O. Daf 113 - Yoruba Bible

Yíyin OLUWA fún Oore Rẹ̀

¹ Ẹ yin OLUWA! Ẹ yìn ín, ẹ̀yin iranṣẹ OLUWA. Ẹ yin orúkọ OLUWA.

² Kí á yin orúkọ OLUWA, láti ìsinsìnyìí lọ títí laelae.

³ Láti ìlà oòrùn títí dé ìwọ̀ oòrùn, kí á máa yin orúkọ OLUWA.

⁴ OLUWA ju gbogbo orílẹ̀-èdè lọ, ògo rẹ̀ sì ga ju ọ̀run lọ.

⁵ Ta ló dàbí OLUWA Ọlọrun wa, tí ó gúnwà sí òkè ọ̀run,

⁶ ẹni tí ó bojú wo ilẹ̀ láti wo ọ̀run ati ayé?

⁷ Ó gbé talaka dìde láti inú erùpẹ̀, ó sì gbé aláìní sókè láti orí eérú,

⁸ láti mú wọn jókòó láàrin àwọn ìjòyè, àní, àwọn ìjòyè àwọn eniyan rẹ̀.

⁹ Ó sọ àgàn di ọlọ́mọ, ó sọ ọ́ di abiyamọ onínúdídùn. Ẹ máa yin OLUWA.