Ibrawiyan 8 - Gaddo Teyya

Yesus Gaddo Teyyaasi Maagni Gaannye Meeni Gaanynya Sinnamato

¹ Ese wolloni wuzaasikitosin arkiis haniiswa: Samak zuuttambaase asiistan denalo sina Ha'oosi zigimuni hoi'ta teshaasta di effetena maagni gaanynye meeni gaanynyani innok feerwa.

² Bar wostet feenaas futoni durkani sina Meqdesiissiwa. Es durkaniis toktenaas asuni kushuk sinnoynaron Daamiisikwa

³ Maagni gaanynye meeni gaanynya isarba isarbaasik taattefenaas mabanewa maa'ane asin imanakwa. Es bari boor'a es maagiis dey imana isa wuzba foonak sholsuwa.

⁴ Tumaasimato Mabaason imefe maagni meya feeseter sinna boor'a bar han daastakir sini sinfaanane maag sinana kabatawa.

⁵ Han maagni meya wostesefe durkaniis samak fa bari besonewa yirarane asik koi'bawa. Es bar dey sinnaas Muse durkaniison wostefena kabaasik Ha'oos: «Aamaastak ammanon neek besinaasne faaron zuuttambaase mai'sira oodda zaguwa» yira ajajenaasimatowa.

⁶ Sinuntano hash Yesus ganenir dey isar zagina teyyaas kur'u teyyaastan denalo sina abdiista yerer sinnamato barik imte wostoos dey arkirwa.

⁷ Zeemmati teyyaas zinaba foonto sinna beste sinfaanane hepsani teyyaas sholsuna kabatawa.

⁸ Ha'oos darabaasata zina foobaason besuk ekka yifawa: «Ese Israelni daraasneennawa Yuudani daraasneenna; gaddo teyyani kaama; Giruna wona yoonawa» yifewa Daamiis.

⁹ «Es teyyaas dey kushubesiison ephpha Giphtsini meeni daastan; baassotin kisifana kabaasik; baasso abaasneen girina teyyaasne faartawa. Baasso ta teyyani kaamaasik aane yerosoto sinna boor'a; ta dey kashshingwa» yifewa Daamiis.

¹⁰ «Ese han wonaasneen orfo; Israelni daraasneen ane; giruna teyyani kaamaas haniiswa; yifewa Daamiis; ta tumnaason baasso; kanuussi foonak zaguna; nibbesiissi dey tichuna. Ta dey baassok Ha'obesi sinana; baasso dey ta dara sinone.

¹¹ ‹Daamiisin aruwa› yire wolkobaasin sinun; aybaasin assunir oonu aafa foona wuza; garosatan kabira hamma; arkiisata kar'ana kabaneen; zuuttere taan arsone.

¹² Mangsubesiison feeshun una; boor'besiison dey; aafa wolla yaadatona wuza.»

¹³ Ese: «Gaddo teyyani kaama» yifana kabaasik sinati teyyani kaamaason kur'u zagiwa uwa. Es bari boor'a kur'i barewa kur'u wuza zuuttambaase tishuna wonaas tai'sewa.