Ruma 6 - Ya Baru nga Tulag

Ya pannakairaman tida iya kasasaad ne̍ Kristu

¹ Ket gapu ito kunec, mabalin nga ipagarup nu nga nabaru no itultuluy tida ya panagbasbasul tida, tasun umad-adu kuma pe̍ ya siaayat nga asi ne̍ Apu Diyus dactida.

² Ngem bekken met nga agten iyan! Ta madi mabalin nga agbasul ya natey yin, ket dactida, no maipanggep ka panagbasul, naibilang tida mettin nga natey.

³ Di kayu kad pekkem maawatan ya kaipapennan niya pannakabautisar tida nga pannakairaman tida e̍ Kristu Je̍sus? Itu ya pannakairaman tida met iya pannakatey na.

⁴ Ngarud, ito nabautisaran tida, naipasingen nga naibilang tidan nga arig nga naitamen pe̍ nga nairaman igina gapu iya pannakairaman tida ito pannakatey na. Ket nairaman tida ngarud ito pannakatey na tasun agbiyag tida kuma sigun iya kabarbaru nga biyag, nga agten pe̍ ito biyag ne̍ Kristu nga napagungar gapu iya nadayaw nga pannakabalin niya Ama.

⁵ Tutu met yan, ta no nairaman tida iya kasasaad ne̍ Kristu maipanggep ito pannakatey na, mairaman tida ngarud met pe̍ nga mapagungar nga agten igina.

⁶ Ket nabatad dactidan nga ya sigud nga kinatoley tida, nairaman e̍ Kristu ito pannakailansa na ito krus, tasun mapirdi ya pannakabalin niya gangey tida nga agbasbasul. Ket iya agten iyan, bekken tida kuma ngarud nga paiturayan ka basulin nga arig nga tagabu nactida ya basul.

⁷ Ta no natey yin ya isa nga toley, nawayawayaanin iya pannakabalin niya basul.

⁸ Ket gapu ta naibilang tidan nga nairaman ito pannakatey ne̍ Kristu, mamati tida ngarud met nga makipagbiyag tida pe̍ igina.

⁹ Ta emmu tida nga napagungar ngarud nge̍ Kristu win, ket madi pulus nga matey yin. Awan ngarud turay niya patey iginan.

¹⁰ Ket e̍ Kristu, natey ngarud itun maipanggep ka basul. Ket to pannakatey na, nam-ame̍nsan ngas met, ket kustu win para iya amin nga timpu. Ket ya agdama nga panagbiyag na, ipaay na e̍ Apu Diyus.

¹¹ Ket masapul nga agten kayu pe̍ iyan no maipanggep ka basul, ta ibilang nu pe̍ yin nga natey kayun no maipanggep ka basul. Ngem no maipanggep e̍ Apu Diyus nga gennung, ibilang nu nga sibibiyag kayun nga agpaay igina, gapu iya pannakairaman nu e̍ Kristu Je̍sus.

¹² Ket gapu ta agten iyan, masapul nga madi kayu ipalubus nga iturayan niya pannakabalin niya basul diya beggi nu nga uwed ngas pannakatey da. Madi kayu ngarud ipalubus, tasun madi kayu paiturayan kadiya sigud nga dake̍c nga tarigagay nu.

¹³ Ket madi kayu pe̍ nga ipalubusin nga paiturayan ka basul, ya orey nagan na nga parte̍ niya beggi nu, tasun madi da kuma mausar ka dake̍c nga banbanag, no di lugud ipaay nu ngas ya beggi nu e̍ Apu Diyus. Ipaay nu ngarud igina ya amin nga parte̍ niya beggi nu, tasun mausar kuma ngin kadiya nalinteg nga banbanag. Ta sibibiyag kayu met nga toley nga naibilang nga natey itun nga arig nga napagungarin.

¹⁴ Agten iyan kuma ya wanglen nun, ata awan turay dakayun niya pannakabalin niya basulin. Ta bekken kayu nga paiturayan ka linteg gin, no di lugud paiturayan kayun iya siaayat nga asi ne̍ Apu Diyusin.

Ya kinalinteg ngas ya pagpaayan tidan

¹⁵ Ngem pagarupen nu ngata nga kustu orey no itultuluy tida latta ya agbasul, gapu ta bekken tida nga paiturayan ka linlinteg gin, no di lugud ngas iya siaayat nga asi ne̍ Apu Diyusin. Ngem bekken met nga agten iyan!

¹⁶ Emmu tida ngarudin nga no patagabu ka iya isa nga pagsirsirbiyam, agbalin ka ngarud nga tagabu nan. Ket mabalin tida met nga ipatagabu ya beggi tida iya pannakabalin niya basul, nga agbanag ka pannakatey, winno isirbi tida ya beggi tida nga agtungpal e̍ Apu Diyus, ket agbanag nga gennung yani ka pannakapalinteg.

¹⁷ Ngem agyaman nac e̍ Apu Diyus, ta orey arig kayu nga tagabu itun niya basul, ket itan, nagbalin kayun nga napasnec nga pasurut niya panursuru nga naipakaemmu dakayun. Ket naitalec kayu met pe̍ iya turay nan.

¹⁸ Ket gapu ta nawayawayaan kayun iya pannakabalin niya basul, nagbalin kayu nga arig nga tagabu nga naipaay kadiya nalinteg nga banbanagin.

¹⁹ Kadawyan nas met nga kagi ya usarec nga mangipalawag kadidi dakayu, ta gapu iya kinatoley nu, narigat nu nga maawatan didi. Ket itun, maiyarig kayu ka tagabu niya pannakabalin niya kinadake̍c, ta nipaay nu met itun diya parte̍ diya beggi nu iya panagariman ka naalas se̍ diya lumallalu nga dake̍c nga banbanag. Ngem itan, masapul nga ipaay nu met diya parte̍ diya beggi nu iya panangtungpal kadiya nalinteg gin, nga arig nga tagabu nakayu ya kinalinteg gin. Ket iya agten iyan, makaDiyus ngarud ya panagbiyag nun.

²⁰ Ket itun, ito arig kayu nga tagabu pekkem iya pannakabalin niya basul, awan turay niya kinalinteg ne̍ Apu Diyus dakayu.

²¹ Itu nga awan met nagbanagan da nga nabaru dito winangwangel nu itun, ta pannakatey ngas met ya nagbanagan diya agten kadiyan nga wangwangel. Ket itan, iyalyew nu ngas mettin diyan nga winangwangel nu itun.

²² Ngem ita, nawayawayaan kayun iya pannakabalin niya basul. Ket arig nga nagbalin kayu nga tagabu ne̍ Apu Diyusin. Ket paglaingan nu yani, ta agpaay kayun kadiya nadiyusan nga banbanag, se̍ agbanag kayu pe̍ iya agnanayun nga biyag.

²³ Ta ya supapac niya basul, ket patey. Ngem biyag nga agnanayun met nga gennung ya isagut ne̍ Apu Diyus dactida gapu iya pannakaibulun tida e̍ Kristu Je̍sus nga Apu tida.