1 ቴሴሎንቄ 1 - ጋዶ ቴያ

¹ አባ ሀኦሶንናዋ ዳም የሱስ ክርስቶስኒንና አማነሬ ቴሴሎንቄኪ ቤቴክርስታኒስ ፌሴ አማኝኒ ሜያክ ጳዉሎስኒኪን፥ ስላስኒክንናዋ ጢሞትዮስኒክንና ዎስቴ ዎስያ። ሀኦሲ ኦቱምነዋ ናጋነ ንቶክ ስንፋውጝዋ።

ቴሴሎንቄኪ አሱኒ ሜኒ አማንቶሲክ ማክቴ ጋላታ

² እንኖ ዎንና ዎንና ሺጶኒሲክ ንቶትን ያዳቴፋፋ ሀኦሶን ጋላቴት ፋኒር።

³ ሀኦኒሲ ስናክናዋ አባኒሳ ስናክና አማንቶኒትስ ዎስቴፋና ዎስቶስ፤ ኬሽታናክ ዛግሴፌት ባሬዋ ዳምኒ የሱስ ክርስቶስኒስታ ፋ ንቶ አብዲሶን ፋኪያክ ኦደት ፎንትሲክ ዎንና ዎንና ያዳቴት ፋኒርዋ።

⁴ ሀኦሲክ ሹንቶ አይኒ ሜያነ! ሀኦስ ንቶትን ኮሪናማቶ እንኖ አርፌኒዋ።

⁵ እንኖ ምስራቹኒ ካማሶን ንቶክ ማኬኒስ ዎል ላ ዎል ላክ ስኖይናሮን ሁግናክናዋ ኮርቶ አያናክና ደይ ምስራቹኒ ካማሲ ቾዋ ፉቶ ስንባሶን ማእስሬ አሩክዋ። ንቶኔን አነ ፋኒ ካባሲክ ንቶክዋ እያት ኣካክ ፋኒማቶ ንቶ አርሴድፌትዋ።

⁶ ሾዎ ሻና ንቶስታ ካርፋናክኑ ኮርቶ አያናስኪን ቤስቴ ግራሲኪ ካሞ ካምባሶን ኤጳ ታራ እኖትንናዋ ዳም የሱስ ክርስቶስኒ ኡግናሲክና ዞኑስቴር ስነትዋ።

⁷ ኤስ ባሪ ቦርኣ ሜቀዶንያክናዋ አኪያክና ፌሴ አማኝኒ ሜያ ዙታምቤሲሴ አሲክ ማአ ቤሶ ስነትዋ።

⁸ ዳሚሳ ካማ ንቶኪን ኬሳ ኦድቴናስ ሜቀዶንያክናዋ አኪያክና ኮእባ ስኖይናሮን ሀኦስታ ፋ ንቶ አማንቶስ ዳ ዙታምባሴ አሲስ አሪቴራ ፋርዋ። ኤስ ባሪ ቦርኣ ሀን ቾዋሲክ እንኖ እሳ ዉዛነ ማኮኒክ ኣነ ሾልሲፋዋ።

⁹ ንቶኪ ያፌኒ ካባሲክ እኖትን ኣካክ ኤጳ ታሴትማቶ፤ ሀየዋ ደይ ፉቶ ስና ሀኦሲክ ዎስቶክ ኮልኦኒ ሺጶስን ኦር ኬስሳ ሀኦስኪ ኣካክ ዎልሴትማቶ ኤስ አሱኒ ሜያ ቴትቤሲሲክ ዛላ ስኖነዋ።

¹⁰ ኤሲስማቶ ሀኦስ ክቱን ካብግና ባሪን ዮኒ ግአሲን እኖትን ፉኦኒ ናዉባ የሱስ ክርስቶስኒ ሳማን ዮሶን ኦደት ፋኒርዋ።