Ibrawiyan 1 - Gaddo Teyya

Ha'oos Nawubaaski Kamo Make

¹ Ha'oos zeemoti neyaassi showo ugnak; raajjuni meyaki kamo inno abani meyak showo kaba maket faar.

² Sinuntano hash orfoti neyaassi zuuttambaase asin warasonir zagina nawubaaski kamo innok make. Han daason dey zuuttambaase asin tesinaas barikwa.

³ Bar Ha'oosi ulfinanon palpalgire besir. Bar haalabaasik Ha'oosneen ane mai'sire isarwa. Kaambaasi hugnak han daason zuutire teebbe ephiwa. Asuni meyanon dey boor'besiissin kayimsinanneen orfo samak hugnaba faana Ha'oosi ho'itta di.

⁴ Barik imte sunaas Ha'oosi wosiyani suntan denalo sinnamato Ha'oosi Naa Ha'oosi wosiyatan akamanon denalowa.

Ha'oosi Naa Ha'oosi Wosiyatan Akamanon Denalo

⁵ Ha'oos bari wosiyaasi ganeyasin: «Ne Naatawa; hawung neen koonin» hepsa dey: «Ta barik aba sinana; bar dey taak Naata sinana» yinaas oonininso?

⁶ Ha'oos uuzza Nawubaasin han daasta wosifana kabaasik; «Ha'oosi wosiya zuuttera; barik sagadona» yifawa.

⁷ Sinuntano Ha'oosi wosiyani chowaasik; dey: «Ha'oosi wosiyanikitonon Ayyananikito; Ha'oosik wostesefe baassotin; dey geeni winonikito zagunir» yifawa.

⁸ Sinuntano Naasa chowak; «Ha'oose; zigimunees koi'ba foontonon foonir; taatonees dey ookoni haaro.

⁹ Ookooson shunit; manguuson dey oomtet; es bari boor'a Daama Ha'onees; omoneesatan denalonon gira; imfa muudak neen muudi» yifa.

¹⁰ Esiisimato dey: «Daamiiso! Ne zeemma daason tesitwa; samaasikito dey kushuneesi wostowa.

¹¹ Es barikito zuuttera tishunir; sinuntano ne footar; zuuttambaase maamnimato kur'una.

¹² Maamnimato zagira biruta; barikito dey maamnimato sinna sooltona; sinuntano ne aagene aagene sinfanak; ne; neneesik koi'ba aafa» yifa.

¹³ Ha'oos bari wosiyaasikitoni ganeyasin: «Gumaneesakitonin wochoneesi; sikalosi zaguna kabaneen; ta hoi'ta teshaasta duwa» yinaas oonininso?

¹⁴ Eekan Ha'oosi wosiya zuuttera faruni asuni meyak wostonak wostera ya Ha'oni wostinynya sina Ayyananikitotanoso?