Ruma 3 - Ya Baru nga Tulag

¹ Ket gapu ta agten iyan, mabalin nga pagarupen nun nga awan paglaingan niya kinaHudyu tidan, se̍ awan sirbi niya ugali nga pannakakugitin.

² Ngem adu met. Ta ya kangrunaan, diya Hudyu met diya nangitalkan ne̍ Apu Diyus iya nipakaemmu na nga kagi na.

Mapagtalkan nge̍ Apu Diyus iya kagi na

³ Ngem no bekken nga mapagtalkan diya duduma nga Hudyu iya kagi ne̍ Apu Diyus, nagan ngata ya wanglen ne̍ Apu Diyusin? Babawiyen na aya ya kagi na?

⁴ Bekken met! Ta napudnu met nge̍ Apu Diyus, orey no busid diya amin nga toley. Ta agten ngarud iya kunen na iya Bibliya maipanggep e̍ Apu Diyus, nga kunen na, “Agten iyan tasun maipasingen nga nalinteg ka no agkagi ka, se̍ tasun masingen nga mangabac ka iya orey nagan na nga mangibaga ka maikuntra ikew,” kunen na.

⁵ Ngem mabalin nga uwed toley nga agpambar nga kunen na nga bekken nga nalinteg ya panangukum ne̍ Apu Diyus dactida iya unget na gapu iya kinadake̍c tida. Ta gapu kanu iya kinadake̍c tida, nalawag nga maipasingen ya kinalinteg ne̍ Apu Diyus. Itu nga madi nactida kuma kanu nga ukumen gapu iya kinadake̍c tida. Agten iyan ngata ya kadawyan nga pambar diya toley.

⁶ Ngem bekken, a, ta no tutu nga bekken nga nalinteg nge̍ Apu Diyus iya panangukum na, kumaan ngarud niya pananglinteg na kadiya toley idi nga lubung?

⁷ Ket agpambar pe̍ diya duduma nga kunen da, “Gapu iya kinabusid ku wi, nalawag nga maipasingen ya kinapudnu ne̍ Apu Diyus, ket itu ya agpaay iya pakaidaydayawan na. Dikad pe̍ no nabaru ya pagbanagan niya kinabusid ku, ape̍ nga maukum mac pekkem nga arig nga isa nga sibabasul nga toley?” kunen da.

⁸ Ket ya pagbanagan niya agten iyan nga panpanunut, ket nabaru kanu no agariman tida ka dake̍c kin, tasun maipasingen kanu ya kinadayaw ne̍ Apu Diyus. Ket uwed da met pe̍ mangpadpadake̍c iyaken nin, nga pabasulen dac nga ibagac kanu ya agten iyan. Ngem diya agten kadiyan, ket rumbeng met ya pannakaukum da.

Awan toley nga nalinteg

⁹ Kumaan na ngarud? Nabarbaru kad ya kasasaad tida nga Hudyu ngem kadiya bekken nga Hudyu? Bekken met! Ta agten met ito nipalawag kun, nga diya Hudyu se̍ diya bekken nga Hudyu, agpadpada da met nga paiturayan iya pannakabalin niya basul.

¹⁰ Agten ngarud iya kunen na iya Bibliya nga agten idi: “Awan pulus toley nga nalinteg iya imatang ne̍ Apu Diyus, orey ngas no isa.

¹¹ Awan toley nga makaawat iya kinapudnu, se̍ awan pe̍ mayat nga mangemmu maipanggep e̍ Apu Diyus.

¹² Diya amin nga toley, inadeyyuwan da nge̍ Apu Diyusin. Ket amin da, nagbalin da nga dake̍c kin iya imatang ne̍ Apu Diyus. Awan pulus agariman ka nalinteg, orey ngas no isa.

¹³ Diya musung da, arig met nga silulukat nga tamen. Agkakadake̍c met nga kinabusid ya binalbalikas da. Se̍ arig nga makapatey diya kagi da, nga maiyarig iya gita malaga ya ibalikas da.

¹⁴ Adu met ya balikasen da nga lunud se̍ arig nga nape̍t nga kagi.

¹⁵ Nalaka pe̍ igida ya pumatey ka toley.

¹⁶ Ket gapu iya wangwanglen da, adu diya napasakitan se̍ naparigat.

¹⁷ Pulus nga madi da emmu ya makitunus kadiya kapada da.

¹⁸ Awan igida ya panagdayaw e̍ Apu Diyus,” kunen na.

¹⁹ Ket naemmuwan tida ngarudin nga diya bilbilin niya Linteg ne̍ Muyse̍s, naipaay da ngarud kadiya Hudyu, nga itu diya nabilin. Ket iya agten iyan, nabangun ya Linteg tasun orey nagan na nga toley, Hudyu man winno bekken nga Hudyu, awan rasun na iya panangukum ne̍ Apu Diyus igina. Nabangun pe̍ tasun maemmuwan ya nagbasulan diya amin nga toley iya lubung ngi.

²⁰ Itu nga awan toley nga mapalinteg iya imatang ne̍ Apu Diyus gapu iya panagtungpal na iya Linteg. Ta ya Linteg, itu mettas ya mangipakaemmu dactida kadiya basbasul tida.

Ya panangpalinteg ne̍ Apu Diyus iya toley

²¹ Ngem ita, naipakaemmu win ya panangibilang ne̍ Apu Diyus nga nalinteg ya toley iya imatang na, ket awan met pakaibibiyangan niya linteg iya panangibilang na. Orey to Linteg ne̍ Muyse̍s se̍ to kinunen dito mammadtu itun, panecnekkan da pe̍ yan.

²² Ket agten idi: Gapu iya panamati diya toltoley nga mamati e̍ Je̍su Kristu, ibilang ne̍ Apu Diyus da nga amin nga nalinteg iya imatang na. Agten iyan ngarud, ta iya imatang ne̍ Apu Diyus, awan pulus pagdudumaan diya toley.

²³ Ta amin tida, nagbasul tida met, ket awan dactida ya makabael nga mairaman iya nadayaw nga kasasaad ne̍ Apu Diyus.

²⁴ Ngem maibilang tida nga nalinteg iya imatang ne̍ Apu Diyus gapu was iya siaayat nga asi na, nga naisagut dactida gapu met ito panangwayawaya ne̍ Kristu Je̍sus dactida.

²⁵ Ket igina met ya nisaad ne̍ Apu Diyus nga silalatac, tasun gapu iya pannakaidaga niya beggi na, igina ya pakaudasan nga pakapakawanan diya basbasul diya toley, gapu iya panamati da. Inariman ne̍ Apu Diyus yan, tasun ipasingen na ya kinalinteg na. Ta agten idi: Itun pekkem nga timpu, inanusan na ngas diya toley kadiya basbasul da, nga madi na da dinusa.

²⁶ Ngem iya agdama nga timpu wi, ipasingen ngarud ne̍ Apu Diyusin ya kinalinteg na. Ket iya agten iyan, naipanecnec itan nga nalinteg ngarud nge̍ Apu Diyus, se̍ naipanecnec met pe̍ nga ibilang na nga nalinteg diya mamati e̍ Je̍sus.

²⁷ Dikad pe̍ madi tida met mabalin ya agpasindayaw maipanggep iya pannakaibilang tida nga nalinteg. Ngarud, awan pagpasindayaw tida, ta bekken nga ya panangtungpal tida iya Linteg ya gapu niya pannakaibilang tida nga nalinteg, no di lugud ya panamati tida ngas ya gapu na.

²⁸ Ta ya patiyen tidan, ket maibilang nga nalinteg ya toley iya imatang ne̍ Apu Diyus gapu ngas iya panamati na, nga awan met pakaibibiyangan niya panangtungpal niya toley iya Linteg ne̍ Muyse̍s.

²⁹ Ket nagan ya kunen tida? Diyan nas Hudyu kad ya akin-Diyus e̍ Apu Diyus? Bekken kad nga igina pe̍ ya Diyus diya bekken nga Hudyu? Igina met! Ta e̍ Apu Diyus, igina ngarud met ya Diyus pe̍ diya bekken nga Hudyu.

³⁰ Ta is-isa ngarud ya Diyus diya amin nga toltoley. Ket no diya Hudyu nga nakugitin sigun iya ugali Hudyu, ibilang na da nga nalinteg gapu iya panamati da. Ket agten met pe̍ iyan diya bekken nga Hudyu nga bekken nga nakugit, ta gapu pe̍ iya panamati da ya pannakapalinteg da iya imatang ne̍ Apu Diyus.

³¹ Ngem madi kayu kuma nga pagarupen nga gapu idi nga panamati tida, pagbalinen tida nga awanin mamaay niya Linteg ne̍ Muyse̍s. Bekken met nga agten iyan, ta ya kinapudnu na, ket gapu iya panamati tida, ipasingen tida ya pudnu nga kaipapennan niya Linteg.