Pilipus 2 - Ya Baru nga Tulag

Pagtuladan tida ya kinapakumbaba ne̍ Kristu

¹ Ket tutu met nga gapu iya pannakaitipun nu e̍ Kristu, mapabileg ya panpanunut nu. Ket gapu iya ayat na, maliwliwa kayu. Uwed pe̍ pannakibulun nu iya Ispiritu Santu, se̍ uwed met pe̍ panagpipinnateg se̍ panagkikinnaasi nu.

² Dikad pe̍ gapu ta uwed diyan dakayu, ilallalu nu kuma ya anggem kun maipanggep dakayu. Ta agtutunus kayu kuma se̍ agiinnayat kayu, se̍ agpapada kayu kuma ka panggep se̍ panpanunut.

³ Bekken nu kuma nga panggeppen ya mangipangatu nga gennung iya mismu nga kaipapennan nu, winno ya agpasindayaw, no di lugud agpakumbaba kayu was kuma, nga ibilang nu kuma nga napatpateg diya duduma nga toley ngem iya beggi nu.

⁴ Se̍ bekken kuma ngas nga diya bukud nu nga paglaingan ya laglagipen nu, no di lugud pe̍ diya paglaingan diya kapada nu.

⁵ Tuladen nu kuma to gangey ne̍ Kristu Je̍sus,

⁶ Ta orey uwed igina ya kinaDiyus, madi na latta nipangpangruna nga siaagum ya pannakipada na e̍ Apu Diyus,

⁷ no di na lugud nipalikud diya kalinteggan na, tasun nagpaitoley, ket nagbalin nas nga arig nga tagabu.

⁸ Ket ito panagbiyag na nga kinatoley, nagpakumbaba ngas met, ket nituluc na pe̍ ya beggi na nga mapatey, nga itu ya nakailansaan na mettas ka krus.

⁹ Itu nga pinagbalin ne̍ Apu Diyus nga kangatuwan ya dayaw na. Ket pinagbalin pe̍ ne̍ Apu Diyus nga katurayan ya turay niya nagan na,

¹⁰ tasun iyan, amin-amin, agparintumeng da nga agdayaw e̍ Je̍sus no magicna da ya naturay nga nagan na, orey diya uwed ka langit, se̍ diya uwed iya lubung ngi, se̍ orey diya uwed iya uneg niya ginet.

¹¹ Ket se̍ tasun pulus nga awan madi agibalikas nga e̍ Je̍su Kristu, ket igina ya Apu. Ket iya agten iyan, maidaydayaw ngarudin nge̍ Apu Diyus nga Ama.

Ya panangtungpal tida iya rebbeng tida iya panamati tida

¹² Dikad pe̍ idi ya ibagac dakayu nga patpatgec: Ket itun, gangey nu ya pe̍yeng dac nga ipangpangag. Ket gabay ku no bekken kuma ngas nga iya kauwed ku ya agten iyan, no di lugud ad-adda kuma ya panangipangag nu iyaken ita nga kinaawan ku. Itu nga dakayu kuma mettasin ya makaemmu nga sidadayaw se̍ siaannad iya panangannung nu iya banag niya pannakaisalakan nu.

¹³ Agten iyan kuma ngarud, ta uwed tumulung dakayu, nga itu nge̍ Apu Diyus mettas, tasun maemmuwan nu ya tarigagay na, se̍ tasun mawangel nu diya makaay-ayu igina.

¹⁴ Ket kadiya amin nga wanglen nu, awan kuma panagriri winno pannakisupyat nu,

¹⁵ tasun awan kuma pakapilawan winno pakapabasulan nu. Ket no agten iyan, awan dake̍c nga masingen dakayu iya imatang diya nakillu se̍ naalas nga toltoley idi nga lubung. Ngarud, an-anac nakayu nge̍ Apu Diyus, nga maiyarig kayu ka nasilap nga bitbituwen nga mangwada igida nga uwed iya gicbet.

¹⁶ Ta dakayu met diya mangipateg iya panursuru nga pakabiyagan toley. Ket no tutu nga agten iyan ya wangwanglen nu, uwed ngarud pakaragsakac nad iya Timpu ne̍ Kristu, gapu ta bekken nga masayang nad diya panagitured ku se̍ diya banbannug ku gapu dakayu ita.

¹⁷ Ket ya panamati nu, maiyarig ka pagdatun niya panagsirsirbic nga ipaay ku e̍ Apu Diyus. Ket iyaken, mabalin nga maiyarig gac ngas ka pagdatun nga mainum nga maibucbuc mettas kadidi nga ipaay ku e̍ Apu Diyus. Ngem orey arig gac nga maibucbuc ngas a, ta pakaragsakac met, ket makipaganggem mac ngas dakayu nga amin.

¹⁸ Ket agten kayu kuma pe̍ iyan, nga maparagsac kayu kuma, ket makipaganggem kayu kuma pe̍ iyaken gapu idi nin.

To pannakaibon de̍ Timutyu nge̍ E̍papruditu

¹⁹ Ket iya di mabayag, ibon ku kuma dakayu nge̍ Timutyu, no ipalubus ne̍ Apu Je̍sus. Ibon ku tasun maragsakan nac nad gapu kadiya maipadpadamag na iyaken nga maipanggep dakayu.

²⁰ Igina ya ibon ku, ta awan sabali nga kapadac nga agten igina nga napudnu ya panangisakit na iya paglaingan nu.

²¹ Ta diya duduma, awan sabali nga laglagipen da no di ngas ya bukud da nga paglaingan, nga bekken lugud nga diya gabay ne̍ Kristu Je̍sus.

²² Ngem e̍ Timutyu nga gennung, emmu nu mettin ya nabaru nga gangey na. Ta nakipagsirsirbi iyaken maipanggep iya Makaparagsac nga Damag, nga arig nga pudnu kami nga agama ngin.

²³ Itu nga gabay ku nga ibon nga dagus dakayu, angem maemmuwac kuma pekkem ya pagbanagac idi.

²⁴ Ket mangnamnama ngac iya Apu, nga iya di mabayag, makalbe̍t tac mettas pe̍ iyan.

²⁵ Ket kunec pe̍ nga masapul nga ibon ku iyanin nge̍ E̍papruditu nga kabsat ku ka pammati, se̍ kabulun ku iya panagsirbic iya Apu, se̍ padac pe̍ nga arig nga suldadu na. Ket igina mettas to nibon nu nga pannakabeggi nu nga nangistimar iyaken itun.

²⁶ Ket igina mettas ya ibon ku ita. Ta masut kanu dakayu nga amin iyanin, ket madanagan pe̍ nga unay, gapu ta nadamag nu kanu nga nagsakit.

²⁷ Ket pudnu nga nakaru to sakit na itun, ta nistay na nipatey, ngem kinaasiyan ne̍ Apu Diyus. Ket bekken nas nga igina to kinaasiyan ne̍ Apu Diyus, no di pe̍ iyaken, ta no natey, nakarkaru met manin ya leddaang kun.

²⁸ Itu nga gabay ku nga unay nga ibon nge̍ E̍papruditu iyanin, tasun maragsakan kayu no masingen nu manin. Ket iya agten iyan, macsayan nad pe̍ yin ya leddaang ku wi.

²⁹ Dikad pe̍ siaanggem kayu kuma ngarud nga umawat igina, nga ibilang nu kuma nga kabsat nu ka panamati iya Apu. Ta rumbeng met nga ipasingen nu ya panagraem nu kadiya agten iyan nga toley.

³⁰ Ta igina, nistay natey gapu iya panangipusta na iya biyag na iya wangel na nga maipaay e̍ Kristu, ito nangitungpal na ito panangaasi nu iyaken.