Ruma 10 - Ya Baru nga Tulag

¹ Kakabsat, tarigagayac nga unay nga maisalakan kuma diya padac nga Israe̍lita, ket itu pe̍ ya ikarkararag ku e̍ Apu Diyus.

² Ta orey mapanecnekkac nga napasnec da nga tutu iya panagdaydayaw da e̍ Apu Diyus, madi da met latta maawatan ya kinapudnu niya ipakaemmu na.

³ Ta madi da maawatan maipanggep iya panangpalinteg ne̍ Apu Diyus ka toley, ket pinadas da nga palinteggen diya beggi da gapu kadiya wanglen da. Itu nga di da pinaiturayan iya panangibilang kuma ne̍ Apu Diyus igida nga nalinteg iya imatang na.

⁴ Ngem ya kinapudnu na, e̍ Kristu met ya nakatungpalan nito Linteg ne̍ Muyse̍s, tasun maibilang nga nalinteg iya imatang ne̍ Apu Diyus diya amin nga mamati e̍ Kristu.

Agpaay ka amin nga toley ya pannakaisalakan

⁵ Lagipen tida kuma pe̍ dito nisurat nito Muyse̍s maipanggep iya toley nga gabay na kanu ya mapalinteg kuma sigun iya paglinteggan niya Linteg. Nisurat nito Muyse̍s nga, “Ya toley nga makatungpal kadidi nga paglinteggan, agbiyag nad nga situtured gapu kadidi,” kunen na.

⁶ Ngem bekken nga agten iyan ya pannakapalinteg niya toley sigun iya paglinteggan niya panamati. Ta nisurat pe̍ nito Muyse̍s nga, “Madi ka kuma ipagarup nga masapul nga uwed agpangudu nga mawe̍ ka langit,” kunen na, ket kayat na nga kagiyen nga tasun uwed kuma mangipasegged nga mange̍lbe̍t e̍ Kristu idi dactida.

⁷ Se̍ kinunen na pe̍, “Madi ka kuma pe̍ ipagarup nga masapul nga uwed agpasegged nga mawe̍ iya nakaun-uneg nga edyan,” kunen na, ket kayat na nga kagiyen nga tasun uwed kuma mawe̍ mangiyune̍c e̍ Kristu manipud iya edyan diya natey.

⁸ Bekken kuma ngarud nga agten iyan ya panangipagarup tida, ta kunen na pe̍, “Arig nga denni ikew ya kagi ne̍ Apu Diyusin, ta pe̍yeng nga itu ya balbalikasem se̍ lemlemtam,” kunen na. Ket itu met ya kagi ne̍ Apu Diyus maipanggep ka panamati, nga itu pe̍ ya kagi nga ikaskasaba mi.

⁹ Ket idi ngarud ya banag niya kagi nga ikaskasaba mi: No ibalikas mu nga ipakaemmum nga tutu nga e̍ Je̍sus ya ibilang mu nga Apum, se̍ no patiyem iya lemlemmet mu nga igina ket pinagungar ngarud ne̍ Apu Diyus, ket maisalakan ka nad met.

¹⁰ Ta gapu iya panamati tida nga tumaud iya lemlemmet tida, maibilang tida nga nalinteg iya imatang ne̍ Apu Diyus. Ket se̍ gapu pe̍ iya panangibalikas tida nga panangipakaemmu tida maipanggep iya panamati tida, ket maisalakan tida.

¹¹ Ta agten met iya kunen na iya Bibliya nga, “Madi nad mapaay ya orey nagan na nga mamati igina,” kunen na.

¹² Ket agpaay met yan kadiya amin nga toley, ta awan pakaidumaan iya imatang ne̍ Apu Diyus diya bekken nga Hudyu kadiya Hudyu. Ta ya Apu mettas ya Apu diya amin nga toley, ket ipaay na ya panagkaasi na kadiya amin nga umawag igina.

¹³ Ta kunen na iya Bibliya nga, “Diya amin nga umawag nad iya Apu, nga sitatalec iya kinaturay na, ket maisalakan da nad met,” kunen na.

¹⁴ Ngem madi met makaawag diya toley igina no di da pekkem mamati igina. Ket madi da met pe̍ mabalin ya mamati igina no di da pekkem nadamag ya maipanggep igina. Ket madi da ngarud madamag ya maipanggep igina no awan mangikasaba igida.

¹⁵ Se̍ awan ngarud mawe̍ mangikasaba no awan maibon. Ket agten met iya kunen na iya Bibliya nga, “Pakaragsakan ngarud ya umbe̍t diya mangipakaemmu ka damag nga makaparagsac,” kunen na.

¹⁶ Ngem diya duduma nga Israe̍lita nga napadamagan iya Makaparagsac nga Damag, madi da met nipangag. Ta agten pe̍ ito kunen nito mammadtu nga Isayas itun nga kinunen na, “Awan namati kadiya nikasaba mi, Apu,” kunen na.

¹⁷ Dikad pe̍ maemmuwan tida nga mamati diya toley gapu iya maipadamag igida. Ket ya panangipadamag kadiya toley, itu ya pakaemmuwan da maipanggep e̍ Kristu.

¹⁸ Kaynun no pagarupen nu nga madi pekkem nadamag dito toltoley to damag. Ngem ya kinapudnu na, ket nadamag da mettin, ta agten met iya kunen na iya Bibliya nga, “Nagwaras ya panangipadamag da iya amin nga lubung, ket gapu iya nipakaemmu da, nakadamagin diya toley iya amin nga lubung,” kunen na.

¹⁹ Ket idi manin ya kunec: Kaynun no pagarupen nu nga madi naawatan diya Israe̍lita itun ya panggep ne̍ Apu Diyus kadiya bekken nga Hudyu ita. Ngem agten idi: E̍ Muyse̍s mettas to kaonaan nga nangibaga kadiya Hudyu maipanggep iyan, ta nipaisurat ne̍ Apu Diyus igina nga kunen na, “Pagimunen nakayu nad kadiya toley nga bekken pekkem nga naibilang nga toley ku. Paungten nakayu nad kadiya toley nga ibilang nu nga kurang ya pannakaawat da,” kunen na.

²⁰ Ket to Isayas, nagtured pe̍ itun nga nangibaga iya kagi ne̍ Apu Diyus, nga kunen na, “Naaskuran dac kun diya bekken nga mangsapsapul iyaken. Nagpakaemmu wac kun kadiya bekken nga mangaw-awag iyaken,” kunen na.

²¹ Ngem no maipanggep kadiya Israe̍lita ita, kinunen na, “Pe̍yeng ngac nga mangaw-awis nga siaasi kadiya toley nga nasukir se̍ nasubeg,” kunen na.