Ruma 8 - Ya Baru nga Tulag

Ya pannakibulubulun niya Ispiritu Santu dactida

¹ Dikad pe̍ dactida nga nairaman iya kasasaad ne̍ Kristu Je̍sus, awan pakaukuman tidan.

² Ta ya turay niya paglinteggan niya Ispiritu nga mangipaay ka biyag, itu met ya nangwayawaya dactidan iya pagturayan niya basul se̍ patey, gapu iya pannakairaman tida iya kasasaad ne̍ Kristu Je̍sus.

³ Winayawayaan nactida ngarud, ta no ya Linteg, madi na met kabaellan nga abaken ya pannakabalin niya basul, gapu ta kurang ya kabaellan diya toley nga mangtungpal. Itu nga e̍ Apu Diyus met ya nangabac kin iya pannakabalin niya basul. Inabac na ngarud ito nibon na ya Anac na nga nagpaitoley, tasun uwed beggi na nga kalanglanga niya managbasul nga beggi tida, se̍ tasun agpaay maigapu ka basul. Ket iya agten iyan, inabac ne̍ Apu Diyusin ya pannakabalin niya basul, gapu iya beggi niya Anac na.

⁴ Ket inariman ne̍ Apu Diyus ya agten iyan tasun ya nalinteg nga kaipapennan diya bilbilin niya Linteg, matungpal dactida nga madi agtungpal iya tarigagay niya kinatoley tida, no di lugud agtungpal iya tarigagay niya Ispiritu ne̍ Apu Diyus.

⁵ Agten iyan ngarud ya inariman ne̍ Apu Diyus, ta diya toley nga agtungtungpal iya mismu nga tarigagay da, laglagipen da ngas ya gabay niya kinatoley da. Ngem diya agtungtungpal iya tarigagay niya Ispiritu, laglagipen da ya gabay niya Ispiritu.

⁶ Ket diya toley nga manglagip pekkem iya gabay niya kinatoley da, agbanag da ngarud ka pannakatey. Ngem diya manglagip iya gabay niya Ispiritu, agbanag da iya biyag se̍ talna nga ipaay ne̍ Apu Diyus.

⁷ Ta diya toley nga manglagip iya tarigagay niya kinatoley da, guraen da met nge̍ Apu Diyus, ta di da paiturayan iya linteg na. Ket ya kinapudnu na, awan met kabaellan da nga mangtungpal iya paglinteggan na.

⁸ Ket diya agtungtungpal iya tarigagay niya kinatoley da, bekken da met nga makaay-ayu e̍ Apu Diyus.

⁹ Ngem no dakayu, bekken kayu nga agten kadiyan. Ta no tutu nga agedyan dakayu ya Ispiritu ne̍ Apu Diyus, madi kayu nga tungtungpalen ya gabay niya kinatoley nun, no di lugud ya gabay niya Ispiritu win. Ngem ya orey nagan na nga toley nga awan igina ya Ispiritu ne̍ Kristu, bekken met nga kuwa ne̍ Kristu.

¹⁰ Ngem no uwed dakayu nge̍ Kristu, uwed ngarud biyag diya kararuwa nu gapu iya pannakaibilang nun nga nalinteg, orey uwed pekkem pannakatey diya beggi nu gapu ka basul.

¹¹ E̍ Apu Diyus met ya nangpagungar e̍ Kristu Je̍sus ito pannakatey na. Ket no agedyan dakayu ya Ispiritu ne̍ Apu Diyus, biyagen nad ngarud pe̍ ne̍ Apu Diyus diya beggi nu, gapu iya Ispiritu na nga makibulubulun dakayun, orey uwed pannakatey diya beggi nu.

¹² Dikad pe̍ kakabsat, uwed karbengngan tidan. Ngem ya pagrebngan tida, bekken nga ya panangtungpal kadiya tartarigagay niya kinatoley tida.

¹³ Ta no tungtungpalen nu ngas diya tartarigagay niya kinatoley nu, ket agbanag kayu met ka pannakatey. Ngem no gapu iya tulung niya Ispiritu ne̍ Apu Diyus, ket isardeng nu diya dake̍c nga wangwangel nu nga tumaud iya tarigagay niya beggi nu, ket agbiyag kayu nad pekkem.

¹⁴ Tutu met yan, ta diya amin nga maidalan iya Ispiritu ne̍ Apu Diyus, anac met ne̍ Apu Diyus da.

¹⁵ Ta ito naipaayan kayu iya Ispiritu ne̍ Apu Diyus, bekken nakayu nga pinagbalin nga tagabu manin. Ansing met ya pagbanagan nu no agten iyan. Ngem ito naipaayan kayu iya Ispiritu ne̍ Apu Diyus, pinagbalin nakayu lugud nga anac ne̍ Apu Diyusin. Itu nga makaawag tida e̍ Apu Diyus nga makunen tida nga, “Ama! Amac!”

¹⁶ Ket no agten iyan ya awag tida e̍ Apu Diyusin, itu ngarudin ya panangpanecnec niya Ispiritu ne̍ Apu Diyus iya lemlemmet tida nga mangipakaemmu nga anac nactida ngarud nge̍ Apu Diyusin.

¹⁷ Ket gapu ta anac nactidan, agtawid tida nad met pe̍ yin. Ngarud, agtawid tida nad e̍ Apu Diyus, nga makipagtawid tida e̍ Kristu. Ket agten iyan ngarud, ta no tutu nga makipagrigat tida e̍ Kristu, mairaman tida nad met pe̍ iya pannakapadayaw na.

Ya tawiden tida nad e̍ Apu Diyus

¹⁸ Ket no utubec ya kinadayaw nga dumateng dactida no ipakaemmu nad ne̍ Apu Diyus, ket pulus nga madic ikinkiney yin diya rigrigat ku idi nga lubung.

¹⁹ Ta sisasagana ngin ya amin nga parsuwa ne̍ Apu Diyus, nga arig nga agpadpadaan da pe̍ iya panangiparangarang ne̍ Apu Diyus kadiya an-anac na.

²⁰ Ta nanipud itun pekkem, nagbalin nga awan mamaay na ya amin nga pinarsuwa ne̍ Apu Diyus. Ngem bekken nga gapu ta itu ya gabay da, no di lugud gapu ta itu to nibilin mettas ne̍ Apu Diyus nga kasasaad da. Ket sigud nga namnamaen na nga uwed nad mettas nabaru nga pagbanagan da.

²¹ Ta uwed nad pannakawayawaya diya amin nga pinarsuwa ne̍ Apu Diyus. Mawayawayaan da nad ngarud iya pakapirdiyan da, nga itu ya arig nga mangpatagabu igida. Ket mairaman da nad iya pannakawayawaya se̍ iya pannakapadayaw diya anac ne̍ Apu Diyus.

²² Agten iyan ngarud, ta emmu tida nga agingga ita nga timpu, aglaklak-am ka rigat diya amin nga naparsuwa, nga maiyarig iya panagrigat niya agpakiskis.

²³ Ket bekken nas nga dito duduma nga naparsuwa diya agrigrigat. Ta dactida met pe̍, ket maparparigat tida iya panagpanunut tida. Ta dactida met diya naipaayan iya Ispiritu Santu, nga itu ya mangpatalged dactida ita iya nabaru nga tawiden tida nad mettas. Maparparigat tida ngarud ita, bayat niya panangpadpadaan tida iya timpu nga panangipanecnec ne̍ Apu Diyus nga tutu nga anac nactidan. Ket itu nad ya pannakawayawaya diya beggi tida, nga maipac kin ya kinatoley tida.

²⁴ Ket tutu met nga namnamaen tida yanin gapu iya pannakaisalakan tida. Mangnamnama tida pekkem ngarud, ta no uwed dactidan ya ninamnama tida, bekken nin nga tutu nga namnama yanin. Ta awan ngarud mangnamnama nga mangpadpadaan iya uwed iginan.

²⁵ Ngem no madi pekkem madatngan ya namnamaen tida, padaanan tida nga siaanus.

²⁶ Ket agten pe̍ ya Ispiritu ne̍ Apu Diyus, ta tulungan nactida iya pagkurangan tida iya panamati tida. Ta madi tida emmu no kumaan kuma niya kustu nga panagkararag tida, ket itu nga ya Ispiritu ya mangibagbaga e̍ Apu Diyus para dactida maipanggep kadiya sagabaen tida nga di tida kabaellan nga ibalikas iya panagkararag tida.

²⁷ Ket e̍ Apu Diyus, sukimaten na ya uwed iya panpanunut tida, ket emmu na met pe̍ ya pangpanggeppen niya Ispiritu para dactida nga naibilang nga toley na. Ta ipacpakaasi nactida ya Ispiritu e̍ Apu Diyus, ket ya ibagbaga na para dactida, maikanatad ngarud iya tarigagay ne̍ Apu Diyus.

²⁸ Ket emmu tida met nga amin nga mapasamac dactida, pagbalinen ne̍ Apu Diyus nga nasirbi para dactida nga agayat igina se̍ napili gapu iya panggep na.

²⁹ Ta itun pekkem, emmu ne̍ Apu Diyusin diya toley nga isaad na ita. Ket igida diya sigud nga panggep na nga pagbalinen nga pakasingnan mettas iya gangey ne̍ Je̍su Kristu nga Anac na, tasun e̍ Je̍su Kristu ya maibilang nga kainunaan se̍ katurayan nga kabsat diya amin nga pagbalinen ne̍ Apu Diyus nga anac na.

³⁰ Ket diya panggep na nga agbalin nga agten iya Anac na, itu diya pinili na, se̍ na nibilang da nga nalinteg gin, se̍ niraman na da pe̍ iya pannakapadayaw na.

Awan makaisina dactida e̍ Je̍su Kristu

³¹ Ket gapu ta maawatan tida yan, agten idi met ya makunen tidan: Awan ngarud makaabac dactidan, gapu ta isangil nactida nge̍ Apu Diyus.

³² Ngarud, e̍ Apu Diyus, madi na nipaidam ya mismu nga Anac na nga Je̍sus, no di lugud nipalubus na nga napatey nga agpaay dactida nga amin. Ket gapu ta nipaay na ya Anac na dactida itun, di nactida ngarud kanunungen iya panange̍cde̍ na nga siaasi iya Anac na ka amin nga banbanag?

³³ Ket no dactida nga pinili ne̍ Apu Diyus, emmu tida nga awan makapabasul dactida iya imatang ne̍ Apu Diyusin. Ta e̍ Apu Diyus met ya nangibilang dactida nga nalinteg iya imatang na.

³⁴ Awan pe̍ makaukum dactidan iya imatang ne̍ Apu Diyus. Ta e̍ Kristu Je̍sus, igina met to natey, ket bekken nas nga natey, no di lugud napagungar met pe̍. Ket naisaadin iya kadayawan nga edyan, nga itu ya madiwanan ne̍ Apu Diyus. Ket igina mettin ya mangibabaet dactidan e̍ Apu Diyus.

³⁵ Awan ngarud met pe̍ makaisina dactidan iya panagayat ne̍ Kristu. Ngarud, orey no agrigrigat tida se̍ orey mariribukan ya panpanunut tida, winno mairurumen tida, se̍ orey agkurang tida ka kanen se̍ luput, winno napeggad ya panagbiyag tida, se̍ orey no mapatey tida pe̍, ket awan latta makaisina dactida iya ayat ne̍ Kristu.

³⁶ Ta agten ngarud ito kunen na iya Bibliya nga, “Gapu iya panamati mi ikew, aggidgidam nga agpeggad kami ka pannakapatey. Ket naibilang kami ngasin nga arig nga karne̍ru nga naisagana ngin nga maparti,” kunen na.

³⁷ Ngem bekken kuma nga itu ya pagdanagan tida diyanin. Ta orey no agten iyan ya kasasaad tida, nabilbileg latta ya panangabac tida iya amin diyan, gapu igina nga nangayat dactida.

³⁸ Ta siguraduwec nga awan makaisina dactida iya panagayat ne̍ Apu Diyus dactida, orey no ya pannakapatey man, winno orey nagan na nga mapasamac iya biyag tida. Awan ngarud makaisina dactida iya panagayat na, orey no diya anghe̍le̍s man, winno diya sabali nga di masingen nga agturay se̍ diya orey nagan na nga uwed pannakabalin na, winno diya mapasamac ita winno iya maadpangan.

³⁹ Ket orey nagan na nga uwed iya ngatu winno iya segged, winno orey nagan na pekkem nga naparsuwa, ket awan pulus kadidi ya makaisina dactida iya ayat ne̍ Apu Diyus nga nipaay na dactida gapu e̍ Kristu Je̍sus nga Apu tida.