Pilipus 1 - Ya Baru nga Tulag

¹ Iyaken nga Pablu se̍ e̍ Timutyu nga agsirsirbi e̍ Kristu Je̍sus, ket dakami ya akin-surat idi. Isurat mi yani dakayu iyan Pilipus. Isurat mi ngarud dakayu nga amin nga toley ne̍ Apu Diyus iyan gapu iya pannakaitipun nu e̍ Kristu Je̍sus, agraman dakayu nga agay-aywan iya bungguy, se̍ dakayu nga katulungan niya bungguy.

² Sapay kuma ta uwed dakayu ya siaayat nga asi, se̍ talna, nga gayat e̍ Apu Diyus nga Ama tida, se̍ e̍ Apu Je̍su Kristu.

To panangikarkararag ne̍ Pablu kadito iPilipus

³ Ket iya tunggal pannakalagip ku dakayu, siiiyaman nac e̍ Apu Diyus nga pagsirbiyac.

⁴ Ket siaanggem mac pe̍ nga pe̍yeng kadiya amin nga panangikarkararag ku para dakayu nga amin.

⁵ Ta laglagipec ya pannakibulun nu iyaken iya panangipakaemmuc iya Makaparagsac nga Damag, nanipud ito damu nga naikasaba dakayu agingga ita.

⁶ Ket siguradu wac nga ilayun ne̍ Apu Diyus ya nabaru nga nirugi nan kadiya nakem nu, agingga ka matungpal nad iya Timpu ne̍ Kristu Je̍sus.

⁷ Ket rumbeng met ya agten iyan nga panangnamnamac maipanggep dakayu nga amin, ta patpatgen nakayu. Rumbeng ngarud gapu ta makikanunung kayu nga amin iya siaayat nga panangtulung ne̍ Apu Diyus iyaken, orey idi nga pannakaibalud ku, se̍ orey iya panangipanecnec se̍ panangikasabac iya kinapudnu niya Makaparagsac nga Damag.

⁸ Ket e̍ Apu Diyus met ya makapanecnec maipanggep iya napalaus nga ayat ku dakayu, ta patpatgen nakayu ka panangipateg nga tumaud e̍ Kristu Je̍sus mettas.

⁹ Ket ikarkararag ku nga pe̍yeng kuma nga bumilbileg pekkem ya panagayat nu, nga maibulun kuma pe̍ ka kustu nga pannakaawat nu iya pudnu se̍ ya awan kurang na nga pannakailasin nu iya kustu.

¹⁰ Ta diyan kuma ngas nabaru nga banbanag diya ipateg nu. Ket iya agten iyan, awan nad kabulun nu nga kinadake̍c se̍ awan pakapabasulan nu nad iya Timpu ne̍ Kristu.

¹¹ Ket iya agten iyan, adu win diya nalinteg nga banbanag nga masingen dakayu gapu iya tulung ne̍ Je̍su Kristu, ket agbanag didi ka pakasingnan iya kinaDiyus se̍ kinadayaw ne̍ Apu Diyus.

Pakaidayawan ne̍ Kristu to pannakaibalud ne̍ Pablu

¹² Ket gabay ku nga maawatan nu kuma, kakabsat, ya nabaru nga pagbanagan didi nga napasamac iyaken maipanggep iya pannakaibalud ku wi. Ta nagbalin met lugud nga gundaway niya pannakaiwaragawag niya Makaparagsac nga Damag.

¹³ Ket iya agten iyan, diya amin nga guwardiya niya ari se̍ diya amin nga duduma pe̍ ennidi, naemmuwan dan nga ya panamatic e̍ Kristu, ket itu met ya nakaibaludac.

¹⁴ Se̍ bekken nas nga iyan, ta gapu idi nga nakaibaludac, napabileg ya kaaduwan kadiya kakabsat tida ka pammati iya namnama da iya Apu. Ket iya agten iyan, natured da itan nga mangikasaba iya kagi ne̍ Apu Diyus, nga awan ansing dan.

¹⁵ Ngem ya kinapudnu na, diya duduma igida nga mangasaba maipanggep e̍ Kristu, ket gapu ngas met iya panangapal da ka dayaw, winno gapu ta gabay da ngas ya makidinniskutir. Ngem diya duduma nga mangikasaba, nabaru ngarud ya panggep da.

¹⁶ Ket igida diya mangikasaba maipanggep e̍ Kristu gapu ngas met iya ayat da, ta malasin da nga naisaad dac met idi tasun uwed pannakaipanecnec niya kinapudnu niya Makaparagsac nga Damag.

¹⁷ Ngem dito duduma nga bekken nga nabaru ya panggep da, mangasaba da ngarud maipanggep e̍ Kristu gapu ta gabay da nga maipangatu ya kaipapennan da. Bekken met nga napudnu ya panggep da nga mangasaba, ta gabay da nga padegdeggan ya panagsagabac idi nga pannakaibalud ku.

¹⁸ Ngem orey ngasin, a! Orey no nasikap winno napudnu ya panggep diya mangasaba, ket aganggem mac ngas met, ta e̍ Kristu mettas ya maikaskasaba ngin.

¹⁹ Ket orey nad pe̍, maragsakan nac met, ta emmuc nga gapu kadiya karkararag nu, se̍ ya itutulung niya Ispiritu ne̍ Je̍su Kristu, ket agbanag ngarud ka pannakaisalakan ku amin didi nga panagrigrigat ku.

²⁰ Ta panggep ku se̍ namnamaec nga unay nga awan nad kuma pakaiyal-alyewwac maipanggep iya panagtungpal ku iya orey nagan na nga pagrebngac, no di tumured dac kuma lugud iya orey nagan na. Agten iyan nac kuma ngarud, tasun gapu iyaken, maidaydayaw kuma nge̍ Kristu ita, agten mettas iya panangipadayaw ku nga pe̍yeng igina, orey iya panagbiyag ku wi, winno iya pannakatey ku nad mettas.

²¹ Ta no iyaken, maipaay e̍ Kristu ya panagbiyag ku. Ket no matey yac kun, nabarbaru met pe̍.

²² Ngem no sibibiyag pekkem ya beggic ki, maituluy ngarudin ya wangel ku nga agbanag ka nabaru. Itu nga no iyaken kuma ya mangpili, ket masikuran nac mettin,

²³ ta madi yac emmu nga tutu ya gabgabay ku kadidi nga duwa, ya matey winno agbiyag gac pekkem. Ta gabay ku nga unay ya pumanaw iya biyag nga idi nin, nga makitipun iya edyan ne̍ Kristu win, ta itu ngarud ya nabarbaru no iyaken.

²⁴ Ngem no gapu dakayu, napatpateg ngarud ya agbiyag gac pekkem idi.

²⁵ Dikad pe̍ gapu ta emmuc nga kasapulan dac pekkem, emmuc pe̍ nga madic pekkem nga matey ita, tasun maibulubulun nac pekkem dakayu. Ket agpaay yac nad dakayu tasun bumileg kayu se̍ aganggem kayu iya panamati nu.

²⁶ Ket iya agten iyan, uwed nad ngarud dackel nga panagdayaw nu e̍ Kristu Je̍sus gapu iyaken, no makapen nac nad manin iya edyan nu.

Pakaidayawan kuma ne̍ Kristu ya panagbiyag tida

²⁷ Ket kangrunaan, itunus nu kuma ya panagbiyag nu iya Makaparagsac nga Damag maipanggep e̍ Kristu. Agten iyan kayu kuma tasun orey no awan nac pekkem iya edyan nu, winno no makadateng ngac nad nga sumacwar dakayun, ket madamag ku kuma nga nabaked ya panagbubulun nu gapu iya is-isa nga panpanunut nu, nga is-isa ya panggep nu iya panagtungpal nu iya rebbeng nu iya pammati tida nga maigapu iya Makaparagsac nga Damag.

²⁸ Se̍ madi kayu kuma pe̍ nga mansing kadiya mangkuntra dakayu. Ta no awan ansing nu igida, ket itu win ya nalawag nga pakaemmuwan dan iya pannakaukum da nad mettas, se̍ itu pe̍ ya pakaemmuwan da iya pannakaisalakan nu nga gennung. Ket e̍ Apu Diyus ngarud ya pagtaudan nidi nga pammanecnec.

²⁹ Agten iyan ngarud, ta no dakayu, naikaasi met dakayu yan nga gundaway nu nga maigapu e̍ Kristu. Ket idi nga gundaway nu, bekken nas nga ya panamati nu igina ya panggep na, no di lugud ya panangitured nu pe̍ ka rigat nga maigapu igina.

³⁰ Itu pe̍ yin ya pannakairaman nu iyaken ka panagrigrigat, nga itu mettas ya kapada nito panagsagabac nga nasingen nu itun. Ket itu pe̍ yin ya panagsagaba nga nadamag nu nga uwed manin iyaken ita.