Pilipus 4 - Ya Baru nga Tulag

¹ Dikad pe̍ dakayu nga patpatgec se̍ pakaessutac nga kakabsat se̍ pakaanggemmac se̍ pakaidayawac, ngarud, dakayu nga patpatgec, pabakedden nu kuma ngarudin ya panamati nu nga maikanatad kadiyan nga nibagac.

Duduma nga pamagbaga ne̍ Pablu kadito iPilipus

² Ket dakayu, E̍yudiyas nge̍ Sintike̍, ibagbagac nga sipapasnec dakayu nga agtunus kayu kuma ngin, ta agkabsat kayu met gapu iya Apu.

³ Ket ikew nga pudnu nga kawanglac iyan, gabay ku ngarud no ikew kuma ya mangsingen kadiyan nga duwa nga babey, ta kabulun ku da itun iya panangipacpakaemmuc iya Makaparagsac nga Damag. Ngarud, kabulun ku da, agraman e̍ Kle̍me̍nte̍ se̍ dito duduma nga kinawanglac iya panagsirsirbic. Ket naisurat ngarud diya nagan diyanin iya libru nga pakaisuratan diya nagnagan diya mae̍cdan ka biyag nga agnanayun.

⁴ Basta aganggem kayu kuma nga pe̍yeng gapu iya pannakaitipun nu iya Apu. Ngarud, ulitec manin: Aganggem kayu kuma!

⁵ Maipasingen kuma ngarud kadiya toltoley ya kinanacman nu, nga laglagipen nu nga dandani yin ya umbe̍t manin niya Apu.

⁶ Awan kuma idandanag nu iya orey nagan na, no di kayu ipakaemmu kuma ngas nga siiiyaman e̍ Apu Diyus diya amin nga gabay nu nga adngen igina kadiya karkararag nu.

⁷ Ket no agten iyan ya pamaay nu, e̍cdan nakayu nge̍ Apu Diyus ka talna na nga nakaskasdaaw nga nalablabes pe̍ ngem iya pannakaawat toley. Ket idi nga talna, itu mettas ya mangaywan iya nakem se̍ panpanunut nu, gapu iya pannakaitipun nu e̍ Kristu Je̍sus.

⁸ Ket idi ya modi nga ibagbagac dakayu nga kakabsat: Diya panpanunuten nu kuma nga pe̍yeng, ket itu ngas diya banbanag nga mange̍cde̍ ka napudnu nga kagi, nadayaw se̍ nalinteg nga ugali, nadalus nga pamaay, se̍ diya agpaay ka panagayat se̍ panagkagi ka nabaru. Ngarud, diya ug-ugali nga mange̍cde̍ ka kinatacneng se̍ diya annamungan ne̍ Apu Diyus, itu kuma ngarud diya ipatpateg nu.

⁹ Tultuladen nu kuma amin dito naadal se̍ naawatan nu iyaken, se̍ amin dito nagicna se̍ nasingen nu iyaken. Ket no agten iyanin ya wangwanglen nu, ket uwed dakayun nge̍ Apu Diyus nga mangpatalna.

To panagyaman ne̍ Pablu gapu ito nikaasi dito iPilipus

¹⁰ Ket gapu iya pannakaitipun ku iya Apu, agyaman nac nga unay, ta naipasingen nu manin ya panangisakit nu iyaken. Ta emmuc nga orey nabayagin nanipud ito panangtulung nu iyaken itun, ket tutu nga ginabgabay dac nga tulungan, ngem awan nas ngamin gundaway nu pekkem itun.

¹¹ Ket ibagac ngarud yani, ngem bekken nga gapu ka pagkurangac kadiya kasapulac, a. Ta nakairuwamac met ya aganggem iya orey nagan na nga kasasaad ku.

¹² Ta emmuc mettin ya agkurang ka kasapulan, se̍ emmuc pe̍ yin ya agsuruc ka kasapulan. Ket naemmuwac kun nga nabaru no agtalna ngac kuma ngas iya orey nagan na nga dumateng iyaken, se̍ iya amin nga kasasaad ku, agten no mabsug gac man, winno mabisin nac, se̍ orey no agkurang winno agsubra diya masapul ku.

¹³ Ta awan dumateng iyaken nga madic maitured gapu iya tulung niya mangpabileg iyaken.

¹⁴ Ngem orey agten iyan, nabaru yan nga panangisakit nu iya pakarigatac ki.

¹⁵ Ket dakayu nga iPilipus, emmu nu met nga ito damu nito panangikasabac dakayu iya Makaparagsac nga Damag, ito pimanaw wac ka Mase̍dunya, ket awan duduma nga bungguy nga nakitipun iyaken maipanggep iya mange̍cde̍ se̍ umawat, no di yas dacdakayu.

¹⁶ Ta orey ito kauwed ku ka Te̍salunika, bekken nas nga nam-ame̍nsan nga nangipakagtu kayu kadiya masapul ku.

¹⁷ Itu nga naragsakac ngarud. Ngem bekken nga diya e̍c-e̍cde̍ nu iyaken ya sapsapulec, no di lugud ya umad-adu diya masingen dakayu nga pagbalinan niya panamati nu.

¹⁸ Ket kustu mettin to nae̍cde̍ iyaken, ket nagsursuruc pe̍ lugudin. Ta awan pulus masapul kun, gapu ito nipakagtu nu e̍ E̍papruditu nga para iyaken. Ket naibilang ngarud nga nabangug nga pagdatun nu ditun nga ne̍cde̍ nu, nga isa nga datun nga annamungan ne̍ Apu Diyus, nga pakaragsakan na.

¹⁹ Ket e̍ Apu Diyus nga pagsirbiyac, igina met ya makaemmu kadiya amin nga masapul nu, maikanatad iya nawadwad nga kinabacnang na, nga uwed igina gapu iya nadayaw nga kasasaad na, nga masingen e̍ Kristu Je̍sus.

²⁰ Madaydayaw kuma nga pe̍yeng ka agnanayun nge̍ Apu Diyus, nga Diyus se̍ Ama tida. Agten iyan kuma ngarudin!

To pakumusta ne̍ Pablu

²¹ Pakumustaac diya amin nga toley ne̍ Apu Diyus iyan, gapu e̍ Kristu Je̍sus. Makikumusta pe̍ diya kakabsat tida ka pammati nga kabulun ku idi nga pagedyanac.

²² Makikumusta pe̍ dakayu diya amin nga toley ne̍ Apu Diyus idi nga ili, nangruna kanu diya uwed iya baley niya ari yi.

²³ Ket aglak-am kayu kuma iya siaayat nga asi ne̍ Apu Je̍su Kristu kadiya lemlemmet nu.