tishkuni Ha'oni fantu

³⁰ ‹Ta orfoosta yooni bar taneen sinak feer. Tayistan dey denalo› yira makenaas barwa.

³¹ Tanu es yooni barin aane arifatwa. Sinuntano ta akak haphqit yaanaas Israelni meyak barin arsonekwa.»

³² Yohannis ekka yire zaala make: «Korto Ayyana saman nakalone faar sinna basaasta kerefeen biin.

³³ Akak haphqunak taan wosi bar: ‹Korto Ayyana kerefeennawa basaasta diifeenna biyata bartu Korto Ayyanak haphquniiswa› yira makena kabaneen tanu aane arutwa.

³⁴ Ta dey biina boor'a bar Ha'oni naa sinbaason zaala makefan.»

Tesuni Yesusni Nawoosakito

³⁵ Wonotirik Yohannis hep nawobaasneen esta yerefer.

³⁶ Yesus estak aatfeen Yohannis biyaat: «Ese haniis Ha'oosi fantuwa» yi.

³⁷ Hep Yohannisni nawoosakito Yohannis es baron makefeen odesefaat Yesusni orfoose hamete.

³⁸ Baasso Yesusni orfoose hamefeen yerqere biyaat «Awu sholedifetirinso?» yi. Baasso dey: «Rebi! Ayinso faafatari?» yisete. (Rebi! Uus assinynya uu.)

³⁹ Bar dey: «Yaara biitiwa» yi. Hamere feefenamato biyere Es wono ane feeshete. Es kabaasik dey wonni asir sa'ati sinana.

⁴⁰ Yohannis makena kaamaason odere barneen ane hame nawoosasin isa Simon Phexirosni ay sina Andriyas feer.

⁴¹ Bar zeemme ayba Simooniki hamme: «Mesiisin danniwa» yi. Mesi uus muudto uu.

⁴² Yesusniki dey ephphe ye. Yesus barin biire: «Ne Yona'ani Simoonwa, ne hawungneen ekalo ‹Keefa› yisteratu teegtotawa» yi. Kotbaas dey «Phexiros wedey Inya shu'a» uwa.

Yesus Filiphosninnawa Naatinaelninna Teege

⁴³ Wonotirik Yesus Galiila hamanak shole. Filiphosnin dey danne: «Taneen ane hamniwa» yi.

⁴⁴ Filiphoos dey Andriyasnawa Phexirosna asimato Betesayidaki katamaassitu feesefe.

⁴⁵ Filiphoos Naatinaelnin danne: «Museni tumaassinawa raajjuni meya basa chowbaason tichisete barin daningwa. Esiis dey Yosefni naa Naaziretki Yesuswa» yi.

⁴⁶ Naatinael dey: «Naaziretun ma'a wuza kesak chimniroso?» yi. Filiphoos: «Yaara biwa» yi.

⁴⁷ Yesus dey Naatinael hang barki yeefeen biyaat: «Futoni Israelni asu hanifewa» yi.

⁴⁸ Naatinael dey: «Taan ayik arifasso?» yit mamsi. Yesus wolgire: «Filiphoos teegonoyfeen Belesini i'oosi diisi diifen biingwa» yi.

⁴⁹ Naatinael wolgire: «Assinynyano! Ne Ha'oni naawa. Ne Israelni taatowa» yi.

⁵⁰ Yesus wolgire: « ‹Belesini i'oosi diisi diifen biingwa› yina boor'anoso amanetari? Haniistan denalo wuzanu biyatarwa.

⁵¹ Futok nittok makefawungwa; Samaas gachchefaan Ha'oosi wosiya daa Asuni Naaski kerefeennawa kesfeenna biyatiwa» yi.