Ruma 1 - Ya Baru nga Tulag

¹ Iyaken nge̍ Pablu nga isa nga agsirsirbi e̍ Kristu Je̍sus. Pinili nac nge̍ Apu Diyus, se̍ pinagbalin nac nga apustul nga naipaay iya panangipakaemmu iya Makaparagsac nga Damag ne̍ Apu Diyus.

² Ket idi nga Makaparagsac nga Damag, itun pekkem nga nikari ne̍ Apu Diyus yani, nga nipaisurat na iya nadiyusan nga Bibliya kadito mammadtu na itun.

³ Ket ya Makaparagsac nga Damag, itu ya damag maipanggep iya Anac ne̍ Apu Diyus. No maipanggep iya kinatoley na, ket isa met nga kapututan nito Ari Dabid.

⁴ Ket no maipanggep iya kinaDiyus na, nipakaemmu niya nadiyusan nga Ispiritu nga igina ya Anac ne̍ Apu Diyus, gapu ito nakaskasdaaw nga pannakabalin nga naipasingen ito panagungar na. Ya Apu tida nga Je̍su Kristu met yani.

⁵ Ket gapu igina, se̍ tasun madayaw ya kinaturay na, nipaay ne̍ Apu Diyus nga siaayat ya saad nga kinaapustul. Nipaay na ngarud iyaken, tasun mangipadamag gac iya maipanggep iya panamati igina kadiya bekken nga Hudyu kadiya amin nga il-ili, tasun sumurut da kuma igina.

⁶ Ket mairaman kayu pe̍ nga iRuma, ta napili kayu pe̍ nga agbalin nga toley ne̍ Je̍su Kristu.

⁷ Itu nga isurat ku yani dakayu nga uwed ka Ruma, dakayu nga amin nga ay-ayaten se̍ pinili ne̍ Apu Diyus nga agbalin nga toley na nga naipaay igina. Sapay kuma ta uwed dakayu ya siaayat nga asi, se̍ talna, nga gayat e̍ Apu Diyus nga Ama tida se̍ e̍ Apu Je̍su Kristu.

To tarigagay ne̍ Pablu nga mawe̍ kuma ka Ruma

⁸ Ket ya mona nga kunec, gapu e̍ Je̍su Kristu, agyaman nac iya Diyus ku nga Apu Diyus, gapu dakayu nga amin. Ta ya panamati nu igina, agdindinamag ngamin iya amin na lubung.

⁹ Malagip nakayu nga pe̍yeng kadiya kararag ku. Tutu met yan, ket mapanecnekkan pe̍ ne̍ Apu Diyus yan, ket igina met ya pagsirsirbiyac iya amin nga nakem ku iya panangipakaemmuc iya Makaparagsac nga Damag maipanggep iya Anac na.

¹⁰ Ngarud, laglagipen nakayu nga pe̍yeng iya panagkararag ku, nga ad-adngec e̍ Apu Diyus nga no mabalin, palubusan nac kuma mettasin nga mawe̍ sumacwar dakayu.

¹¹ Ta tarigagayac nga unay nga masingen nakayu, tasun mapabileg kayu kuma gapu kadiya ipakaemmuc nad dakayu nga banbanag nga ipaay niya Ispiritu Santu.

¹² Ya kayat ku nga kagiyen, agtitinnulung tida kuma, ta mapabileg kayu kuma gapu iya panamatic, ket mapabileg gac kuma met pe̍ gapu iya panamati nu.

¹³ Kakabsat, gabay ku nga maemmuwan nu kuma yani: Name̍n-adu win nga pinanggep ku ya umbe̍t sumacwar dakayu, ngem agingga ita, uwed met pekkem diya makatiped iyaken. Gabay ku ya umbe̍t iya edyan nu, tasun uwed kuma pe̍ nabaru nga pagbanagac iyan Ruma, agten mettas iya pagbanagac kadiya pada nu nga bekken nga Hudyu nga uwed kadiya duduma nga pagiliyan nga napennac.

¹⁴ Ta uwed rebbeng ku nga mangipakaemmu iya Makaparagsac nga Damag kadiya amin nga toltoley: kadiya makaemmu win iya ugali Griye̍gu, se̍ kadiya di pekkem makaemmu iyan, agten pe̍ kadiya uwed adal nan, se̍ kadiya awan adal na.

¹⁵ Itu nga maganatan nac nga mangipakaemmu pe̍ iya Makaparagsac nga Damag dakayu nga uwed iya Ruma.

Ya pannakabalin niya Makaparagsac nga Damag

¹⁶ Maganatan nac ngarud nga umbe̍t iyan, ta madic ngarud iyalyew ya mangipakaemmu iya Makaparagsac nga Damag. Ta idi nga damag, itu ya pakasingnan iya pannakabalin ne̍ Apu Diyus nga mangisalakan kadiya amin nga mamati. Naipakaemmu kadiya Hudyu se̍ kadiya bekken nga Hudyu, ngem nangnangruna nga naipakaemmu kadiya Hudyu.

¹⁷ Tutu met nga isalakan ne̍ Apu Diyus diya mamati, ta gapu iya Makaparagsac nga Damag, maipakaemmu ya panangpalinteg na iya toley. Ket idi nga pannakapalinteg, ket gapu ka panamati nga agbanag mettas pe̍ ka panamati manin. Agten mettas iyan ya naisurat iya Bibliya nga kunen na, “Diya naibilang nga nalinteg, agbiyag da nad nga situtured gapu iya panamati da.”

Ya panagbasul diya toley

¹⁸ Ket iya agten iyan, ipasingen met ne̍ Apu Diyus ya unget na nga pangukum na manipud ka langit kadiya amin nga managbasul se̍ managdacdake̍c. Didi nga toley, kuntraen da ya kinapudnu gapu iya kinadake̍c da.

¹⁹ Nabatad met igidan diya mabalin da nga emmuwen maipanggep e̍ Apu Diyus, ta e̍ Apu Diyus mettas ya mangipaspasingen igida.

²⁰ Tutu met, ta nanipud ito pinarsuwa ne̍ Apu Diyus ya lubung ngi, nalawag met ya maipanggep iya gangey na, nga itu ya agnanayun nga pannakabalin se̍ ya kinaDiyus nga uwed igina. Nalawag ngarud didi nga gangey, ta orey madi da masingen, maawatan da met gapu kadiya inariman ne̍ Apu Diyus. Itu ya gapu na nga pulus nga awan mabalin diya toley nga pagpambar.

²¹ Awan ngarud mabalin diya toltoley nga pagpambar, ta orey naemmuwan da maipanggep e̍ Apu Diyus, madi da met nibilang nga igina ya Diyus da nga pagdayawan da, se̍ madi da pe̍ nagyaman igina. Itu nga nagbalin da lugud nga awan pagmamaayan niya panagpanpanunut da, ket arig nga nagicbet ya uwed iya panpanunut da, ta bekken da nga nanakem min.

²² Kinunen da nga nasisirib da kanu, ngem nagbalin da mettas nga awanan pannakaawat.

²³ Tutu met, ta madi da pe̍ nagdaydayaw iya awan panagpatingga na nga Diyus, no di lugud nagdaydayaw da kadiya didiyusen nga kalanglanga ngas diya uwed pagpatinggaan niya biyag da, nga agten iya toley winno diya sibud, animal, winno aguy-uyas.

²⁴ Ket gapu iya agten iyan nga kinadake̍c diya toltoley, nipamoya ne̍ Apu Diyus da nga mangituluy kadiya nakar-aryec nga wangwanglen da nga tumaud kadiya dake̍c nga tarigagay da, se̍ nipamoya na da pe̍ iya panagariman da ka nakal-alyew kadiya begbeggi da.

²⁵ Agten iyan ya winangel ne̍ Apu Diyus ata sukatan da met ka kinabusid ya kinapudnu maipanggep igina, nga bekken met nga e̍ Apu Diyus ya dinaydayaw se̍ nagsirsirbiyan da, no di mettas diya pinarsuwa na. Ngem ya kinapudnu na, e̍ Apu Diyus met ya Namarsuwa nga tutu nga madaydayaw ka agnanayun. Agten iyan kuma ngarud.

²⁶ Ket gapu iyan nga winangel dito toltoley nga madi nagdayaw e̍ Apu Diyus, nipamoya na da ngarud kadiya nakal-alyew nga ricna da. Ta diya babey igida, sinabaliyan da ya gangey babey, nga bekken nga lalaki yin ya nakitipunan dan.

²⁷ Ket agten met pe̍ diya lalaki, binaybay-an da met ya gangey lalaki nga pannakitipun iya babey, ket pinaiturayan da met iya ricna da para iya pada da nga lalaki. Nakitipun da ngarud iya pada da nga lalaki, nga nagar-ariman da ka nakal-alyew. Itu nga naariman mettin iya beggi da ya dusa nga tumutup iya dake̍c nga wangwanglen da.

²⁸ Ket gapu ta madi gabay dito toley nga laglagipen ya kinapudnu maipanggep e̍ Apu Diyusin, nipamoya ngas ne̍ Apu Diyus da tasun naalas ngas ya panpanunut da, se̍ tasun ya dake̍c met ya wangwanglen da, nga bekken nga ya kustu.

²⁹ Napalaus met igidan ya amin nga kita basul, kinadake̍c, kinaagum, se̍ panaggugura. Napalaus pe̍ igida ya panagapal, pumatey, pannakisupyat, panaglibac, se̍ ya panagparbu. Managtsismis da pe̍.

³⁰ Mamadpadake̍c da, guraen da pe̍ nge̍ Apu Diyus, naalas, natangsit, se̍ napasindayaw da. Nalaing da nga agparnuway kadiya pagbasulan da, se̍ agsukir da pe̍ kadiya naganac igida.

³¹ Bekken da nga nanakem, se̍ di da met tungpalen diya karkari da, ket di da pe̍ emmu ya mangaasi se̍ tumulung ka toley.

³² Ket ya kinapudnu na, emmu da met nga sigun iya linteg ne̍ Apu Diyus, ket patey ya tumutup nga dusa iya agten iyan nga panagbiyag. Ngem orey emmu da yan, wanglen da met latta didi nga kinadake̍c, ket bekken nas nga iyan, ta abuluyan da met pe̍ diya duduma nga agar-ariman pe̍ kadiyan.