Titu 1 - Ya Baru nga Tulag

¹ Iyaken nge̍ Pablu nga isa nga agsirsirbi e̍ Apu Diyus se̍ isa nga apustul nga agpaay e̍ Je̍su Kristu. Naibon nac nga mangpabileg iya panamati diya pinili ne̍ Apu Diyus nga an-anac na, se̍ tasun mangiturung ngac pe̍ igida iya kustu nga sursuru niya pammati tida, nga itu ya sursuru nga agiturung iya panagtungpal iya tarigagay ne̍ Apu Diyus.

² Ket ya pungut niya panamati tida, itu ya panagnamnama tida iya biyag nga agnanayun nga awan patingga na. Ket e̍ Apu Diyus, nikari na dactidan yan nga biyag. Itu to nikari na ito di pekkem nga naparsuwa ya lubung ngi, ket emmu tida nga madi met agbusid nge̍ Apu Diyus.

³ Ket ito nadatngan to kustu nga timpu nan, nipakaemmu ne̍ Apu Diyus dactida yan nga panggep na nga maipaay dactida. Ket e̍ Apu Diyus nga Mangisalakan dactida, nitalec na iyaken to panggep na, itu nga ipakaemmuc kun, ta binilin nac.

⁴ Ket ikew, Titu, nga ibilang ku nga anac iya pammati tida, ikew ya suratac idi. Sapay kuma ta uwed ikew ya siaayat nga asi, se̍ talna, nga gayat e̍ Apu Diyus nga Ama se̍ e̍ Kristu Je̍sus nga Mangisalakan dactida.

To wangel ne̍ Titu ka puru nga Kre̍ta

⁵ Malagip mu ya gapu na nga nibati naka enna Kre̍ta itun. Nibati naka ennan tasun urnusem kuma ya kasasaad da ennan, ta uwed pekkem kurang na itun. Nibati naka pe̍ tasun mangdutuc ka ka panglakayen kadiya bungguy diya mamati iya tunggal ili ennan, sigun kadito nibilbilin ku ikew.

⁶ Ta nisuruc ikew itun nga ya panglakayen, masapul nga awan pakasapsaputan na nga dake̍c. Masapul nga is-isa ngas ya asawa na. Ket diya anac na, masapul nga mamati da pe̍, nga bekken da nga agdinamag nga naluku winno nasukir.

⁷ Ta masapul nga awan pakaumsiyan niya agay-aywan iya bungguy mamati, ata igina mettas ya natalec iya wangel ne̍ Apu Diyus. Itu nga madi mabalin no natangsit winno nalaka nga makaunget, se̍ madi pe̍ mabalin no age̍ng-e̍nglew, winno nauyung, winno naagum ka kuwarta.

⁸ Bekken kuma ngarud nga agten iyan. Ta ya panglakayen, masapul nga isa nga nalaing nga mangsangaili, se̍ mangipateg kadiya nabaru nga banbanag. Se̍ masapul pe̍ nga nanakem se̍ nalinteg ya panglakayen. Masapul pe̍ nga isa nga napasnec iya panamati na e̍ Apu Diyus, se̍ mangtimbeng iya beggi na.

⁹ Ket masapul pe̍ nga nabileg ya panamati niya panglakayen iya kagi ne̍ Apu Diyus nga naisuru igina, ta ya kagi ne̍ Apu Diyus ket pudnu met. Ta no nabaked ya panamati na iya kagi ne̍ Apu Diyus, makaisuru pe̍ kadiya duduma iya nabaru nga sursuru, se̍ mabalin na pe̍ ya mangipalawag kadiya ir-irradu diya toley nga kumuntra iya kagi ne̍ Apu Diyus.

To bilin nga mangpasardeng kadiya mangallilaw

¹⁰ Ta kinapudnu na, adu diya sumukir nga toley, nga awan banbanag diya kagkagiyen da, se̍ mangallilaw da pe̍. Nangruna diya duduma nga Hudyu, itu diya agten iyan.

¹¹ Masapul nga pasardengngem diyan nga mangallilaw, ta riribuken da ngarud diya amin nga kamkameng diya duduma nga sangabalayan, gapu iya panangisursuru da kadiya bekken da nga karbengngan. Ket agten iyan ngarud ya wangwanglen da, tasun bumacnang da ngas kuma, orey no nakal-alyew met.

¹² Ket ya isa nga mangasaba igida itun, nga isa mettas nga iKre̍ta, ket igina mettas to nangagi maipanggep kadiya kapada na nga iKre̍ta, nga kinunen na itun, “Sigud nga managbusid ngas diya iKre̍ta. Arig da pe̍ nga nauyung nga animal, ta dake̍c met ya gangey da. Nasadut da pe̍, ta yan nas pannangan ya napateg igida,” kunen na met.

¹³ Ket tutu met to kunen na. Itu nga ipapilit mu nga ilbec kuma, tasun maiturung da iya kustu nga panamati nga awan pagkurangan na.

¹⁴ Ta bay-an da kuma nga ikaskasu win dito sarsarita diya Hudyu, se̍ madi da kuma pe̍ tungpalen nin dito bilbilin diya toley nga manglikud iya pudnu nga sursuru.

¹⁵ Agten idi: Diya toley nga nadalus ya nakem da, ket awan naibilang igida nga bekken nga nadalus. Ngem diya toley nga narugit ya nakem da, nga madi mamati iya pudnu, ket awan pulus naibilang nga nadalus igida, ta dake̍c met ya panpanunut da se̍ ya nakem da.

¹⁶ Em-emmu da kanu nge̍ Apu Diyus, ngem masingen tida iya wangwanglen da nga baybay-an da met. Makapaaryec ngarud diyan, se̍ managsukir da met pe̍. Itu nga awan mawangel dan nga maibilang nga nabaru.