O. Daf 83 - Yoruba Bible

Adura Ìṣẹ́gun

¹ Ọlọrun, má dákẹ́; má wòran; Ọlọrun má dúró jẹ́ẹ́!

² Wò ó! Àwọn ọ̀tá rẹ ń ṣọ̀tẹ̀ sí ọ; àwọn tí ó kórìíra rẹ sì ń yájú sí ọ.

³ Wọ́n pète àrékérekè sí àwọn eniyan rẹ; wọ́n sì gbìmọ̀ pọ̀ sí àwọn tí ó sá di ọ́.

⁴ Wọ́n ní, “Ẹ wá, ẹ jẹ́ kí á pa orílẹ̀-èdè wọn run; kí á má ranti orúkọ Israẹli mọ́!”

⁵ Bẹ́ẹ̀ ni wọ́n jùmọ̀ pète pèrò; wọ́n dá majẹmu láti dojú kọ ọ́.

⁶ Àwọn ará Edomu, ati àwọn ọmọ Iṣimaeli, àwọn ará Moabu, ati àwọn ọmọ Hagiri,

⁷ àwọn ará Gebali, àwọn ọmọ Amoni, ati àwọn ọmọ Amaleki, àwọn ará Filistia ati àwọn tí ń gbé Tire.

⁸ Àwọn ará Asiria pàápàá ti dara pọ̀ mọ́ wọn; àwọn ni alátìlẹ́yìn àwọn ọmọ Lọti.

⁹ Ṣe wọ́n bí o ti ṣe àwọn ará Midiani, bí o ti ṣe Sisera ati Jabini ni odò Kiṣoni,

¹⁰ àwọn tí o parun ní Endori, tí wọ́n di ààtàn lórí ilẹ̀.

¹¹ Ṣe àwọn ọlọ́lá wọn bí o ti ṣe Orebu ati Seebu; ṣe àwọn ìjòyè wọn bí o ti ṣe Seba ati Salumuna,

¹² àwọn tí ó wí pé, “Ẹ jẹ́ kí á mú lára ilẹ̀ Ọlọrun kí á sọ ọ́ di tiwa.”

¹³ Ọlọrun mi, ṣe wọ́n bí ààjà tíí ṣe ewé, àní, bí afẹ́fẹ́ tíí ṣe fùlùfúlù.

¹⁴ Bí iná tíí jó igbó, àní, bí ọwọ́ iná sì ṣe ń jó òkè kanlẹ̀,

¹⁵ bẹ́ẹ̀ ni kí o fi ìjì rẹ lé wọn, kí o sì fi ààjà rẹ dẹ́rù bà wọ́n.

¹⁶ Da ìtìjú bò wọ́n, kí wọn lè máa wá ọ kiri, OLUWA.

¹⁷ Jẹ́ kí ojú tì wọ́n, kí ìdààmú dé bá wọn títí lae, kí wọn sì ṣègbé ninu ìtìjú.

¹⁸ Jẹ́ kí wọn mọ̀ pé ìwọ nìkan, tí orúkọ rẹ̀ ń jẹ́ OLUWA, ni Ọ̀gá Ògo lórí gbogbo ayé.