Ruma 12 - Ya Baru nga Tulag

Ya pudnu nga panagsirbi tida e̍ Apu Diyus

¹ Dikad pe̍ kakabsat, agten idi ya ibagac nga sipapasnec dakayu gapu iya adu nga asi ne̍ Apu Diyus: Ipaay nu kuma ya beggi nu igina nga arig nga isa nga sibibiyag nga datun, nga maibilang nga kuwa ngas ne̍ Apu Diyus, se̍ ya makaay-ayu igina. Ta itu ya napudnu nga panagsirbi nu e̍ Apu Diyus iya lemlemmet nu.

² Ket madi kayu paiturayan kadiya ugali diya bekken nga mamati idi nga lubung, no di lugud pabaruwen nu diya panpanunut nu. Agten iyan kuma ngarud, tasun maemmuwan nu ya tarigagay ne̍ Apu Diyus, nga itu diya banbanag nga napaw-is se̍ makaay-ayu igina, se̍ awan pagkurangan da.

³ Ket gapu iya siaayat nga panangaasi ne̍ Apu Diyus iyaken, uwed saad ku nga mamagbaga dakayun. Ket idi ya ibagac dakayu nga amin: Madi kayu kuma ipasindayaw diya kabaellan nu, no di lugud utuben nga nalaing niya tunggal isa dakayu, no nagan na ya tutu nga pateg niya kabaellan na. Ta nadumaduma met diya kabaellan tida sigun iya bileg niya panamati tida nga ne̍cde̍ ne̍ Apu Diyus.

⁴ Kaspagarigan no ya beggi tida, ta adu ya parte̍ niya isa nga beggi, ngem nadumaduma ya sirbi da.

⁵ Ket dactida nga mamati, agten tida pe̍ iyan, ta orey adu tida, ket makikamkameng tida e̍ Kristu nga arig nga is-isa tida nga beggi. Napagkakamang tida ngarud nga agten mettas kadiya nadumaduma nga parte̍ niya isa nga beggi toley.

⁶ Ket nae̍cdan tida ka nadumaduma nga pannakabalin sigun iya siaayat nga panangaasi ne̍ Apu Diyus iya tunggal isa dactida. Itu nga no ya pannakabalin nga mangikasaba iya kagi ne̍ Apu Diyus ya nae̍cde̍ dactida kuma, mangasaba tida kuma ngarud sigun iya bileg niya panamati tida.

⁷ Ket no ya pannakabalin nga agsirbi ya nae̍cde̍ dactida, agsirbi tida kuma ngarud. Ket no ya pannakabalin nga mangisuru ya uwed dactida, mangisuru tida kuma ngarud.

⁸ Ket no ya pannakabalin nga mangpabileg iya lemlemmet niya pada tida nga toley ya nae̍cde̍ dactida, itu kuma ngarud ya biyangan tidan. Ket no uwed dactida ya pannakabalin nga mange̍cde̍ kadiya uwed dactida, nasayud tida kuma ngarud nga mangiwaras kadiya kasapulan diya toley. No uwed dactida ya pannakabalin nga mangipangulu, nagaget tida kuma ngarud nga mangipangulu. Ket no ya panangaasi ya nae̍cde̍ nga pannakabalin tida, mangaasi tida kuma ngarud nga siraragsac.

Ya pudnu nga panagayat tida

⁹ Ket no maipanggep iya panagayat nu kadiya kapada nu, pudnu kuma ngas, nga awan busid na. Ipalikud nu kuma ya dake̍c, ket ya nabaru, itu ngas ya ipatpateg nu.

¹⁰ Agiinnayat kayu ngarud nga agten iya panagiinnayat diya agkakabsat. Ket sidadayaw kayu kuma nga mangipasingen iya panangipateg nu iya tunggal isa dakayu, nga ibilang nu da nga napatpateg ngem iya beggi nu.

¹¹ Masapul nga madi kayu agsadut, no di lugud aggaget kayu. Ket agpasnec kayu kuma gapu iya Ispiritu, se̍ agsirbi kayu iya Apu.

¹² Anggem kuma ngas ya uwed iya lemlemmet nu gapu iya namnama nu e̍ Apu Diyus. Anusan nu ngas diya rigrigat nu, ket pe̍yeng kayu nga agkarkararag.

¹³ Biyangan nu kuma diya kapada nu nga mamati, nga tulungan nu da kadiya kasapulan da. Ket managsangaili kayu kuma.

¹⁴ Ket diya mangirurumen dakayu, madi nu da nga ilunud, no di lugud ikararagan nu da e̍ Apu Diyus nga kaasiyan na da kuma.

¹⁵ Makipaganggem kayu kuma kadiya naanggem, se̍ makipagricna kayu kuma kadiya agladladingit.

¹⁶ Agtutunus kayu kuma nga pe̍yeng ka panpanunut. Madi kayu kuma tumangsit, no di lugud makigayyem kayu kuma orey kadiya nanumu nga toley. Ket madi kayu kuma pe̍ ipasindayaw ya kinasirib nu.

¹⁷ Ket no uwed agariman ka dake̍c dakayu, madi kayu kuma balsen ka dake̍c. Ta ipasnec nu kuma lugud ya agariman kadiya emmu nu nga naibilang nga nabaru iya imatang diya amin nga toltoley.

¹⁸ Ket arimanen nu ya amin nga kabaellan nu nga makikinnaawatan kadiya amin nga toley, no mabalin kuma.

¹⁹ Ngarud dakayu nga patpatgec, masapul nga pulus nga di kayu agibales kadiya agariman ka dake̍c dakayu. Paibales nu ngas iya unget ne̍ Apu Diyus, ta kunen na met iya Bibliya nga, “Iyaken ya uwed turay na nga agibales, ket iyaken ngarud ya Apu nga mangsupapac nga mangdusa,” kunen na.

²⁰ Dikad pe̍ madi kayu kuma ngarud agibales, no di lugud arimanen nu ya maikanatad iya kunen na iya Bibliya nga, “No mabisin ya gumurgura ikew, ket pakanem kuma. Ket no mewwew, painumem. Ta no agten iyan ya panangibales mu iya gura na ikew, ket malyew ngas met, nga arig nga manggabuun ka met ka bekkag nga nabara iya ulu na,” kunen na.

²¹ Ngarud, madi kayu kuma paabac iya kinadake̍c, no di lugud abaken nu ya dake̍c gapu iya panagwangel nu ka nabaru.