Ruma 9 - Ya Baru nga Tulag

Diya tutu nga toley ne̍ Apu Diyus

¹ Uwed pekkem ibagac kuma, ket tutu met yani nga ibagac, ta gapu iya pannakairaman ku e̍ Kristu, ket madi yac ngarud agbusbusid dakayu. Ket siguradu wac nga iturayan nac ya Ispiritu Santu, itu nga madi yac ngarud agbusbusid idi nga ibagac.

² Ket ya gabay ku nga ibaga, agten idi: Napalaus ya ladingit kun gapu kadiya kailiyac, se̍ madi maipac ya sakit niya ricnac gapu igida.

³ Ta katoltoley ku da met, se̍ kailiyac da pe̍ se̍ kapadac da nga Hudyu. Ket ya kunec, no mabalin ngas kuma, orey iyaken nin ya maisukat igida nga mailunud se̍ maisina e̍ Kristu, tasun igida kuma nga gennung ya maisalakan.

⁴ Ket Israe̍lita da met. Igida met dito pinili ne̍ Apu Diyus itun nga pinagbalin na nga anac na. Igida diya nagedyanan niya kinadayaw ne̍ Apu Diyus, se̍ igida pe̍ diya kinatulag na. Ket igida diya nangitalkan na ito Linteg, se̍ to pudnu nga panagdayaw nga nibilin na igida, se̍ igida diya nagkariyan na pe̍ itun.

⁵ Ket diya kailiyac met pe̍ diya kapututan dito nona nga am-ama tida nga pinili ne̍ Apu Diyus itun, nga nagbalin nga toley na. Se̍ no maipanggep iya kinatoley ne̍ Kristu, ket pada da met pe̍ nga Hudyu, nga igina met ya mangituray ka amin, ket igina met ya Diyus nga madaydayaw ka agnanayun. Agten iyan met nga tutu.

⁶ Ngem madic met kayat nga kagiyen nga nale̍panan ne̍ Apu Diyus to kagi na kadiya am-ama tida. Ta ya kinapudnu na, bekken nga amin diya kapututan nito ama tida nga Israe̍l ya ibilang ne̍ Apu Diyus nga tutu nga Israe̍lita nga toley na.

⁷ Ket bekken met nga amin diya kapututan nito Abraham diya ibilang ne̍ Apu Diyus nga tutu nga anac nito Abraham. Ta kinunen ne̍ Apu Diyus ito Abraham itun, “Diya putputut niya anac mu nga Isaac ya ibilang ku nga tutu nga kapututam,” kunen na.

⁸ Dikad pe̍ kayat na nga kagiyen nga diya maibilang nga anac ne̍ Apu Diyus, bekken nga diya uwed ngas kadawyan nga pannakaiyanac da nga kapututan nito Abraham. Diyan nas naiyanac iya nakatungpalan nito kari ne̍ Apu Diyus ito Abraham diya maibilang nga pudnu nga anac nito Abraham.

⁹ Ta agten idi to nikari ne̍ Apu Diyus ito Abraham: “Kalpasan makadagun, sumoli yac, ket uwed nad niyanac ne̍ Sara ngin nga lalaki,” kunen na.

Ya panangpili ne̍ Apu Diyus kadiya toley na

¹⁰ Ket agten pe̍ iyan dito singin nga anac nito Re̍be̍ka, ta is-isa pe̍ ya ama da, nga itu to Isaac nga am-ama tida.

¹¹ Ket ito di pekkem naiyanac dito singin, se̍ awan pekkem nawangel da itun, nga nabaru winno dake̍c, pinili ne̍ Apu Diyus to isa igida. Agten iyan ngarud, ta gabay ne̍ Apu Diyus no matungpal ya panggep na ito isa gapu ngas iya panangpili na igina, bekken nga gapu iya winangel toley.

¹² Itu nga sacbay nito pannakaiyanac dito singin, nibaga ne̍ Apu Diyus e̍ Re̍be̍ka nga kinunen na, “Agsirbi nad ya inauna iya inaudi,” kunen na.

¹³ Agten pe̍ iyan manin ya naisurat iya Bibliya, nga kunen na, “E̍ Hakub ya inannamungac nga ayaten. Ngem e̍ E̍saw, madic met inannamungan,” kunen na.

¹⁴ Mabalin nga pagarup nu nga no agten iyan, bekken nga nalinteg ya panagpili ne̍ Apu Diyus. Ngem nalinteg met!

¹⁵ Ta kinunen na e̍ Muyse̍s itun nga, “Ya gabay ku nga kaasiyan, itu met ya kaasiyac. Se̍ ya gabay ku nga tulungan, itu ngarud met ya tulungac,” kunen na.

¹⁶ Ket gapu ta agten iyan ngarudin, maawatan tida nga ya panangtulung ne̍ Apu Diyus kadiya toley, ket bekken nga gapu iya tarigagay toley winno iya wanglen da, no di lugud gapu was iya asi na.

¹⁷ Ta naisurat iya Bibliya to kinunen ne̍ Apu Diyus ito Paraun nga ari ka E̍hiptu itun, nga kunen na, “Gapu was iya panggep ku, pinagbalin naka nga agturay, tasun gapu ikew, maipasingen ya pannakabalin ku, se̍ tasun maipakaemmu nga silalatac ya kinapudnu maipanggep iyaken iya amin nga lubung,” kunen na.

¹⁸ Dikad pe̍ maemmuwan tida ngarudin nga kaasiyan ne̍ Apu Diyus ya gabay na nga kaasiyan, ket pagsukiren na met ya gabay na nga pagsukiren.

E̍ Apu Diyus ngas ya mangpili kadiya kaasiyan na

¹⁹ Mabalin nga madi kayu pekkem maawatan yani. Gapu ta agten iyan mettas ya pamaayen ne̍ Apu Diyus, mabalin nga pagarup nu nga bekken nga rumbeng no ibilang ne̍ Apu Diyus diya basbasul diya toley, ata madi ngarud makatiped diya toley iya gabay ne̍ Apu Diyus nga wanglen.

²⁰ Tutu met yan, ta bekken ngarud nga rumbeng nga agsumarya ka e̍ Apu Diyus, ta toley ka ngas met! Kaspagarigan no ya isa nga naduwin nga ginet, madi met mabalin no kunen kuma niya naduwin iya nangduwin igina nga, “Ape̍ aya nga agten idi ya pinamaay mu iyaken?”

²¹ Madi ngarud mabalin ya agten iyan, ta ya kinapudnu na, uwed iya agduduwin ya turay nga mangusar iya ginet nga duwinen na, sigun iya gabay na nga pangusaran. Kaspagarigan no duwa ya duwinen na iya ginet nga usaren na, mabalin met no napaw-is nga unay ya pamaayen na iya isa, se̍ kadawyan nas ya pamaayen na iya isa.

²² Ket agten met iyan ya panangariman ne̍ Apu Diyus dactida nga toley, ket mayat met yani nga pamaay na. Ta orey gabay na nga ipasingen kuma ya unget na itun, se̍ gabay na nga ipakaemmu kuma pe̍ ya pannakabalin na, ket siaanus met latta kadito toley nga kaunget na, nga itu dito toley nga naikari ngas iya panangukum na.

²³ Ket inanusan na ngarud nga siaasi dito toley, tasun maipakaemmu na ya nakaskasdaaw nga kinadayaw na. Ket diya kaasiyan na, itu pe̍ diya iraman na nad iya pannakapadayaw na, ta sigud nga panggep ne̍ Apu Diyus itun pekkem nga didi diya mapadayawan.

²⁴ Ket dactida met diyan nga pinili ne̍ Apu Diyus. Ket dactida nga pinili na, bekken nas nga Hudyu, no di pe̍ uwed da bekken nga Hudyu.

Ya panangpili ne̍ Apu Diyus kadiya bekken nga Hudyu

²⁵ Tutu met nga agten iyan pe̍ to nipaisurat ne̍ Apu Diyus ito Usiyas iya Bibliya itun, nga kinunen na, “Diya toley nga bekken ku nga kuwa itun, awagac da nad mettas nga toley ku. Se̍ to nasyun nga madic nipateg itun, awagac nad nga nasyun nga ipatpateg kun.”

²⁶ “Ket enna pagedyanan diya bekken nga Hudyu nga nangibagaac itun nga bekken ku da nga toley, ket maawagan da nad mettas antuni ka ‘anac niya sibibiyag nga Diyus’,” kunen na.

²⁷ Ket to Isayas met pe̍, uwed to nipakaemmu na maipanggep kadiya Israe̍lita nga kinunen na itun, “Orey pe̍ no agten iya kaadu diya lapuc iya pingit niya baybay ya kaadu diya kapututan ne̍ Israe̍l, e̍teng ngas nad igida diya maisalakan.

²⁸ Ta dagus ngas nga tungpalen ne̍ Apu ya panangukum na nad kadiya uwed iya lubung, ket pangpangen na nad met pe̍ yin,” kunen na.

²⁹ Ket agten pe̍ iyan to nipadtu nito Isayas ito kinunen na, “Ket ya Apu tida nga Mannakabalin, no awan kuma nisalakan na nga anac tida nga Israe̍lita itun, ket nagbanag tida ngas nga agten kadito iSuduma, se̍ naglak-am tida pe̍ iya agten ito napasamac kadito iGumura,” kunen na.

Maiyarig nge̍ Kristu ka pakaisacdulan diya Hudyu

³⁰ Dikad pe̍ agten idi ya maemmuwan tidan: Dito bekken nga Hudyu, madi da sinapsapul itun ya pannakapalinteg. Ngem itan, naipaay met igidan, ta naibilang da nga nalinteg gin gapu iya panamati da.

³¹ Ngem diya Israe̍lita, sinapsapul da ngarud ya pannakapalinteg da iya imatang ne̍ Apu Diyus gapu iya panangtungpal da ka linteg. Ngem madi da latta napalinteg iya imatang ne̍ Apu Diyus, no di lugud nakurang pekkem mas to panangtungpal da ito Linteg da.

³² Ngarud, madi naibilang nga nalinteg diya Israe̍lita, gapu ta di da biniyangan ya panamati, no di da lugud biniyangan ngas diya winangwangel da nga panangtungpal da ito Linteg. Ket itan, arig nga naisacdul dan ito maawagan ka “batu nga pakaisacdulan.”

³³ Ta agten ngarud iya ibagbaga na iya Bibliya, nga kunen na, “Singen nu, ta uwed batu nga isimpac iya ili nga Siyun. Idi ya batu nga pakaisacdulan diya toltoley, se̍ itu yani ya dackel nga batu nga pakaiduclapan da. Ket diya mamati igina, pulus nga madi da mapaay,” kunen na.