Ruma 13 - Ya Baru nga Tulag

Ya pagrebngan tida kadiya agtuturay

¹ Rebbeng diya amin nga toley ya agtungpal kadiya agtuturay iya pagiliyan da. Ta diya makapagturay, ket diyan nas met nipalubus ne̍ Apu Diyus. Ket diya agdama nga agturay, naisaad da met gapu e̍ Apu Diyus.

² Dikad pe̍ ya agsukir kadiya agtuturay, sukiren na met ya nisaad ne̍ Apu Diyus. Ket ya agten iyan nga agsukir, paukum na mettas ya beggi na.

³ Agtungpal kayu kuma ngarud kadiya agtuturay, ta diya toley nga agariman ka nabaru, bekken met nga didi diya mansing kadiya agtuturay, no di lugud diya agariman ka dake̍c. Itu nga ya nabaru kuma ngas ya arimanen nu, tasun awan iyansing nu kadiya agtuturay. Ket itu pe̍ ya pakapadayawan nu igida.

⁴ Ta diya agtuturay, ket katulungan met ne̍ Apu Diyus, nga maipaay da nga mangaywan dakayu. Ngem no agariman kayu ka dake̍c, mansing kayu kuma ngarud igida, ta uwed ngarud met kaipapennan niya armas da. Igida met diya katulungan mettas ne̍ Apu Diyus, ta mangipatungpal da iya panangukum na kadiya agariman ka dake̍c.

⁵ Dikad pe̍ masapul nga agtungpal kayu kadiya agtuturay, ngem bekken nas nga tasun malisiyan nu ya pannakadusa, no di pe̍ gapu ta emmu nu iya lemlemmet nu nga kustu no agtungpal kayu igida.

⁶ Ket itu pe̍ yan ya gapu na nga agbuis kayu. Ta diya agtuturay iya pagiliyan tida, ket nisaad met ne̍ Apu Diyus tasun agsirbi da para igina. Ket pagrebngan da met nga biyangan diya agten iyan.

⁷ Dikad pe̍ tungpalen nu ngarud diya bilbilin diya mangiturturay dakayu. Ket no agsingir da ka buis, bayadan nu ngarud. No uwed duduma nga singiren da, bayadan nu pe̍. No diya uwed turay da, raemmen nu da. No diya uwed saad da, padayawan nu da met pe̍.

Ya pagrebngan tida kadiya kapada tida

⁸ Awan kuma utang nu nga madi nu binayadan. Ngem uwed mettas arig nga utang nu nga madi kuma agpatingga, nga itu ya rebbeng nu nga agiinnayat. Ta ya toley nga ayaten na ya pada na, ket matungpal na met pe̍ yin ya linteg ne̍ Apu Diyus.

⁹ Ta diya bilbilin nga naisurat iya Bibliya, agten kadito bilbilin nga kunen na, “Madi ka makitipun ka bekken mu nga asawa, madi ka pumatey, madi ka agtakew, madi ka agagum,” se̍ orey nagan na nga duduma nga bilin, ket madagup da nga amin idi nga is-isa nga bilin: “Ayatem ya padam nga toley nga agten mettas iya panagayat mu iya beggim.”

¹⁰ Ket ya toley nga agayat iya pada na nga toley, madi na met maariman ya dake̍c iya kapada na. Dikad pe̍ ya panagayat tida, itu mettas ya panangtungpal tida iya linteg ne̍ Apu Diyus.

¹¹ Ket agten iyan kuma ya wanglen nu, ta emmu nu met ya kaipapennan niya agdama nga timpu, itu nga masapul nga agpuut kayu nga pe̍yeng. Ta ita, dendenni yin ya pannakatungpal niya pannakaisalakan tida ngem ito damu tida ya mamati.

¹² Ket no ya ita nga timpu, maiyarig iya itatalib niya gabi, no umagsapa ngin. Dikad pe̍ ipac tida kuma ngarudin dito dake̍c nga winangwangel tida ito timpu nga arig nga nagicbet. Ta arig nga algew ya agdama nga timpu wi. Ket diya nabaru kuma ngin ya ipasingen tida itan, ta diya nabaru nga banbanag, arig da nga armas nga tumutup nga mausar iya algew.

¹³ Ket ya gangey tida ita, natacneng ngas kuma, nga maitutup iya gangey diya maipaay iya algew. Itu nga bay-an tida ngarud ya panaglucluku se̍ panage̍ng-e̍nglew. Awan kuma ngarud dactida ya pannakikamalala winno duduma pe̍ nga naalas nga wangwangel. Awan kuma ngarud pe̍ yin diya panagsusupyat winno panagiman.

¹⁴ Ngem ya wanglen nu kuma nga gennung, ipada nu ngas ya ugali nu iya ugali ne̍ Apu Je̍su Kristu. Ket madi kayu palubusanin ya panangtungpal nu kadiya dake̍c nga tarigagay niya kinatoley nu.