Ruma 15 - Ya Baru nga Tulag

Patpatgen tida kuma ya kapada tida

¹ Ket dactida nga nabileg ya panamati na maipanggep kadiyan, rebbeng tida nga ibiyang nga siaanus diya pagkapsutan diya nakapsut pekkem ya panamati na. Ta bekken kuma nga ya pakaragsakan ngas niya mismu tida nga beggi ya bibiyangan tida.

² Ngarud, ya tunggal isa dactida, ket biyangan tida ya pakaragsakan niya kapada tida, tasun mapabileg ya panamati na.

³ Ta malagip tida kuma nge̍ Kristu. Bekken met nga ya beggi na ngas to linaglagip na, no di lugud agten pe̍ iya naisurat iya Bibliya itun pekkem nga kinunen na e̍ Apu Diyus nga, “Iyaken nin ya uy-uyawen dito manguy-uyaw ikew,” kunen na.

⁴ Ket emmu tida nga amin nga naisurat itun pekkem iya Bibliya, ket maipaay da ngarud iya pakaadalan tida, nga mangpabileg iya namnama tida e̍ Apu Diyus. Ta gapu iya banag diya naisurat iya Bibliya, situtured tida nga aganus, se̍ maliwliwa tida pe̍.

⁵ Ket e̍ Apu Diyus ngarud ya pagtaudan niya anus tida, se̍ igina pe̍ ya mangliwliwa dactida. Ket sapay kuma ta igina ya tumulung dakayu, tasun agkaykaysa ya panpanunut nu, nga agten mettas ito gangey ne̍ Kristu Je̍sus, nga nipasingen na dactida nga pagtuladan tida.

⁶ Agten iyan kuma ngarud, tasun agkaykaysa kayu nga mangidaydayaw e̍ Apu Diyus nga Diyus se̍ Ama niya Apu tida nga Je̍su Kristu.

Ya pakaragsakan diya bekken nga Hudyu

⁷ Ngarud, awaten nu kuma ya tumunggal isa dakayu, nga agten mettas ito panangawat ne̍ Kristu dakayu, tasun madaydayaw nge̍ Apu Diyus.

⁸ Ket ipalagip ku dakayu to numbe̍tan ne̍ Kristu itun: Inumbe̍t nga nagbalin nga agsirsirbi kadiya Hudyu, tasun ipasingen na nga mapagtalkan nge̍ Apu Diyus nga mangtungpal kadito karkari na kadito am-ama da.

⁹ Ket orey no diya bekken nga Hudyu, nagpaay met pe̍ nge̍ Kristu igida, tasun agdaydayaw da pe̍ e̍ Apu Diyus gapu iya panangaasi na igida, nga agten iya naisurat iya Bibliya nga kunen na, “Itu nga ikagic nad met ya panagdayaw ku ikew iya imatang diya bekken nga Hudyu, se̍ ikantac nad pe̍ igida ya kinadayaw mu,” kunen na.

¹⁰ Ket kunen na pe̍, “Dakayu nga bekken nga Hudyu, makipagragsac kayu ngarud kadiya toley ne̍ Apu Diyus,” kunen na.

¹¹ Se̍ kunen na pe̍, “Dayawen nu ya Apu, dakayu nga amin nga bekken nga Hudyu. Ngarud, diya amin nga toltoley, dayawen da kuma ya Apu,” kunen na.

¹² Ket kinunen pe̍ nito mammadtu nga Isayas nga, “Uwed nad maiyanac nga isa nga kapututan ne̍ He̍sse̍, ket igina nad met ya maisaad nga mangituray kadiya bekken nga Hudyu. Ket igina nad pe̍ ya pangnamnamaan diya bekken nga Hudyu,” kunen na.

¹³ Sapay kuma ta e̍ Apu Diyus nga paggayatan niya namnama tida, paragsaken nakayu kuma ka napalaus nga anggem se̍ talna, gapu iya panamati nu igina. Agten iyan kuma ngarud tasun dumacdackel ya namnama nu igina, gapu iya pannakabalin niya Ispiritu Santu nga uwed dakayu.

Ya gapu nidi nga panagsurat ne̍ Pablu

¹⁴ Ket ya kunec, kakabsat ku, awan panagduwaduwac maipanggep dakayu. Ta emmuc nga nanacman kayu nga tutu, se̍ naemmuwan nu pe̍ yin diya amin nga sursuru maipanggep iya pammati tida, ket makapagsisinnuru kayun.

¹⁵ Ngem orey agten iyan, natured dac latta nga nagsurat maipanggep kadito banbanag nga nipalagip ku dakayun. Natured dac ngarud, gapu iya siaayat nga nikaasi ne̍ Apu Diyus iyaken nga saad ku.

¹⁶ Ta nisaad nac ngarud nga agsirsirbi e̍ Kristu Je̍sus para kadiya bekken nga Hudyu. Agsirsirbi yac kunec, ta gapu iya panangikaskasabac iya Makaparagsac nga Damag, iyarig ku met yani nga wangel ku kadiya wangel diya agsirsirbi iya Te̍mplu. Ta ipaay ku e̍ Apu Diyus diya bekken nga Hudyu nga mamati yin, nga arig nga igida ya idatun ku e̍ Apu Diyusin. Ket igida, maiyarig da nga pagdatun nga makaay-ayu ngarud e̍ Apu Diyus, ket nagbalin dan nga agpaay igina gapu iya Ispiritu Santu.

¹⁷ Dikad pe̍ gapu iya pannakaibulun ku e̍ Kristu Je̍sus, uwed mettin maipasindayaw ku maipanggep iya wangel ku para e̍ Apu Diyus.

¹⁸ Ta di yac met agtured nga agkagi maipanggep kadiya duduma nga banbanag, malacsid ngas maipanggep kadiya nipawangel ne̍ Kristu iyaken nga mangawis kadiya bekken nga Hudyu, tasun sumurut da pe̍ e̍ Apu Diyus. Ket diya kinagic se̍ diya winangel ku, itu ya nangawis ku igida.

¹⁹ Se̍ nangawis ku pe̍ diya pagilasinan se̍ nakaskasdaaw nga naariman ku gapu iya pannakabalin niya Ispiritu ne̍ Apu Diyus. Ket itan, natungpal kun ya panagpaspasyar ku nga nangipakaemmu iya Makaparagsac nga Damag maipanggep e̍ Kristu, manipud ka He̍rusale̍m agingga ka Iliriku.

²⁰ Ket iya agten iyan, nisnup ku ya mangisursuru iya Makaparagsac nga Damag kadiya il-ili nga di pekkem napadamagan maipanggep e̍ Kristu. Ta bekken ku nga panggep ya mangituluy kadiya wangel nga nirugi niya sabali nga toley,

²¹ no di lugud panggep ku ya agten ito naisurat iya Bibliya, nga kunen na, “Diya di pekkem nakadamag iya maipanggep igina, maemmuwan da nad mettas. Ngarud, diya di pekkem nakagicna maipanggep igina, maawatan da nad mettin,” kunen na.

Ya ranta ne̍ Pablu nga mawe̍ ka Ruma

²² Ket gapu iyan nga wangel ku nga panangipakaemmu iya Makaparagsac nga Damag, name̍n-adu nga natactakac nga umbe̍t dakayu.

²³ Ngem ita, laglagipec manin ya panggep ku nga bisitaen nakayu, ta nalpas kun ya wangel ku kadidi nga il-ili, ket piga nga dagunin nga uwed iyaken yani nga panggep nga umbe̍t bumisita dakayu.

²⁴ Ket sapay kuma ta no mabalin, dumagas sac iya edyan nu nga bumisita nad dakayu no agpa-Ispanya ngac. Ket kalpasan niya pannakianggem ku nad dakayu ka e̍teng, mabalin nga tulungan dac kuma iya panagbulay ku nga mawe̍ ka Ispanya ngin.

²⁵ Ngem ita, mawe̍ yac pekkem enna He̍rusale̍m, nga mangitulud ka tulung kadiya toley ne̍ Apu Diyus antuni.

²⁶ Ta diya mamati kadiya prubinsiya nga Mase̍dunya se̍ Gre̍siya, gabay da nga maitulud ya tulung da kadiya makasapul nga toley ne̍ Apu Diyus ka He̍rusale̍m.

²⁷ Igida mettas ya akin-nakem nga tumulung kadiya Hudyu ka He̍rusale̍m. Ket ya kinapudnu na, uwed ngarud arig nga utang da kadiya mamati nga Hudyu. Ta diya bekken nga Hudyu, nairaman dan kadiya nabaru nga banbanag nga nipaay ne̍ Apu Diyus kadiya Hudyu. Itu nga rebbeng ngarud met diya bekken nga Hudyu ya tumulung kadiya Hudyu kadiya kasapulan niya panagbiyag da.

²⁸ Dikad pe̍ no malpas kun yan nga gagarac nga mangitulud iyan nga ur-ur da igida ka He̍rusale̍m, agbulay yac nad nga mawe̍ ka Ispanya ngin, ket dumagas sac nga mona iya edyan nu.

²⁹ Ket siguradu wac nga no uwed dac nad iya edyan nu, aglak-am tida ngarud iya kustu nga panangparagsac ne̍ Kristu dactida.

³⁰ Ket kakabsat, ipacpakaasic dakayu nga makipagkararag kayu kay iyaken e̍ Apu Diyus. Ta gapu iya panamati tida iya Apu tida nga Je̍su Kristu, se̍ gapu iya panagiinnayat tida nga gayat iya Ispiritu ne̍ Apu Diyus, ipasnec nu kuma ya makipagkararag iyaken e̍ Apu Diyus maipanggep iya kasasaad ku.

³¹ Ikararag nu kay nga mailisi yac kuma kadiya sicsikat diya madi mamati e̍ Je̍su Kristu ka Hudya. Ikararag nu kay pe̍ nga agkikinnaawatan kami nad diya toley ne̍ Apu Diyus ka He̍rusale̍m maipanggep iya itulud ku nga tulung diya bekken nga Hudyu igida.

³² Agten iyan kuma, tasun no ipalubus ne̍ Apu Diyus, makalbe̍t tac nad dakayu nga siaanggem. Ket emmuc nga maliwliwa ngac nad pe̍ gapu iya ibibisitac dakayu.

³³ Sapay kuma ta uwed dakayu nga amin nge̍ Apu Diyus nga mangpatalna. Agten iyan kuma.