Pilimun 1 - Ya Baru nga Tulag

¹ Iyaken nge̍ Pablu nga naibaludin maigapu e̍ Kristu Je̍sus. Ket dakami nge̍ Timutyu nga kabsat tida ka pammati, surat mi yani ikew, Pilimun nga patpatgen mi nga kabulun nga agsirsirbi.

² Ket suratan mi pe̍ nge̍ Apiya nga babey nga kabsat tida ka pammati, se̍ e̍ Arkipu nga pada mi nga arig nga pannakasuldadu ne̍ Kristu. Se̍ suratan mi pe̍ ya bungguy diya mamati nga aggigimung iya baley mu, Pilimun.

³ Sapay kuma ta uwed dakayu ya siaayat nga asi, se̍ talna, nga gayat e̍ Apu Diyus nga Ama tida, se̍ e̍ Apu Je̍su Kristu.

To panagyaman se̍ panagdayaw ne̍ Pablu e̍ Pilimun

⁴ Pe̍yeng nga agyaman nac iya Diyus ku maipanggep ikew, Pilimun, ket no agkararag gac, laglagipen naka.

⁵ Ta madamdamag ku ya ayat mu kadiya amin nga toley ne̍ Apu Diyus, se̍ ya panamatim e̍ Apu Je̍sus.

⁶ Ket ikarkararag ku nga gapu iya pannakitipun mu kadiya padam nga uwed pe̍ panamati da, adu kuma ya napaw-is nga pagbanagan niya panamatim, tasun maawatam kuma nga nalaing maipanggep kadiya amin nga paglaingan nga e̍cde̍ ne̍ Kristu dactida gapu iya pannakitipun tida igina.

⁷ Laglagipen naka ngarud, ta naparagsakac se̍ napabileg gac, kabsat, gapu iya pannakaemmuc iya panagayat mu kadiya padam nga mamati, ta mangpabileg ka kanu pe̍ yin kadiya nakem diya toley ne̍ Apu Diyus.

To panangipacpakaasi ne̍ Pablu para e̍ Une̍simu

⁸ Emmum nga uwed iyaken ya turay nga gayat e̍ Kristu, ket mabalin ku nga ibilin ikew ya rumbeng kuma nga wanglem. Ngem gapu iya naipadamag iyaken maipanggep iya panagayat mu,

⁹ madi naka met bilinen, tasun maikanatad kuma pe̍ iya panagayat nga wanglec ikew. Dikad pe̍ iyaken nga Pablu nga lakayin, se̍ naibalud pe̍ itan maigapu e̍ Kristu Je̍sus,

¹⁰ agpacpakaasi yac ngarud ikew win maipanggep e̍ Une̍simu, nga ibilang ku nga anac ku ka pammati yin. Ta bayat niya pannakaibalud ku wi, nagbalin nac nga pannakaama na ka pammati.

¹¹ Itun, awan met sirsirbi na ikew. Ngem itan, agsirbi nga tutu ikew win, agten pe̍ iyaken.

¹² Ket ita, pasoliyec ngarud ikew nge̍ Une̍simu win, nga igina ya pangipaayac mettas iya ayat ku.

¹³ Nabaru, kunec, no pagedyanec kuma pekkem iyaken idi, tasun igina kuma ya sunum nga mangtulung iyaken, bayat niya pannakaibalud ku pekkem gapu iya panangipakaemmuc iya Makaparagsac nga Damag.

¹⁴ Ngem nabarbaru kunec, no di naka kuma piliten nga tumulung. Ta gabay ku was kuma no ikew ya mangipalubus, tasun tumaud kuma ngas iya nadalus nga nakem mu. Itu nga awan mabalin ku, kunec, no di ka annamungan.

¹⁵ Mabalin ngata nga nipalubus ne̍ Apu Diyus yan nga ipapanaw ne̍ Une̍simu ikew ka bekken nga nabayag, tasun no maipasoli manin ikew itan, ket makipagedyan ikew ka agnanayunin.

¹⁶ Ket itan, bekken mu was nga tagabu win, no di lugud napateg nga kabsat mu pe̍ yin ka pammati. Ket napateg nga unayin, nangruna iyaken, ket nangnangruna pekkem ikew. Ta bekken nas nga tagabum ita, no di pe̍ kabsat mu ka pammati iya Apu win.

To panangpatalged ne̍ Pablu iya kari na e̍ Pilimun

¹⁷ Dikad pe̍ no tutu nga ibilang nac nga kabulun mu, awatem kuma ngarud nge̍ Une̍simu win, nga arig mettas nga iyaken ya awatem mun.

¹⁸ Ket no uwed basul na ikew, winno utang na ikew, ket ibilang mu was nga utang kun.

¹⁹ Iyaken mettas ya mismu nga akin-surat idi: Iyaken nga Pablu, ket iyaken mettas ya mangikaru iya utang na. Ket orey awan kuma ibagac kun, malagip mu kid met latta to arig nga nakautang mu iyaken, ta iyaken ya nakaigapuwan niya kauwed niya kabarbaru nga biyag mun.

²⁰ Ngarud, kabsat, paragsaken nac kay idi nga panangtungpal mu kuma gapu iya pannakaitipun mu e̍ Kristu. Ta ipateg mu kuma didi nga kunec ikew, tasun uwed kuma paglaingac kun gapu iya pannakaitipun mu iya Apu.

Paggibusan

²¹ Itu win ya isurat ku ikew, ta namnamaec nga tungpalem yani nga kunec. Ket namnamaec pe̍ nga wanglem ya nasursuruc pekkem ngem idi nga nipacpakaasic ikew.

²² Ket iya agten iyan, adngec pe̍ nga isaganaan nac kay ka kuwartu nga pagedyanac iyan. Ta sinanama ngac nga kaasiyan nac nge̍ Apu Diyus, tasun makapen nac manin iya edyan nu, gapu mettas kadiya karkararag nu para iyaken.

²³ Ket kumusta ka kanu, kunen ne̍ E̍papras nga padac nga balud idi maigapu iya panamati na e̍ Kristu Je̍sus.

²⁴ Pakumustaan daka pe̍ diya kabulun ku iya panagsirsirbic, nga de̍ Markus, Aristarku, De̍mas, se̍ e̍ Lukas.

²⁵ Ket aglak-am kayu kuma ngarud iya siaayat nga asi ne̍ Apu Je̍su Kristu kadiya lemlemmet nu.