ዮሀኒስኒ ራእ 15 - ጋዶ ቴያ

ኮእኒ ቤቶሲክቶኖን ኤጶ ሀኦኒ ዎሲያ

¹ ኦማ አካማ ደይ ዲንቂ ቤሶ ሳማስታክ ቢን፤ ሀኦሲ ግእአ ኮኡናክ ዛጉኒ ኮእኒ ናፉን ቤቶሶን ኤጶ ሀኦኒ ዎሲያ ናፉኖን ቢን።

² ኤሴን ኦርፎ ጌያ ዎእቶ ቡርጩቆነ ፋ ባሃሪ ቢን። ኤሲስማቶ ጎኞሶንናዋ ጎኞሲ ሱራኖንና፤ ደይ ሱንባሲ ፋዳኖን ኔቤሬ ሜሬ ባሶትን ቢን፤ ሀኦስ ባሶክ እምና ካማሶን ኤጳት ቡርጩቆነ ፋ ባሃሪሲ ቴሻ የርሴፌር።

³ ሀኦሲ ዎስትኛ ስና ሙሴኒ ጋማሶንናዋ ፋንቱሳ ጋማኖንና፦ «ዙታምባሴ አሲን ችምፋ ዳማ ሀኦሴ! ዎስቶኔስ አካማ ደይ ዲንቂዌ፤ ዳራኒ ሜኒ ታቶኖ! ኡጉኔስ ልኪ ደይ ፉቶዋ፤

⁴ ዳሚሶ! ኔን ድጎኖር፤ ሱንኔሶን ደይ ኡልፍንሱኖር ኦንሶ? ነ ነቱ ኮርቶዋ፤ ፉቶኒ ማጝሱኒ ካርኔስ አምማኖን ኬስሳ ቤስቴና ቦርአ፤ ዳራስ ዙቴሬ ዬሬ ኔኪ ስና ሳጋዶሶነዋ» ይት ጋሜት ፌሴቴር።

⁵ ኤሴን ኦርፎ ደይ ቢን፤ ዛልኒ ዱርካኒ ስና ቤቴሜቅደሲስ ደን ሳማክ ጋችቼ።

⁶ ናፉን ቤቶሶን ኤጶ ሀኦሲ ናፉን ዎሲያኒክቶ ቤቴሜቅደሲሲን ኬሲ፤ ካይማ ፎሮ ፓልፓሉ ላይሎንኒ ማማ ማዮ። ንቤሲሶን ደይ ዋርቄኒ ታልፋክ ታርኤራ ፌሴቴር።

⁷ አቼች ካባሬሬ ዉዛሲክቶስን እሳይስ ሀኦኒ ናፉን ዎሲያሲክቶክ ኮእባኔን ኮእባ ፎንቶኖን ካርአ ፎኒ ሀኦሲ ግእአ ቱምማ ፋና ናፉን ዋርቄኒ ቶፎሶን እሚ።

⁸ ቤቴሜቅደሲስ ደይ ሀኦሲ ኡልፍናታንናዋ ሁግናታንና ካብ ቾዋ ቹዋክ ቱሚ። ሀኦሲ ናፉን ዎሲያኒክቶ ኤጴና ናፉን ቤቶሲክቶ ኮኡናኔን ኦኑ ቤቴሜቅደሲሲ ግሩናክ ኣነ ችሜ።