Ruma 4 - Ya Baru nga Tulag

To pannakaibilang nito Abraham nga nalinteg

¹ Ket no maipanggep ito Abraham nga am-ama tida nga nagtaudan tida nga Hudyu, kumaan nito pannakaibilang na nga nalinteg?

² Ket agten idi ngarud: No naibilang nga nalinteg to Abraham iya imatang ne̍ Apu Diyus gapu ngas kadito winangel na, mabalin nga uwed ngarud pagpasindayaw na. Ngem emmu tida nga madi met mabalin nito Abraham ya agpasindayaw iya imatang ne̍ Apu Diyus.

³ Ta agten ngarud iya kunen na iya Bibliya nga, “Pinati ne̍ Abraham to kunen ne̍ Apu Diyus. Ket gapu iya panamati na, nibilang ne̍ Apu Diyus nga nalinteg.”

⁴ Ket agten idi ya kaiyarigan na: Ya toley nga agwangel, ket matangdanan met. Bekken nga maibilang nga sagut ya tangdan na, no di lugud bayad niya bannug na.

⁵ Ngem bekken met nga agten iyan ya toley nga maibilang nga nalinteg iya imatang ne̍ Apu Diyus. Ta ya ibilang ne̍ Apu Diyus nga nalinteg, ket bekken nga ya toley nga mangpadas nga mangay-ayu igina gapu kadiya wanglen na, no di lugud ya toley nga mamati ngas igina. Ya panamati ngas niyan nga toley ya gapu na nga ibilang ne̍ Apu Diyus yan nga toley nga nalinteg iya imatang na. Ket e̍ Apu Diyus, ugali na met ya mangibilang ka nalinteg iya toley nga bekken nga sigud nga nalinteg iya imatang na.

⁶ Itu pe̍ ya kayat nga kagiyen nito Ari Dabid ito kinunen na nga nagasat ya toley nga ibilang ne̍ Apu Diyus nga nalinteg iya imatang na. Ta ya panangibilang ne̍ Apu Diyus nga nalinteg ya toley, awan met pakaibibiyangan niya wangel niyan nga toley.

⁷ Idi to kinunen nito Ari Dabid: “Nagasat diya toltoley nga napakawan ya kinadake̍c dan, nga liningdan ne̍ Apu Diyus diya basbasul dan.

⁸ Nagasat ngarud ya toley nga pulus nga madi ibilang niya Apu diya basul nan,” kunen na.

⁹ Ket iyan nga kinagasat nga kinagi nito Ari Dabid, bekken nas nga para kadiya Hudyu nga nakugit sigun iya ugali Hudyu, no di lugud agpaay met pe̍ kadiya bekken nga Hudyu nga bekken nga nakugit. Ta emmu tida ya kunen na iya Bibliya maipanggep e̍ Abraham, nga gapu was iya panamati na, nibilang ne̍ Apu Diyus nga nalinteg iya imatang na.

¹⁰ Ket to panangibilang ne̍ Apu Diyus ito Abraham nga nalinteg, non-ona met pe̍ ngem ito panangtungpal nito Abraham ito bilin ne̍ Apu Diyus igina nga agpakugit. Ngarud, bekken nga kalpasan nito pannakakugit na to pannakaibilang na nga nalinteg, no di lugud kasacbayan na.

¹¹ Ket to pannakakugit nito Abraham, itu ya isa nga pagilasinan nga mangpanecnec nga nibilang ne̍ Apu Diyus nga nalinteg gin, gapu ngas iya panamati na, orey ito di pekkem nakugit itun. Agten iyan ya napasamac tasun to Abraham, agbalin nga maibilang nga ama diya amin nga toltoley nga sumarunu igina nga ibilang ne̍ Apu Diyus nga nalinteg, gapu ngas iya panamati da, orey no bekken da nga nakugit.

¹² Ket dactida nga Hudyu nga nagtungpalin iya panagkugit, to Abraham met pe̍ ya maibilang nga ama tida, no tungpalen tida to nipasingen na nga pagtuladan tida, nga itu ya panamati na orey madi pekkem nga nagpakugit itun.

Matungpal to kari ne̍ Apu Diyus gapu ka panamati

¹³ Laglagipen tida kuma pe̍ to nikari ne̍ Apu Diyus itun e̍ Abraham se̍ kadiya kapututan na, nga tagikuwaen da nad ya amin nga uwed iya lubung, nga arig nga tawid da. Ta nikari ne̍ Apu Diyus yan, bekken nga gapu ta nagtungpal to Abraham ka linteg, no di lugud gapu ta naibilang nga nalinteg gapu iya panamati na.

¹⁴ Ta no diya agtungpal iya Linteg ya nagkariyan kuma ne̍ Apu Diyus itun nga mangtawid, awan met sirsirbi niya panamati yin, se̍ awan met pe̍ mamaay nito kari ne̍ Apu Diyus.

¹⁵ Ngem bekken ngarud nga ya Linteg ya gapu nito kari ne̍ Apu Diyus itun, ata ya Linteg, itu met ya pakalak-aman diya toley iya unget ne̍ Apu Diyus. Ket tutu met nga maibilang ngarud diya basul diya toley, malacsid no awan linteg nga nabangun.

¹⁶ Itu nga to kari ne̍ Apu Diyus ito Abraham, gapu was ito panamati nito Abraham. Agten iyan ngarud, tasun matungpal gapu iya siaayat nga asi ne̍ Apu Diyus, se̍ tasun siguradu nga maipaay kadiya amin nga naibilang nga kapututan nito Abraham. Ket didi nga naibilang nga kapututan nito Abraham, bekken nas nga diya kapututan na nga pasurut nito Linteg ne̍ Muyse̍s, no di pe̍ diya uwed panamati da nga agten ito panamati nito Abraham itun. Ta to Abraham met ya maibilang nga ama tida nga amin,

¹⁷ nga agten iya kunen ne̍ Apu Diyus iya Bibliya maipanggep igina, nga kunen na, “Pinagbalin naka nga ama diya adu nga toltoley kadiya adu nga il-ili,” kunen na. Ket iya agten iyan, siguradu nga matungpal yan nga kari ne̍ Apu Diyus. Ket e̍ Apu Diyus nga pinati ne̍ Abraham, itu mettas ya Diyus nga mangpaungar kadiya natey se̍ ya mangpauwed gapu iya bilin na kadiya awan pekkem.

¹⁸ Ket orey awan namnama nito Abraham nga makaputut itun, namati latta ito nikari ne̍ Apu Diyus igina, nga igina ya pagtaudan diya toltoley kadiya adu nad nga il-ili. Ta nibaga mettin ne̍ Apu Diyus igina itun nga, “Agten nad pe̍ kadiyan ya kaadu diya putputut mu,” kunen na.

¹⁹ Nganngani sangagasut ya dagun nito Abraham itunin. Ngem madi latta kimapuy ya panamati na e̍ Apu Diyus, orey nibilang na itun nga natey yin ya beggi na gapu ito kinalakay na, se̍ orey naemmuwan na pe̍ nga gapu iya kinabacbaket nito asawa na nga Sara, nalabes nga makaanac kin.

²⁰ Ngarud, orey agten iyan, madi met kimapuy to panamati nito Abraham itun, itu nga madi met nagduwaduwa iya panamati na ito kari ne̍ Apu Diyus igina. Ket napabileg met itun iya panamati na, ket nagdaydayaw pe̍ e̍ Apu Diyus.

²¹ Sinanama nga unay nge̍ Abraham itun nga kabaellan nga tungpalen ne̍ Apu Diyus to kari na igina.

²² Ket itu nga kunen na iya Bibliya maipanggep ito Abraham nga, “Gapu iya panamati na, nibilang ne̍ Apu Diyus nga nalinteg,” kunen na.

²³ Ngem bekken nas nga maipanggep ito Abraham to naisurat nga, “nibilang ne̍ Apu Diyus nga nalinteg.”

²⁴ Ta naisurat nga agpaay met pe̍ dactida, ata maibilang tida met pe̍ nga nalinteg no mamati tida e̍ Apu Diyus, nga igina ngarud ya nangpaungar e̍ Je̍sus nga Apu tida.

²⁵ Ket e̍ Je̍sus, igina met ya naiyawat nga napatey gapu kadiya basbasul tida. Ket napagungar tasun mapalinteg tida iya imatang ne̍ Apu Diyus.