Titu 2 - Ya Baru nga Tulag

Diya kustu nga panursuru

¹ Ngem ikew, Titu, ya isurum kuma, ket diyan nas kuma maikanatad iya nabaru nga panursuru.

² Isurum diya lallakay nga agtimbeng da se̍ agnacnacman da, se̍ naannad da pe̍ kuma. Isurum pe̍ igida nga awan kuma kurang niya panamati, panagayat, se̍ panaganus da.

³ Ket diya bacbaket pe̍, ibagam igida nga ipasingen da kuma ya ugali nga maitutup iya panagbiyag niya agsirbi e̍ Apu Diyus. Madi da kuma agsadap, se̍ madi da nga age̍ng-e̍nglew, no di lugud masapul nga agisursuru da kadiya nabaru nga banbanag.

⁴ Ta diya bacbaket, igida kuma diya mamagbaga kadiya naeb-ebbing nga babey maipanggep iya panagayat da kadiya asawa da se̍ diya anac da.

⁵ Mamagbaga da pe̍ kadiya naeb-ebbing nga babey, nga naannad da kuma, se̍ nadalus ya panagbiyag da. Nagaget da kuma pe̍ iya wangel da kadiya baley da. Nanacman da kuma pe̍, se̍ paiturayan da kadiya asawa da, tasun awan dake̍c nga maikagi maipanggep iya sursuru ne̍ Apu Diyus gapu igida.

⁶ Ket diya lalaki nga bekken pekkem nga unay nga lakay, ibagam pe̍ igida nga naannad da pe̍ kuma.

⁷ Ket ya panagbiyag mu, Titu, ket itu kuma ya kustu nga pagtuladan da iya panagwangel ka nabaru maipanggep iya orey nagan na nga banbanag. Itu nga ipasingem kuma nga napudnu se̍ napasnec ka iya panangisurum.

⁸ Ket ya panagkagim, natanang kuma nga awan pakauyawam, tasun maiyal-alyew kuma ngas diya gumura ikew, gapu ta awan met dake̍c nga maikagi da maipanggep dactida.

⁹ Ket no diya tagabu, ibagam igida nga paiturayan da kuma kadiya amu da ka amin nga banbanag, tasun maay-ayu diya amu da kadiya amin nga wangwanglen da. Madi da nga sumayabsab kadiya bilbilin diya amu da,

¹⁰ se̍ madi da agipuslit, no di lugud ipasingen da nga mapagtalkan da kadiya amin nga naitalec igida. Agten iyan kuma ngarud, tasun gapu iya orey nagan na nga wanglen da, maidaydayaw ya panursuru maipanggep e̍ Apu Diyus nga Mangisalakan dactida.

Ya gapu niya panagbiyag tida nga nalinteg

¹¹ Agten iyan kuma ngarud ya isurum, ata nipasingen ne̍ Apu Diyus ya siaayat nga asi na dactidan, ta ipaay na ya panangisalakan na iya amin tida nga toley.

¹² Ket itu win ya mangipakaemmu dactidan nga bay-an tida kuma ngin diya ug-ugali nga maikuntra iya panagdayaw e̍ Apu Diyus, se̍ ya panagtarigagay kadiya banbanag nga napateg ngas ka toley idi nga lubung. Ta dactida itan, naannad se̍ nalinteg tida kuma iya panagbiyag tida idi nga lubung, se̍ sumurut tida kuma pe̍ iya ugali nga gabay ne̍ Apu Diyus.

¹³ Agten iyan kuma ya panagbiyag tida bayat niya panagpadpadaan tida iya makaparagsac nga pagnamnamaan tida, nga itu ya pakasingnan nad iya dayaw ne̍ Je̍su Kristu nga Mangisalakan dactida se̍ Diyus tida nga naturay nga unay.

¹⁴ Igina met ya nangipalubus nga naidatun ya biyag na para dactida, tasun subbuten nactida iya turay diya amin nga kita niya kinadake̍c, se̍ tasun pagbalinen nactida nga kuwa na nga toley nga awanan basul, se̍ napasnec iya panagwangel ka nabaru.

¹⁵ Ket didi kuma ngarud ya isurum se̍ ibilin mu nga sipapasnec, Titu. Ket situturay ka kuma ngarud nga mangipakaemmu kadiya toley ennan kadiya basbasul da. Ket awan kuma ngarud madi mangipangag iya isursurum.