1 ዮሀኒስ 1 - ጋዶ ቴያ

ካኒ ካማ

¹ ዜምማኔን ፋ ካኒ ቾዋሲ ካማኖንቱ ንቶክ ትችፌኒዋ፤ ኤስ ካኒ ካማስ ደይ ኦደኒ ባሬዋ ኣፍኒሲክ ቢኒ ባሬ፤ ደይ ጋዝግራ ቢኒ ባሬዋ ኩሹኒሲክ ደይ ታእራ ቢኒ ባሬዋ።

² ኤስ ካስ ደይ አምማኖን ኬስሳ ቤስቴዋ፤ እንኖ ደይ ቢኒ፤ ቢኒ ባሮንቱ ደይ ዛላ ማኮኒዋ። አባስኪክ ፋ ባሮንናዋ እኖክ ደይ አምማኖን ኬስሳ ቤስቴ ባሮንና ኮእባ ፎንቶ ካሶንቱ ንቶክ ማኬፌኒዋ።

³ እኖኔን አነ እሳርኒት ፎናክ ቢኒ ባሮንናዋ ኦደኒ ባሮንናቱ ንቶክ ማኬፌኒዋ። እሳር ስንኒስ ደይ አባስኔንናዋ ና የሱስ ክርስቶስኔንናዋ።

⁴ ግራኒስ ቱማ ስናናክቱ ሀን ባሮን ንቶክ ትችፌኒዋ።

ሀኦስ ቻሬፋዋ

⁵ ባርኪን ኦደኒስ ደይ ንቶክ ማኬፌኒ ዎሲያስ፦ «ሀኦሲ ቻሬፋዋ፤ ታልማስ ደይ ባሪኪክ እሳንነ ኣፋዋ» ይፋርዋ።

⁶ ኤስ ባሪ ቦርኣ፦ «ሀኦስኔን አነ እሳርኒ ፋርዋ» ይፋት ታልማሲ ፋኒር ስንፋናነ እንኖ ኤሽኛዋ፤ ፉቶሲክ ደይ ኣነ ፋፌኒ ኡዋ።

⁷ ስኑንታኖ ባር ቻሬፋስሲ ፌናማቶ እንኖ ደይ ቻሬፋስሲ ፋፋኒነ እኖትና እኖትና ዎል እሳርኒ ፎናዋ። ደይ ናዉባ የሱስ ክርስቶስኒ ሀንናስ ቦርአ ዙታምባሴ አሲስን እኖትን ካይንኑናዋ።

⁸ እንኖ ቦርእኒ ኣፋዋ እያኒነ ቴትንሶንቱ ኤሽድፌኒዋ። ፉቶስ ደይ እኖስሲ ኣፋዋ።

⁹ ቦርኒሶን ሀኦሲክ ሀርምፋኒነ ባር አማናምቶ ደይ ኦኮ ስንና ቦርአ ቦርእኒሶን ዙታምባሴ አሲን ፌሹን ኡናዋ። ማጝሱኒ ዙታምባሴ አሲስን ደይ እኖትን ካይንኑናዋ።

¹⁰ ቦርአ ኣነ ዎስቶዌኒዋ እያንነ ሀኦሶን ኤሽኛ ዛግኒርዋ፤ ካምባስ ደይ እኖስሲ ኣፋዋ።