Ibrawiyan 1 - ጋዶ ቴያ

ሀኦስ ናዉባስኪ ካሞ ማኬ

¹ ሀኦስ ዜሞቲ ነያሲ ሾዎ ኡግናክ፤ ራጁኒ ሜያኪ ካሞ እንኖ አባኒ ሜያክ ሾዎ ካባ ማኬት ፋር።

² ስኑንታኖ ሀሽ ኦርፎቲ ነያሲ ዙታምባሴ አሲን ዋራሶኒር ዛግና ናዉባሲኪ ካሞ እኖክ ማኬ። ሀን ዳሶን ደይ ዙታምባሴ አሲን ቴሲናስ ባሪክዋ።

³ ባር ሀኦሲ ኡልፍናኖን ፓልፓልግሬ ቤሲር። ባር ሃላባሲክ ሀኦስኔን አነ ማእስሬ እሳርዋ። ካምባሲ ሁግናክ ሀን ዳሶን ዙትሬ ቴቤ ኤጲዋ፥ አሱኒ ሜያኖን ደይ ቦርቤሲስን ካይምስንናኔን ኦርፎ ሳማኪ ሁግናባ ፋና ሀኦሲ ሆእታ ዲ።

⁴ ባሪክ እምቴ ሱናስ ሀኦሲ ዎስያኒ ሱንታን ደናሎ ስንናማቶ ሀኦሲ ና ሀኦሲ ዎሲያታን አካማኖን ደናሎዋ።

ሀኦሲ ና ሀኦሲ ዎሲያታን አካማኖን ደናሎ

⁵ ሀኦሲ ባሪ ዎሲያሲ ጋነያስን፦ «ነ ናታዋ፤ ሀውጙ ኔን ኮኒን» ሄፕሳ ደይ፦ «ታ ባሪክ አባ ስናና፤ ባር ደይ ታክ ናታ ስናና» ይናስ ኦንኒንሶ?

⁶ ሀኦስ ኡዛ ናዉባስን፤ ሀን ዳስታክ ዎሲፋና ካባሲክ፤ «ሀኦሲ ዎሲያ ዙቴራ፤ ባሪክ ሳጋዶና» ይፋዋ።

⁷ ስኑንታኖ ሀኦሲ ዎስያኒ ቾዋሲክ፤ ደይ፦ «ሀኦስ ዎሲያኒክቶኖን አያናኒክቶ፤ ሀኦሲክ ዎስቴሴፌ ባሶትን፤ ደይ ጌኒ ውኖኒክቶ ዛጉኒር» ይፋዋ።

⁸ ስኑንታኖ ናሳ ቾዋክ፤ «ሀኦሴ፤ ዝግሞኔስ ኮእባ ፎንቶኖን ፎኒር፤ ታቶኔስ ደይ ኦኮኒ ሃሮ።

⁹ ኦኮሶን ሹኒት፤ ማንጉሶን ደይ ኦምቴት፤ ኤስ ባሪ ቦርኣ ዳማ ሀኦኔስ፤ ዞሞኔሳታን ደናሎኖን ግራ፤ ሙዳክ ኔን ሙድ» ይፋ።

¹⁰ ኤሲስማቶ ደይ፦ «ዳሚሶ! ነ ዜምማ ዳሶን ቴሲትዋ፤ ሳማሲክቶ ደይ ኩሹኔሲ ዎስቶዋ።

¹¹ ኤስ ባርኪቶ ዙቴራ ትሹኒር፤ ስኑንታኖ ነ ፎታር፤ ዙታምባሴ ማምኒማቶ ኩርኡና።

¹² ማምኒማቶ ደይ ዛግራ ብሩታ፤ ባርኪቶ ደይ ማምኒማቶ ስንና ሶልቶና፤ ስኑንታኖ ነ ኣጌነ ኣጌነ ስንፋናክ፤ ነ ነኔሲክ ኮእባ ኣፋ» ይፋ።

¹³ ሀኦስ ባሪ ዎስያሲክቶኒ ጋነያስን፦ «ጉማኔሳክቶኒን ዎቾኔሲ፤ ስካሎሲ ዛጉና ካባኔን፤ ታ ሆእታ ቴሻስታ ዱዋ» ይናስ ኦንኒንሶ?

¹⁴ ኤካን ሀኦሲ ዎሲያ ዙቴራ ፋሩኒ አሱኒ ሜያክ ዎስቶናክ ዎስቴራ ያ ሀኦኒ ዎስትኛ ስና አያናኒክቶታኖሶ?