O. Daf 132 - Yoruba Bible

Majẹmu Ọlọrun pẹlu Ìdílé Dafidi

¹ OLUWA, ranti gbogbo ìyà tí Dafidi fara dà.

² Ranti bí ó ṣe búra fún OLUWA, tí ó sì jẹ́jẹ̀ẹ́ fún ìwọ Alágbára, Ọlọrun Jakọbu,

³ tí ó ní, “N kò ní wọ inú ilé mi, bẹ́ẹ̀ ni n kò ní bọ́ sí orí ibùsùn mi;

⁴ n kò ní sùn, bẹ́ẹ̀ ni n kò ní tòògbé,

⁵ títí tí n óo fi wá ààyè fún OLUWA, àní, tí n óo fi pèsè ibùgbé fún ìwọ Alágbára, Ọlọrun Jakọbu.”

⁶ A gbúròó rẹ̀ ní Efurata, a rí i ní oko Jearimu.

⁷ “Ẹ jẹ́ kí á lọ sí ibùgbé rẹ̀; ẹ jẹ́ kí á lọ wólẹ̀ níbi àpótí ìtìsẹ̀ rẹ̀.”

⁸ Dìde, OLUWA, lọ sí ibi ìsinmi rẹ, tìwọ ti àpótí agbára rẹ.

⁹ Jẹ́ kí àwọn alufaa rẹ wọ ẹ̀wù òdodo, kí àwọn eniyan mímọ́ rẹ sì máa kọrin ayọ̀.

¹⁰ Nítorí ti Dafidi, iranṣẹ rẹ, má jẹ́ kí ẹni tí a fi òróró rẹ yàn yíjú kúrò lára rẹ.

¹¹ OLUWA ti ṣe ìbúra tí ó dájú fún Dafidi, èyí tí kò ní yipada; ó ní, “Ọ̀kan ninu àwọn ọmọ rẹ ni n óo gbé ka orí ìtẹ́ rẹ.

¹² Bí àwọn ọmọ rẹ bá pa majẹmu mi mọ́, tí wọ́n sì tẹ̀lé ìlànà tí n óo fi lélẹ̀ fún wọn, àwọn ọmọ tiwọn náà óo jókòó lórí ìtẹ́ rẹ títí lae.”

¹³ Nítorí OLUWA ti yan Sioni; ó fẹ́ ẹ fún ibùjókòó rẹ̀:

¹⁴ Ó ní, “Ìhín ni ibi ìsinmi mi títí lae, níhìn-ín ni n óo máa gbé, nítorí pé ó wù mí.

¹⁵ N óo bù sí oúnjẹ rẹ̀ lọpọlọpọ; n óo fi oúnjẹ tẹ́ àwọn aláìní ibẹ̀ lọ́rùn.

¹⁶ N óo gbé ẹ̀wù ìgbàlà wọ àwọn alufaa rẹ̀, àwọn eniyan mímọ́ rẹ̀ yóo sì kọrin ayọ̀.

¹⁷ Níbẹ̀ ni n óo ti fún Dafidi ní agbára; mo ti gbé àtùpà kalẹ̀ fún ẹni tí mo fi òróró yàn.

¹⁸ N óo da ìtìjú bo àwọn ọ̀tá rẹ̀ bí aṣọ, ṣugbọn adé orí rẹ̀ yóo máa tàn yinrinyinrin.”