Ruma 16 - Ya Baru nga Tulag

To panagpakumusta ne̍ Pablu kadito taga-Ruma

¹ Gabay ku nga iyem-emmu dakayu nge̍ kabsat tida nga Pe̍be̍, nga igina ya isa nga babey nga katulungan niya bungguy mamati nga uwed idi Se̍nkre̍ya.

² Awaten nu kuma, nga ibilang nu kuma nga isa nga kabulun tida nga mamati iya Apu, ta itu ya ugali nga maitutup iya wanglen diya toley ne̍ Apu Diyus. Ket tulungan nu kuma pe̍ iya orey nagan na nga masapul na nad dakayu, ta igina, ket isa nga managtulung met ka adu nga toley. Ket iyaken met pe̍ ya isa kadito tinulungan na.

³ Isurat ku ya pakumustac kade̍ Prisila nge̍ Akila nga kabulun ku nga agsirsirbi e̍ Kristu Je̍sus.

⁴ Ket igida, nipusta da met ya biyag da para iyaken itun. Agyaman nac ngarud igida, ket bekken nas nga iyaken ya agyaman igida, no di pe̍ diya amin nga bungguy diya mamati nga bekken nga Hudyu.

⁵ Ket pakumustaac met pe̍ diya mamati nga aggigimung iya baley de̍ Prisila nge̍ Akila. Pakumustaac pe̍ nge̍ E̍pe̍ne̍tu nga patgec nga gayyem, nga igina ya kaonaan nga namati e̍ Kristu iya prubinsiya nga Asiya.

⁶ Pakumustaac pe̍ nge̍ Marya, nga isa nga nagaget nga timultulung dakayu.

⁷ Pakumustaac pe̍ de̍ Adruniku nge̍ Hunya nga padac nga Hudyu se̍ kabulun ku nga naibalud itun. Naibilang da met nga naraem kadiya apustule̍s, ket non-ona da pe̍ ngem iyaken nga namati e̍ Kristu.

⁸ Pakumustaac met pe̍ nge̍ Ampliyatu, nga patgec nga kabulun ka pammati iya Apu.

⁹ Pakumustaac met pe̍ nge̍ Urbanu nga kawanglan mi iya panagsirbi mi e̍ Kristu, se̍ e̍ E̍stakis nga patgec nga gayyem.

¹⁰ Pakumustaac pe̍ nge̍ Ape̍le̍s, nga isa nga naipanecnec ya panamati na e̍ Kristu. Ket ya kakobung ne̍ Aristubulu, pakumustaac pe̍.

¹¹ Pakumustaac nge̍ He̍rudyun nga padac pe̍ nga Hudyu, se̍ diya kakobung ne̍ Narsisu nga padac nga mamati iya Apu.

¹² Ket de̍ Tripe̍na nge̍ Tripusa, nga agpaay ya wangel da iya Apu, pakumustaac da pe̍, agten met ya patgec nga Pe̍rsida nga adu pe̍ ya nawangel na nga maipaay iya Apu.

¹³ Pakumustaac nge̍ Rupu nga isa nga nalatac nga agsirsirbi iya Apu, agraman ya ina na nga ibilang ku pe̍ nga arig nga inac.

¹⁴ Pakumustaac pe̍ de̍ Asinkritu, Ple̍gonte̍, He̍rme̍s, Patrubas, He̍rmas, se̍ diya amin nga kakabsat tida ka pammati nga kabulun da.

¹⁵ Pakumustaac pe̍ de̍ Pilulugu, Hulya, Ne̍ryu, se̍ ya kabsat na nga babey, se̍ e̍ Ulimpas, se̍ amin nga toley ne̍ Apu Diyus nga uwed iya edyan da.

¹⁶ Ket no dakayu, agkikinnablaaw kayu kuma ka sipupudnu nga agec nga pangpakumusta nu. Ket pakumustaan dakayu kanu pe̍ diya mamati e̍ Kristu kadiya amin nga bungguy diya mamati ennidi.

To nodi nga pamagbaga ne̍ Pablu kadito taga-Ruma

¹⁷ Ket kakabsat, ibilin ku nga sipapasnec dakayu nga annadan nu diya toley nga mangpirdi kuma iya panagtutunus nu se̍ mangiyaw-awan dakayu iya panamati nu. Itu diya sumupyat iya panursuru nga naisuru dakayu. Ket adeyyuwan nu ngarud diya agten iyan nga toley.

¹⁸ Ta diya agariman ka agten iyan, bekken nga e̍ Kristu nga Apu tida ya pagsirsirbiyan da, no di lugud diya ricricna ngas niya beggi da ya ipangpangruna da. Allilawen da ngarud ya panpanunut diya oosogen nga toley, gapu kadiya napaw-is nga kagi da nga makaawis.

¹⁹ Ngem no dakayu, agdindinamag ya panagtungpal nu iya pammati tida, ket itu ya gapu na nga maragsakan nac gapu dakayu. Ket gabay ku no diya nabaru kuma ngas ya emmu nu nga tungpalen. Ket no maipanggep iya dake̍c, madi kayu kuma pulus nga padasen nga gennung.

²⁰ Ket e̍ Apu Diyus nga mangpatalna dactida, ket dagus nga abaken na nge̍ Satanas, nga arig nga ipagudel na dakayu. Uwed kuma dakayu ya siaayat nga asi niya Apu tida nga Je̍sus.

²¹ Pakumustaan nakayu kanu nge̍ Timutyu nga kawanglac ennidi. Pakumustaan dakayu kanu met pe̍ de̍ Lusiyu, Diyasun, se̍ Susipatru nga padac nga Hudyu.

²² Ket iyaken nge̍ Te̍rsiyu nga pinagsurat ne̍ Pablu idi nga surat na dakayu. Pakumustaan nakayu pe̍, dakayu nga kakabsat ku ka pammati iya Apu.

²³ Pakumustaan nakayu kanu pe̍ nge̍ Gayu, nga igina ya mangsangsangaili iyaken iya baley na, nga itu pe̍ ya paggigimungan diya mamati ennidi. Ket e̍ E̍rastu nga te̍sure̍ru nidi nga ili, se̍ e̍ kabsat tida nga Kuwartu, pakumustaan dakayu pe̍.

²⁴ [Ngarud, uwed kuma dakayu nga amin ya siaayat nga asi niya Apu tida nga Je̍su Kristu. Agten iyan kuma.]

To panagdaydayaw ne̍ Pablu e̍ Apu Diyus

²⁵ Madaydayaw kuma ngarud nge̍ Apu Diyus. Ket no igina, mabalin nakayu nga pabilgen iya panamati nu, maikanatad mettas iya panggep niya Makaparagsac nga Damag nga isursuruc, se̍ ya panggep met pe̍ niya pannakaikaskasaba niyan nga damag maipanggep e̍ Je̍su Kristu. Ket itu pe̍ ya pannakaipakaemmu niya ranta ne̍ Apu Diyus, nga nailimed ka nabayag itun.

²⁶ Ngem ita, naipakaemmu mettin ya banag niyan nga ranta na. Ket naemmuwan ngarud gapu mettas kadito nipaisurat ne̍ Apu Diyus kadito mammadtu itun. Naipakaemmu ngarudin yan nga ranta na kadiya amin nga pagiliyan iya lubung, gapu ta itu met ya nibilin niya agnanayun nga Diyus, tasun maawis diya toltoley nga mamati se̍ sumurut igina.

²⁷ Itu nga kunec nga madaydayaw kuma ka agnanayun nge̍ Apu Diyus. Igina ngas met ya Diyus nga makaemmu iya amin, ket madaydayaw kuma ngarud gapu iya pannakapadayaw ne̍ Je̍su Kristu. Agten iyan kuma ngarud.