ዮሀኒስኒ ራእ 15 - Gaddo Teyya

Koi'ni Bettoosikitonon Epho Ha'oni Wosiya

¹ Ooma akama dey diinqi beso samaastak biin; Ha'oosi gi'a ko'unak zaguni koi'ni naafun bettooson epho Ha'oni wosiya naafunon biin.

² Esseen orfo geya woi'to burchuqone fa baari biin. Esiisimato gonyoosonnawa gonyoosi suuranonna; dey sunbaasi faadanon neebere mere baassotin biin; Ha'oos baassok imna kaamaason ephaat burchuqone fa baarisi tesha yersefeer.

³ Ha'oosi wostinynya sina Museni gaamaasonnawa fantuusa gaamanonna: «Zuuttambaase asin chimfa Daama Ha'oose! Wostonees akama dey diinqiwe; Darani meeni taatono! Ugunnees likki dey futo;

⁴ Daamiiso! Neen digonor; sunneeson dey ulfinsunor oonso? Ne netu kortowa; futoni mangsuni kar'nees ammanon kessa bestena boor'a; daraas zuuttere yeere neeki sina sagadosonewa» yit gaamet feeseter.

⁵ Esseen orfo dey biin; zaalni durkani sina betemeqdesiis den samak gachche.

⁶ Naafun bettooson epho Ha'oosi naafun wosiyanikito betemeqdesiissin kesi; kayma foro palpalu laylonini maama mayo. Nibbesiison dey warqeni talfak taar'era feeseter.

⁷ Acheech kaabarere wuzaasikitosin isaas Ha'oni naafun wosiyaasikitok koi'baneen koi'ba foontonon kar'a fooni Ha'oosi gi'a tuumma faana naafun warqeni toofooson imi.

⁸ Betemeqdesiis dey Ha'oosi ulfinatannawa hugnatanna kabi chowa chuwak tuumi. Ha'oosi naafun wosiyanikito ephena naafun bettoosikito ko'unanneen oonu betemeqdesiissi girunak aane chime.