Ruma 2 - Ya Baru nga Tulag

Ya nalinteg nga panangukum ne̍ Apu Diyus

¹ Ket iya agten iyan, gagayyem, ape̍ aya nga mangpabasul kayu kadiya duduma nga toley maipanggep kadiya basbasul da? Ta ya mangpabasul, awan met pagpambar na e̍ Apu Diyus, ata wanglen na met pe̍ ya agten mettas nga pagbasulan na. Dikad pe̍ orey nagan na nga mangpabasul ka sabali nga toley, ukumen na met pe̍ ya mismu nga beggi na.

² Ngem no e̍ Apu Diyus, emmu tida nga nalinteg ya panangukum na kadiya toltoley nga agwangel kadito dake̍c nga nibagac.

³ Ket iya agten iyan, gagayyem, dakayu nga mangpabasul kadiya agwangel kadiya agten iyan, madi kayu pagarupen nga maliclikan nu ya panangukum ne̍ Apu Diyus, ta wangwanglen nu met pe̍ diya agten iyan nga dake̍c.

⁴ Kaynun no pagarup nu nga mabalin nu nga namnamaen ya dackel nga kinaasi, kinaanus, se̍ panagibtur ne̍ Apu Diyus. Di kayu kad emmu nga ya asi ne̍ Apu Diyus, ipaay na met dakayu tasun agbabawi kayu kuma?

⁵ Ngem gapu ta nasukir kayu se̍ madi kayu gabay ya agbabawi, ket pakaruwen nu met ya unget ne̍ Apu Diyus. Ket madateng nu ngarud nad ya Timpu nga panangipasingen ne̍ Apu Diyus iya unget na, nga itu met ya panangipasingen na nad iya nalinteg nga panangukum na.

⁶ Ta gun-gunaan nad ne̍ Apu Diyus ya tunggal toley ka maitutup mettas sigun iya winangel da.

⁷ Agten idi ya pananggun-guna na kadiya toley: Uwed da toley nga siaanus nga agwangwangel ka nabaru, gapu ta ipateg da ya panangpadayaw se̍ panangparaem ne̍ Apu Diyus igida, se̍ ya awan patingga na nga biyag nga ipaay na. Ket didi nga toley met diya pangipaayan nad ne̍ Apu Diyus iya biyag nga agnanayun.

⁸ Ngem uwed da pe̍ toley nga mayat nga maipangatu ya kaipapennan da, se̍ mangdellaw iya pudnu tasun suruten da ya dake̍c. Ket didi nga toley met diya pangipaayan nad ne̍ Apu Diyus iya gura se̍ unget na.

⁹ Agrigat se̍ agtuuc nad diya amin nga toley nga agwangel ka dake̍c, Hudyu man, winno bekken nga Hudyu, ngem nangnangruna diya Hudyu.

¹⁰ Ngem diya amin nga agwangel ka nabaru, Hudyu man winno orey diya bekken nga Hudyu, mae̍cdan da nad ka dayaw, raem, se̍ talna nga gayat e̍ Apu Diyus.

¹¹ Ta no e̍ Apu Diyus, awan met toley nga idumduma na iya panangukum na winno iya panage̍cde̍ na.

¹² Tutu met yan, ta orey diya makabasul nga madi makaemmu iya Linteg ne̍ Muyse̍s, maukum da met pe̍ nga mapukaw, ngem bekken nga ya Linteg ne̍ Muyse̍s ya pakaukuman da. Ket diya makabasul nga makaemmu iya banag niya Linteg ne̍ Muyse̍s, ya Linteg met ya pakaukuman dan.

¹³ Ta no maipanggep iya panangpalinteg ne̍ Apu Diyus, ket agten idi: Diya maibilang nga nalinteg iya imatang ne̍ Apu Diyus, bekken nga diya aggigicna ngas maipanggep iya Linteg, no di lugud diya agtungpal iya banag niya Linteg.

¹⁴ Ta no diya bekken nga Hudyu, madi da ngarud emmu ya Linteg ne̍ Muyse̍s. Ngem sigud nga uwed emmu da nga kustu nga wanglen da kuma, nga maitutup ngarud iya banag diya bilbilin niya Linteg ne̍ Muyse̍s. Ket iya agten iyan, uwed mismu nga linteg dan iya lemlemmet da, orey madi da emmu ya Linteg ne̍ Muyse̍s.

¹⁵ Ket nabatadin nga uwed iya lemlemmet da ya banag dito bilbilin nito Linteg mettas ne̍ Muyse̍s, nga arig nga nailanad dan kadiya lemlemmet da. Ta gapu iya lemlemmet da, mailasin da mettas iya panpanunut da no nabaru winno dake̍c ya wangwanglen da.

¹⁶ Ket sigun iya ikaskasabac nga Makaparagsac nga Damag, ukumen nad ngarud ne̍ Apu Diyus diya basbasul diya toley, gapu e̍ Kristu Je̍sus. Ket no iyan nad nga Timpu, itu nad met ya pannakaukum diya toltoley kadiya nalimed nga pangpanggep dan.

Maipanggep kadiya Hudyu se̍ ya Linteg da

¹⁷ Ket ikew nga Hudyu nga mangipateg iya kinaHudyum, ya Linteg ne̍ Muyse̍s met ya namnamaem, se̍ ipasindayaw mu met pe̍ ya pannakaibilang mu nga toley ne̍ Apu Diyus.

¹⁸ Emmum ya tarigagay ne̍ Apu Diyus, se̍ emmum pe̍ diya kustu nga banbanag, nga itu ya kunem nga annamungam, ta nasursuruwan ka iya Linteg ne̍ Muyse̍s.

¹⁹ Ket kunem nga ikew ya mangidalan kadiya arig nga kulap, se̍ kunem pe̍ nga maiyarig ka iya mangwada kadiya uwed iya nagicbet.

²⁰ Kunem pe̍ nga ikew ya mangisuru kadiya nakurang pekkem ya pannakaawat da se̍ diya arig nga ebbing pekkem ya panpanunut da. Ket kunem nga siguradu ka kadidi, ata uwed ikew ya Linteg ne̍ Muyse̍s, ket itu ya mangipakaemmu iya tutu nga kinasirib se̍ kinapudnu.

²¹ Ngem no tutu nga isurum ya duduma nga toley, ape̍ ngarud nga di mu maisuru ya mismu nga beggim? Isurum ngarud nga dake̍c ya panagtakew, ngem ikew, agtakew ka met.

²² Isurum met pe̍ nga maiparit ya pannakitipun niya toley ka bekken na nga asawa, ngem makitipun ka met ka bekken mu nga asawa. Kunem nga kaguram diya didiyusen, ngem umuneg ka met kadiya pagdaydayawan da kadiyan, tasun takawem met diya alikamen iyan!

²³ Kunem met nga pagpasindayaw mu ya Linteg, ngem padake̍kem met ya kinadayaw ne̍ Apu Diyus, gapu ta salungasingem met ya Linteg.

²⁴ Tutu met ya naisurat iya Bibliya nga kunen na, “Gapu dakayu nga Hudyu, agkagkagi diya bekken nga Hudyu ka dake̍c maipanggep e̍ Apu Diyus.”

²⁵ No maipanggep iya ugali Hudyu, uwed ngarud kaipapennan niya panangtungpal mu iya ugali nga pannakakugit, no tungpalem pe̍ ya Linteg. Ngem no salungasingem ya Linteg, nagbalin kan nga arig nga bekken nga nakugit.

²⁶ Ket no uwed isa nga toley nga bekken nga nakugit sigun iya ugali Hudyu, ngem agtungpal nga tutu iya bilin niya Linteg, ket ibilang met ne̍ Apu Diyus nga isa mettin nga nakugit, orey no bekken.

²⁷ Ket iya agten iyan, gapu iya panangtungpal diya bekken nga Hudyu iya Linteg ne̍ Muyse̍s, ipasingen da mettin ya kinadake̍c mu, orey Hudyu ka. Ta orey pe̍ nakugit ka, se̍ uwed ikew ya naisurat nga Linteg, madi ka met tungpalen.

²⁸ Tutu met yan, ta orey naiyanac tida nga Hudyu, mabalin nga bekken tida nga maibilang nga Hudyu iya imatang ne̍ Apu Diyus. Se̍ ya masingen iya beggi tida, bekken nga itu ya tutu nga kaipapennan niya pannakakugit.

²⁹ Ta ya maibilang nga pudnu nga Hudyu iya imatang ne̍ Apu Diyus, itu ya uwed iya nakem na nga gennung ya pudnu nga kinaHudyu na. Ket ya tutu nga kaipapennan niya pannakakugit, ket maipanggep ngarud iya wanglen niya Ispiritu ne̍ Apu Diyus iya nakem niya toley, bekken nga ya panagtungpal niya toley iya naisurat nga linteg. Ket ya pannakaidayaw niya agten iyan nga toley, gayat met e̍ Apu Diyus, bekken nga gayat ka toley.