O. Daf 110 - Yoruba Bible

OLUWA ati Àyànfẹ́ Ọba Rẹ̀

¹ OLUWA wí fún oluwa mi, ọba, pé, “Jókòó sí apá ọ̀tún mi, títí tí n óo fi sọ àwọn ọ̀tá rẹ di àpótí ìtìsẹ̀ rẹ.”

² OLUWA yóo na ọ̀pá àṣẹ rẹ tí ó lágbára láti Sioni. O óo jọba láàrin àwọn ọ̀tá rẹ.

³ Àwọn eniyan rẹ yóo fi tọkàntọkàn fa ara wọn kalẹ̀, lọ́jọ́ tí o bá ń kó àwọn ọmọ ogun rẹ jọ lórí òkè mímọ́. Àwọn ọ̀dọ́ yóo jáde tọ̀ ọ́ wá bí ìrì òwúrọ̀.

⁴ OLUWA ti búra, kò sì ní yí ọkàn rẹ̀ pada, pé, “Alufaa ni ọ́ títí lae, nípasẹ̀ Mẹlikisẹdẹki.”

⁵ OLUWA wà ní ọwọ́ ọ̀tún rẹ, yóo rún àwọn ọba wómúwómú ní ọjọ́ ibinu rẹ̀.

⁶ Yóo ṣe ìdájọ́ àwọn orílẹ̀-èdè, ọpọlọpọ òkú ni yóo sì sùn ninu wọn; yóo sì run àwọn ìjòyè káàkiri ilẹ̀ ayé.

⁷ Ọba yóo mu omi ninu odò ẹ̀bá ọ̀nà, nítorí náà yóo sì gbé orí rẹ̀ sókè bí aṣẹ́gun.