Pilipus 3 - Ya Baru nga Tulag

Ya kinalinteg nga gayat e̍ Apu Diyus

¹ Ket ibagac kuma ita diya kaodiyan nga maibagac dakayu nga kakabsat ku. Ket basta pakaanggemman nu kuma ya pannakitipun nu iya Apu. Bekken nac ngarud nga mauma kadidi nga ibagbagac manin dakayu, ket paglaingan nu da met pe̍. Agten da idi:

² Annadan nu dito toley nga arig nga asu nga agpaay ngas ka dake̍c. Annadan nu da ngarud, ta ipapilit da met ya panangiwa iya beggi.

³ Igida ngarud ya annadan nu, ta ya kinapudnu na, dactida met diya ibilang ne̍ Apu Diyus nga toley na nga arig nga nakugit. Ta dactida diya agdaydayaw e̍ Apu Diyus gapu iya Ispiritu na nga madi masingen. Ket e̍ Kristu Je̍sus met ya pagnamnamaan tida, nga awan lugud pagtalged tida iya mawangel toley.

⁴ Ket no iyaken, tutu met nga uwed dito nawangel ku nga mabalin nga ibilang ku nga pagtalged ku e̍ Apu Diyus. Itu nga no uwed sabali nga toley nga mangunen nga mabalin na kanu ya agtalged iya imatang ne̍ Apu Diyus gapu kadiya nawangel na, ket nangnangruna ngac kuma met pekkem.

⁵ Ta ito kake̍bit ku, ket kinugit dac pe̍ ito uwed walu nga algew kun, sigun iya Linteg mi nga Hudyu. Ket iIsrae̍l lac met pe̍, nga nagtaud kadito kapututan nito Be̍nhamin. Ket pudnu met nga He̍briyu wac pe̍, ata He̍briyu met dito manakem ku. Ket no maipanggep pe̍ iya kinapasnec ku iya Linteg Hudyu, ket kameng dac met itun diya Parisiyu.

⁶ Ket no maipanggep iya kinapasnec ku iya kaugaliyan mi nga Hudyu, nangnangruna ngac pekkem, ta nagaget tac met itun nga nangirurumen kadiya mamati e̍ Kristu. Ket no maipanggep pe̍ iya pannakaibilang nga nalinteg gapu iya panagtungpal ito Linteg nito Muyse̍s, ket awan met pakaumsiyac ito panangtungpal ku ito Linteg.

⁷ Ngem ya orey nagan na nga naalac ku nga nipagarup ku itun nga pakapalinteggac, ket nibilang ku ngasin nga awan mamaay dan, tasun e̍ Kristu kuma ngas ya pagtalkac kun.

⁸ Ngarud ita, ibilang ku nga awan sirsirbi yin niya orey nagan na, ta napatpateg met ya pannakaem-emmuc e̍ Kristu Je̍sus nga Apuc kun ngem iya orey nagan na. Ket gapu idi nga pannakaemmuc igina, naipac iyaken nin amin dito pagtalged ku itun. Ket ibilang ku da ngasin nga arig nga basura, tasun maalac ku ya gun-gunac nga pannakibulun ku e̍ Kristu.

⁹ Ket gapu iya pannakaitipun ku igina, maibilang ngac nga nalinteg gin. Ngem bekken nga gapu iya panangtungpal ku ito Linteg ya nakapalinteggac, no di gapu mettas iya panamatic e̍ Kristu. Ket itu yan ya kinalinteg nga gayat e̍ Apu Diyus, nga gapu was ka panamati.

¹⁰ Ket ya ipatpateg ku ngarud ita, ket itu ya pannakaem-emmuc e̍ Kristu, se̍ ipatpateg ku pe̍ ya panaglak-am ku iya pannakabalin nga naipasingen ito panagungar na. Ket se̍ ipatpateg ku pe̍ ya panaglak-am ku ka panagrigrigat nga arig mettas kadito panagrigrigat ne̍ Kristu itun, tasun pumarparis sac kuma iginan ito pannakatey na.

¹¹ Ta itu yan ya namnamac nga mapaungar rac nad met pe̍.

Ya pagtungpalan niya panamati tida

¹² Bekken ku met nga kunen nga nakadateng ngac kun iya pagtungpalan niya namnamaec, se̍ di yac pe̍ kayat nga kagiyen nga nagbalin nac kun nga awan pagkurangan na. Ngem ya kayat ku nga kagiyen, ket wanglec ngarud ya kabaellac, tasun magun-ud ku kuma ya namnamaec. Ta itu met ya tumutup ito panangtagikuwa ne̍ Kristu Je̍sus iyaken.

¹³ Ket kakabsat, no iyaken, madic ngarud nga kunen nga nagun-ud kun ya amin niya namnamaec maipanggep e̍ Kristu Je̍sus. Ngem ya wangwanglec itan, isnup ku diya di pekkem natungpal, nga bekken nga dito nalpasin ya laglagipec kun.

¹⁴ Ket arig gac nga makilumba nga agtarus nga managtag iya pagtungpalan na. Ta namnamaec ya nailangitan nga gun-guna nga iyawis ne̍ Apu Diyus dactida, gapu iya pannakaitipun tida e̍ Kristu Je̍sus.

¹⁵ Ket agten kuma pe̍ iyan ya panpanunut tida nga amin nga nabaked ya panamati na. Ngem no sabsabali ya panpanunut nu maipanggep iya orey nagan na kadiyan nga banbanag, ket ipakaawat ngarud pe̍ ne̍ Apu Diyus dakayu ya kinasabali na.

¹⁶ Ket ita, ya kasapulan tidan, ket itu ya panangtungpal tida kuma ngarudin kadito amin nga naipakaemmu dactidan nga maikanatad iya panamati tida.

¹⁷ Ket kakabsat, agpapada kayu kuma nga mangtulad iya ugali nga nipaspasingec dakayu. Ket diya mangtungtungpal idi nga ugali mi, ket pagtuladan nu da pe̍ yin.

¹⁸ Ta adu met diya duduma nga bekken nga agten iyan ya ugali da, nga itu pe̍ to pe̍yeng nga nibagbagac dakayu itun. Ket ita, aglanab mettin diya luluwac, ta ipalagip ku manin dakayu nga adu nga tutu diya mangtungtungpal ngas iya ugali mettas dito gumurgura iya kaipapennan niya nipapatey ne̍ Kristu ito krus.

¹⁹ Ket diyan nga toley, pakapukawan da ngarud ya pagtungpalan da. Ket no igida, ricricna nga agpaay ngas iya bessug da ya patpatgen da, nga arig nga diyus da. Ket pagpasindayaw da met diya nakal-alyew nga wanglen da. Ket igida, diya banbanag ngas idi nga lubung ya laglagipen da.

²⁰ Ngem no dactida, langit met ya tutu nga ili tida. Ket padpadaanan tida pe̍ yin ya isosoli niya mangisalakan dactida nga gayat ka langit, nga itu nge̍ Apu Je̍su Kristu.

²¹ Ket igina met ya mangbaliw nad kadiya kackaasi nga beggi tida. Pagbalinen na da nad nga agten mettas iya napadayaw nga beggi na ita. Ket ya pannakabalin nga usaren na nad iya panangbaliw na dactida, ket itu ya agten mettas nga pannakabalin nga usaren na tasun pagbalinen na nga agpaituray igina diya amin.