Ruma 5 - Ya Baru nga Tulag

Ya pannakaitunus tida e̍ Apu Diyus

¹ Ket ita, gapu ta napalinteg tidan iya imatang ne̍ Apu Diyus gapu iya panamati tida, ket uwed met pannakaitunus tidan e̍ Apu Diyus gapu ito inariman niya Apu tida nga Je̍su Kristu.

² Ket gapu pe̍ e̍ Je̍su Kristu, uwed mettin gundaway tida nga aglak-am iya siaayat nga asi ne̍ Apu Diyus, nga malak-aman tida ngarudin gapu ka panamati. Ket ipatpateg tida mettin yani nga kasasaad tida. Ket agragsac tida ngarudin gapu idi nga namnamaen tida, nga itu ya pakairamanan tida nad mettas e̍ Apu Diyus iya kinadayaw na.

³ Ket bekken nas nga iyan, ta agragsac tida met pe̍ maipanggep kadiya rigrigat tida, ta emmu tida nga maadal tida ya panaganus gapu kadiya rigrigat tida.

⁴ Ket ya panaganus, agbanag ka nabaru nga kananakem. Ket ya nabaru nga kananakem, agbanag ngarud ka panagnamnama.

⁵ Ket madi tida ngarud mapaay idi nga namnama tida. Ta nipakaemmu ne̍ Apu Diyus ya ayat na dactidan, nga arig nga nibuyat na dactida, gapu iya Ispiritu Santu nga naipaay dactida.

⁶ Ket itun, awan pekkem mas kabaellan tida nga mangay-ayu e̍ Apu Diyus, ket itu mettin to kustu nga timpu niya pannakaibon ne̍ Kristu, tasun matey para dactida nga toley nga madi nagdayaw e̍ Apu Diyus.

⁷ Ngem no diya toley, e̍teng ngata diya agdisnudu nga matey nga maisunu para iya isa nga natacneng nga pada na. Mabalin ngata nga uwed met makaitured nga matey para iya isa nga nasingpet nga toley.

⁸ Ngem no e̍ Apu Diyus nga gennung, nipasingen na nga nalaing ya ayat na dactida. Ta ito sibabasul tida pekkem, natey met nge̍ Kristu para dactida itun.

⁹ Ket gapu ito pannakaidaga na, napalinteg tidan iya imatang ne̍ Apu Diyus. Ket gapu ta napalinteg tidan, nataltalged tida pe̍ yin nga maisalakan tida nad iya unget ne̍ Apu Diyus nga pangukum na.

¹⁰ Ta gapu ito pannakatey niya Anac ne̍ Apu Diyus, naitunus tida e̍ Apu Diyusin, orey naikuntra tida pekkem igina itun. Ket itan, gapu ta naitunus tida iginan, di ngarud nasigsiguradu ya panagnamnama tidan iya pannakaisalakan tida, gapu iya biyag ne̍ Je̍su Kristu ita?

¹¹ Ket bekken nas nga ya pannakaisalakan tida ya pagragsakan tida, no di lugud agragsac tida pe̍ e̍ Apu Diyus, gapu iya Apu tida nga Je̍su Kristu nga nangibalin dactidan nga naitunus e̍ Apu Diyus.

To Adan se̍ e̍ Kristu

¹² Dikad pe̍ itan, gapu ito basul nito nona nga toley, uwed mettin panagbasul idi nga lubungin. Ket pannakatey met ya pagtungpalan niya panagbasul. Ket iya agten iyan, naalisan mettin diya amin nga toley iya pannakabalin niya patey, gapu ta nagbasul tida nga amin.

¹³ Tutu met yan, ta ya panagbasul toley, uwed mettin itun idi nga lubung, orey ito awan pekkem to Linteg ne̍ Muyse̍s. Ngem no awan linteg nga nabangun, awan pe̍ maibilang nga basul.

¹⁴ Ngem orey agten iyan, nanipud ito timpu nito Adan agingga ito timpu nito Muyse̍s, naggundaway met latta kadiya toltoley ya pannakabalin niya patey, orey kadiya toley nga madi nagbasul ka agten ito basul nito Adan, nga nagsalungasing iya bilin ne̍ Apu Diyus. Ket to Adan, uwed pakaiyarigan na e̍ Kristu nga di pekkem inumbe̍t itun.

¹⁵ Ngem uwed pe̍ pagsabaliyan didi nga duwa. Ta ya sagut nga ipaay ne̍ Apu Diyus gapu e̍ Kristu, sabali met ito basul nito Adan nga naiyalis dactida. Ta gapu ito basul niyan nga is-isa nga toley, ket matawid tida nga amin ya pannakatey. Ngem dacdackel nga unay ya siaayat nga asi ne̍ Apu Diyus, se̍ ya sagut na nga agpaay kadiya amin nga toley, gapu iya siaayat nga asi niya is-isa nga toley, nga itu nge̍ Je̍su Kristu.

¹⁶ Ket ya pagbanagan niya sagut nga ipaay ne̍ Apu Diyus gapu e̍ Kristu, sabali met pe̍ iya pagbanagan nito basul nito isa nga toley. Ta ya pagbanagan met nito is-isa nga basul nito Adan, ket ya panangeddeng ne̍ Apu Diyus, nga nagtungpal ngarud ka pannakaukum. Ngem no gapu iya sagut nga maipaay gapu e̍ Kristu nga gennung, maibilang nga nalinteg diya toley, orey adu diya naariman da nga basbasulin.

¹⁷ Tutu met nga gapu iya basul nito isa nga toley, naggundaway met ya pannakabalin niya patey, gapu mettas iyan nga isa nga toley. Ngem ita, nasigsiguradu lugudin ya panagnamnama tida nga dactida nad met ya aggundaway nga sibibiyag gapu iya isa pe̍ nga toley, nga itu nge̍ Je̍su Kristu. Ta inawat tidan ya nawadwad nga siaayat nga asi ne̍ Apu Diyus se̍ ya sagut na nga siaasi dactida, nga itu ya pannakaibilang tida nga nalinteg iya imatang na.

¹⁸ Ngarud, ya pagbanagan nito is-isa nga basul, ket itu ya panangukum ne̍ Apu Diyus kadiya amin nga toley. Ngem ya pagbanagan nito is-isa nga nalinteg nga nawangel, ket itu met ya pannakaibilang diya amin nga toley nga nalinteg da. Ket iya agten iyan, mae̍cdan tida nga amin ka biyag nga agnanayun.

¹⁹ Tutu met, ta gapu ito panagsukir nito isa nga toley e̍ Apu Diyus, naibilang tida nga amin nga managbasul. Ngem ya isa, gapu ito panangtungpal na kadiya gabay ne̍ Apu Diyus, mabalin tida pe̍ nga amin nga maibilang nga nalinteg.

²⁰ Ket ya Linteg ne̍ Muyse̍s, nabangun itun tasun maemmuwan diya toley nga adu diya pakabasulan da. Ngem orey no imadu diya basbasul dito toley, ket ad-adu latta met ya siaayat nga asi ne̍ Apu Diyus.

²¹ Agten iyan ngarud, tasun orey naggundaway ya basul, nga agbanag met iya pannakatey, ket aggundaway kuma lattan ya siaayat nga asi ne̍ Apu Diyus, nga itu ya agbanag iya pannakaibilang tida nga nalinteg. Ket iya agten iyan, mae̍cdan tidan ka biyag nga agnanayun gapu e̍ Je̍su Kristu nga Apu tida.