Ruma 14 - Ya Baru nga Tulag

E̍ Apu Diyus ya mangeddeng kadiya wanglen niya toley

¹ Ket no maipanggep iya isa nga mamati nga nakapsut pekkem ya panamati na, awaten nu kuma pe̍, ngem bekken kuma nga tasun diskutiren nu maipanggep kadiya kapanunutan na.

² Ta nadumaduma ya panagawat diya toley maipanggep iya maipalubus igida gapu iya panamati da. Mabalin nga uwed agkunen nga mabalin na ya mangan ka orey nagan na nga makan, nga awan kanu maiparit igina. Ngem ya nakapsut pekkem ya panamati na, mabalin nga kunen na nga natnateng kanu ngas ya masida na.

³ Ngem orey kunen niya isa nga mabalin na ya mangan ka orey nagan na, madi na kuma laisen ya madi mangan kadiyan. Ket ya agsida ngas kadiya natnateng, madi na kuma nga ibilang nga dake̍c ya toley nga mangan ka orey nagan na, ta ibilang met ne̍ Apu Diyus nga toley na pe̍ yan nga toley.

⁴ Ta kaspagarigan no ya tagabu, emmu nu nga bekken nu nga rebbeng ya mangeddeng iya isa nga tagabu niya sabali. Ya amu na mettas ya makaemmu nga mangeddeng igina, no maannamungan kuma winno madusa. Ket maannamungan ngarud ya mamati, ta uwed met iya Apu ya turay nga mangannamung igina.

⁵ Ket no maipanggep kadiya al-algew, mabalin nga kunen niya isa nga toley nga uwed da algew nga napatpateg ngem kadiya duduma nga algew. Ket kunen met niya sabali nga agpapada ya pateg diya amin nga algew. Ngem ya kunec, ket orey nagan na nga kapanunutan niya tunggal isa nga toley maipanggep kadiya al-algew, masapul nga awan kuma panagduwaduwa na iya kapanunutan na.

⁶ Ya toley nga mangipateg ka isa nga algew, pammadayaw na met iya Apu ya panangipateg na. Ket ya toley nga siwayawaya nga mangan ka orey nagan na, pammadayaw na pe̍ iya Apu, ta agyaman yan nga toley e̍ Apu Diyus gapu iya makan. Ket ya madi mangan ka nadumaduma nga makan, pammadayaw na met pe̍ iya Apu yan, ta agyaman pe̍ e̍ Apu Diyus.

⁷ Ya Apu ngarud ya laglagipen tida, ta ya panagbiyag tida, bekken nas nga dactida ya mangbiyang iyan. Se̍ ya pannakatey tida, bekken pe̍ nga dactida ngas ya mangbiyang iyan.

⁸ Ta no sibibiyag tida pekkem, maipaay iya Apu ya panagbiyag tida. Ket orey no matey tida, pakaidayawan pe̍ niya Apu ya pannakatey tida. Dikad pe̍ orey sibibiyag tida winno matey tida, kuwa nactida met latta ya Apu.

⁹ Agten iyan nga tutu, ta e̍ Kristu, natey se̍ nagungar, tasun igina ya nagbalin nga Apu diya sibibiyag se̍ orey pe̍ diya natey yin.

¹⁰ Itu nga bekken nga rumbeng no ibilang nu nga dake̍c winno laisen nu ya kabsat nu ka pammati. Ta amin tida, maisangu tida nad e̍ Apu Diyus tasun kedngan nactida.

¹¹ Tutu met yan, ta naisurat iya Bibliya nga kunen na, “Kunen niya Apu, ‘Emmu nu met nga sibibiyag gac. Itu nga patiyen nu kuma pe̍ nga agparintumeng nad nga agdaydayaw diya amin nga toley iya sanguc. Ket amin da, ikagi da nad met nga sidadayaw nga iyaken ya Diyus,’” kunen na.

¹² Ket iya agten iyan, emmu tidan nga ya tunggal isa dactida ya makaemmu nad nga sumungbat e̍ Apu Diyus maipanggep kadiya winangwangel na.

Madi tida kuma pagbasulen diya kakabsat tida

¹³ Dikad pe̍ bay-an tida kuma ngarudin ya panangdellaw kadiya pada tida nga mamati. Ya wanglen tida kuma lugud, ket lagipen tida kuma diya kakabsat tida, nga di tida ngarud agariman ka arig nga pakaisacdulan da winno pakaigapuwan niya panagbasul da.

¹⁴ Ket no iyaken, gapu iya pannakibulun tida e̍ Apu Je̍sus, siguradu wac nga awan sigud nga naibilang nga dake̍c iya imatang ne̍ Apu Diyus. Ngem no patiyen niya isa nga toley nga uwed naibilang nga dake̍c, basul na ngarud met no madi na iparit iya beggi na.

¹⁵ Itu nga no masakitan ya nakem niya isa nga kabsat mu ka pammati gapu iya mabalin mu nga kanen nga iparit na iya beggi na, bekken met nga tumaud iya panagayat, no kanem latta. Madi kayu kuma ngarud pirdiyen ya panamati niya isa nga toley gapu was iya makan nu, ta igina met ya isa nga pagpaayan nito pannakatey ne̍ Kristu.

¹⁶ Dikad pe̍ agannad kayu kuma, tasun awan maibaga nga dake̍c maipanggep iya nabaru nga maipaay dakayu.

¹⁷ Ta no maipanggep iya panangituray ne̍ Apu Diyus dactida, ket bekken nga ya pannangan se̍ panaginum ya napateg, no di lugud ya pannakapalinteg, se̍ ya panagtutunus, se̍ ya panaganggem nga tumaud iya Ispiritu Santu.

¹⁸ Ket no itu diyan ya patgen tida iya panagsirbi tida e̍ Kristu, maay-ayu nge̍ Apu Diyus dactidan, ket diya toley, annamungan dactida pe̍.

¹⁹ Ket gapu ta agten iyan, masapul nga ipasnec tida diya agbanag ka panagtutunus tida se̍ panagtitinnulung tida maipanggep kadiya mangpabileg iya panamati tida.

²⁰ Madi kayu kuma ngarud pirdiyen ya panggep ne̍ Apu Diyus, gapu was iya gabay nu nga kanen. Ngarud, naibilang nga mayat ya amin nga makan. Ngem dake̍c met no pagbasulen nu ya kapada nu gapu was iya makan nu.

²¹ Ket ya mayat nga wanglen nu kuma, ket bay-an nu was ya panagsida ka karni winno panaginum ka makapae̍nglew, winno orey nagan na nga duduma, no itu ya pakabasulan niya kabsat nu, nga pakakapsutan niya panamati na.

²² Ket ikew se̍ e̍ Apu Diyus kuma ngas ya makaemmu iya kapanunutam maipanggep kadidi. Ket aganggem tida ngarud no awan pakariribukan niya panpanunut tida gapu kadiya ibilang tida nga rumbeng.

²³ Ngem ya agduwaduwa maipanggep iya gabay na nga kanen, basul na met no kanen na, ta ya panangan na, bekken nga maitutup iya patiyen na. Ket basul met amin diya wangwanglen tida nga madi maitutup iya patiyen tida nga rumbeng iya imatang ne̍ Apu Diyus.