Ruma 7 - Ya Baru nga Tulag

Awan turay na dactidan to Linteg ne̍ Muyse̍s

¹ Kakabsat, emmuc nga maawatan nu ya ibagac ita, gapu ta emmu nu mettin ya maipanggep ka linteg. Ket agten idi ya ibagac: Ya linteg, uwed turay na iya isa nga toley bayat niya panagbiyag niyan nga toley.

² Kaspagarigan ya babey nga uwed asawa na: Ket sigun iya paglinteggan, maiparit igina ya makiasawa ka sabali, bayat niya panagbiyag niya asawa na nga lalaki. Ngem no natey yin ya asawa na, awan biyang iginan niya paglinteggan nga maipanggep iya pannakiasawa.

³ Ket iya agten iyan, sigun iya linteg, maibilang nga makabasul ka pannakitipun ka bekken na nga asawa ya babey nga makitipun iya sabali nga lalaki, no sibibiyag pekkem ya sigud nga asawa na. Ngem no natey yin ya asawa na, awan turay niyan nga paglinteggan iginan. Dikad pe̍ bekken nin nga maibilang nga makabasul ka pannakitipun ka bekken na nga asawa no makiasawa manin ka sabali.

⁴ Kakabsat ku, agten kayu met iyan nga pangngarig, ta awan turay niya Linteg nito Muyse̍s dakayun, gapu ta naibilang kayun nga natey yin. Ta ito nailansa ya beggi ne̍ Kristu ito krus, arig nga nairaman kayu nga natey pe̍ yin, no maipanggep iya turay niya Linteg dakayu. Dikad pe̍ nawayawayaan kayu nga makitipun iya sabali yin, nga itu nge̍ Kristu nga natey se̍ napagungar met itun. Agten iyan ngarud ya kasasaad tidan, tasun uwed kuma nabaru nga pagbanagan niya panagbiyag tidan nga agpaay e̍ Apu Diyus.

⁵ Ket itun, nagtungtungpal tida pekkem kadito tarigagay nga tumaud ngas iya kinatoley tida. Ket gapu ta naemmuwan tida ya kunen na ito Linteg, arig nga limallalu pekkem diya dake̍c nga ricna nga uwed kadiya beggi tida. Ket patey ngas met ya pagbanagan tida itun gapu kadiyan.

⁶ Ngem ita, naibilang tida nga natey yin, no maipanggep iya turay nito Linteg dactida. Itu nga nawayawayaan tidan, ta awan turay na dactidan to Linteg nga mangtengtengngel dactida itun. Dikad pe̍ ya panagsirbi tida e̍ Apu Diyus itan, bekken nga sigun ito daan nga wagasin maipanggep kadiya naisurat ito Linteg, no di lugud sigun iya kabarbaru nga wagas maipanggep iya Ispiritu ne̍ Apu Diyus.

Pakaemmuwan tida ka basul ya Linteg

⁷ Ngem orey agten iyan, madi kayu kuma pagarupen nga pagtaudan niya basul ya Linteg ne̍ Muyse̍s, ta bekken met. Ngem no awan kuma nabangun nga linteg, madic met naemmuwan ya kinapudnu maipanggep ka basul. Kaspagarigan, di yac naemmuwan nga basul ku ya panagagum, ngem uwed to bilin iya Linteg nga kunen na nga, “Madi ka agagum.” Itu nga naemmuwac mettin.

⁸ Ket gapu ito bilin, arig nga uwed gundaway niya basul nga agpawangel iyaken kadiya adu nga kita nga kinaagum ku. Tutu met nga agten iyan, ta no awan kuma nabangun nga linteg, arig ngas nga natey ya basul, ta awan met pannakabalin na.

⁹ Ket ito panagbiyag ku itun, madi yac pekkem naemmuwan maipanggep iya linteg. Ngem ito naemmuwac kun to bilin, arig nga dimake̍c iyaken dito sigud nga basbasul ku.

¹⁰ Ket naemmuwac itunin nga naibilang ngac nga isa nga natey iya imatang ne̍ Apu Diyus. Ket to bilin nga mangiturung kuma dactida iya biyag nga ipaay ne̍ Apu Diyus, itu mettas ya nangibilang iyaken nga natey iya imatang na.

¹¹ Ta gapu ito bilin, arig nga uwed gundaway niya basul nga mangallilaw iyaken. Ket gapu pe̍ ito bilin, arig nga pinatey nac ya basul, ata gapu iya basul, naibilang ngac ngarud nga natey iya imatang ne̍ Apu Diyus.

¹² Dikad pe̍ awan ngarud pagkurangan nito Linteg iya imatang ne̍ Apu Diyus. Ket agten pe̍ to bilin niya Linteg, ta awan met pe̍ pagkurangan na. Nalinteg pe̍ to bilin, ket mangipaay ka nabaru.

¹³ Ket iya agten iyan, madi kayu kuma ngarud pagarupen nga ya Linteg nga nabaru, itu ya gapu nito pannakaibilang ku nga natey, ta bekken met, no di lugud ya basul ya gapu na. Ta ya basul, itu met to nakaukumac nga maikanatad iya Linteg nga nabaru, ket ya Linteg met ya nangilawlawag no nagan na diya maibilang nga basul. Ket iya agten iyan, gapu ito bilin, naemmuwan mettin ya napalaus nga kinadake̍c niya basul.

Ya mangituray iya beggi niya toley

¹⁴ Ket emmu tida ngarud nga nadiyusan ya Linteg ne̍ Muyse̍s. Ngem iyaken, toley yac met, nga sigud nga pinaiturayan ka kinadake̍c.

¹⁵ Tutu met yan, ket masikuran nac mettin! Ta ya gabay ku nga wanglen kuma, madic met mawangel. Ngem diya kagurac nga wanglen kuma, itu met ya wangwanglec latta!

¹⁶ Ket no arimanec latta ya dake̍c nga madic gabay nga wanglen, ipasingec mettin nga pudnu ya kunen na iya Linteg.

¹⁷ Dikad pe̍ bekken ngarud nga gapu iya bukud ku nga panpanunut ya panagwangel ku ka dake̍c, no di lugud gapu iya basul nga sigudin nga uwed iyaken.

¹⁸ Ket tutu met yan, ta emmuc nga awan pulus nabaru nga tumaud iyaken. Kayat ku nga kagiyen, nga awan nabaru nga tumaud iya kinatoley ku. Ta orey no agtarigagay yac nga agariman kuma ka nabaru, di yac met maariman.

¹⁹ Ta diya nabaru nga gabay ku nga arimanen kuma, madic met arimanen. Ngem ya dake̍c nga madic gabay nga arimanen, itu met latta ya ar-arimanec.

²⁰ Ket no ya di yac gabay nga wanglen ya wanglec latta, bekken nin nga ya tarigagay ku ya gapu na, no di lugud gapu iya basul nga sigud nga uwed iyaken.

²¹ Dikad pe̍ idi ya naemmuwac kun maipanggep iya kinatoley ku: Orey no ya nabaru kuma ya gabay ku nga wanglen, ket kinadake̍c met latta ya uwed iyaken.

²² Ta orey pagay-ayatac met diya paglinteggan ne̍ Apu Diyus iya lemlemmet ku,

²³ ket uwed met sabali nga paglinteggan nga tungtungpalen nga gennung diya ricricna niya beggi. Ket maikuntra met yani nga paglinteggan iya paglinteggan nga tartarigagayac nga tungpalen iya lemlemmet ku. Ket ya paglinteggan nga tungtungpalen niya beggic, itu ya mangpilit iyaken, nga arig nga pagbalinen nac nga balud niya basul nga mangituray kadiya parte̍ niya beggic.

²⁴ Kackaasi yac mettin! Ta nagan ngarud ya makaisalakan iyaken iya kinatoley nidi nga beggic nga agbanag ngas ka patey?

²⁵ Ket agyaman nac ngarud e̍ Apu Diyus, ta igina met ya makaisalakan iyaken gapu ito inariman ne̍ Je̍su Kristu nga Apu tida. Dikad pe̍ no iya panpanunut ku, ket ya paglinteggan ne̍ Apu Diyus ya gabay ku nga pagsirbiyan. Ngem ya tarigagay niya kinatoley ku, ket agpaay ngas iya pagturayan niya basul.