Paltiing 9 - Ya Baru nga Tulag

¹ Ket itun, pinauni ngarud nito maikalima nga anghe̍l to tangguyub nan, ket uwed nasingec nga arig nga bituwen manin nga niterkag iya lubungin. Ket to sinan-bituwen, nae̍cdan met ka tulbec niya ruwangan niya nakaun-uneg nga ebbut iya ginet.

² Ket linukatan met nito sinan-bituwen to ruwangan nito nakaun-uneg nga ebbut. Ket uwed rinumwar nga adu nga asuc, nga arig nga asuc nga agpangudu nga gayat iya simburyu niya dackel nga pagapuyan. Ket naasukan met ya amin nga abac lawa ngin, ket nalingdan pe̍ yin ya sinag.

³ Ket itun, uwed da met sisibew nga nagtaud ito asuc, ket nagdessag da iya ginet tin. Nae̍cdan dito sisibew ka kabaellan da nga mangpasakit, nga agten iya kabaellan diya gagamat nga uwed iya ginet.

⁴ Naibilin met igida nga madi da kanu mangpirdi kadiya rucruut winno diya kaykayu iya ginet, winno ya orey nagan na nga mula. Diyan nas kanu toley nga awan marka ne̍ Apu Diyus iya muging da ya pasakitan da.

⁵ Madi napalubusan dito sisibew nga pumatey kadito toltoley, no di da ngas kanu napalubusan nga mangparigat kadito toltoley ka unus lima nga bulan. Ket nasakit ngarud to kagat da, nga agten iya ut-ut nga mapuut niya toley no siluden niya gagamat.

⁶ Ket iya unus niya lima nga bulan nga iyan, me̍lug diya toley nga matey, ngem madi da met matey. Ngarud, gabay da nad met ya matey kuma ngin, ngem arig met nga italawan niya patey dan.

⁷ Ket ya langa dito sisibew nga nangpaspasakit kadiya toley, arig met nga kabayu nga nakasagana nga makigubatin. Ket uwed arig nga kuruna nga balituc nga naisimpa kadiya ulu da. Ket ya rupa da, agten met iya rupa niya toley.

⁸ Ket uwed met ebbuc da nga agten iya ebbuc niya babey nga toley. Ket diya ngipen da, agten met iya ngipen liyun.

⁹ Ket iya barukung da, uwed kabal da nga arig nga kabal nga landuc. Ket ito nagkakayab da, naungug met ya uni dito paypayac da, nga arig nga uni niya adu nga kale̍sa, no itagtagin diya kabayu nga usaren diya mawe̍ mangraut iya paggugubatan.

¹⁰ Ket uwed met ipus se̍ silud dito sisibew nga agten iya gagamat, ket itu ya pangpasakit da ka toley ka unus lima nga bulan.

¹¹ Ket uwed met ari da nga mangituray igida, nga itu ya dake̍c nga anghe̍l nga mangituray ito nakaun-uneg nga ebbut iya ginet. Ket ya nagan nito anghe̍l, Abaddun no kagi He̍briyu, ket Apulyun met ya nagan na ka kagi Griye̍gu, nga kayat na nga kagiyen, “Mangpukaw.”

¹² Ket itu yan to nona nga panagrigat diya toltoley. Ket ala! Uwed pekkem duwa nga sumarunu!

¹³ Ket itun, pinauni mettin nito maikanem nga anghe̍l to tangguyub na, ket uwed nagicnac nga timec nga gayat ito pagdatunan nga balituc ito sangu ne̍ Apu Diyus. Ket timaud met to timec kadito eppat nga sacgud nga naisaad ito kada suli nito pagdatunan.

¹⁴ Ket nagkagi met to timec ito maikanem nga anghe̍l nga uwed tangguyub na, nga kinunen na, “Ibukay mun dito eppat nga anghe̍le̍s nga nairaked enna dackel nga wangag nga E̍yuprate̍s,” kunen na.

¹⁵ Ket iya agten iyan, naukasan ngarudin dito eppat nga anghe̍le̍s, ta agingga itun, nag-agton da nga sisasagana iya pakaibonan da iyan mettas nga uras, algew, bulan se̍ dagun. Ta nadatngan itunin ya panangpukaw da iya pagkatlu diya amin nga toltoley iya lubung.

¹⁶ Ket uwed pe̍ bungguy nga nakakabayu, nga kabulun dito anghe̍le̍s. Ket nagicnac met to bilang da, ket duwa nga gasut nga milyun met gayam ya bilang da.

¹⁷ Ket agten idi to naipasingen iyaken maipanggep kadito kabayu se̍ dito nagsakey: Dito nagsakey, nalingdan met diya barukung da ka kabal nga nadgang, nga agten iya kulur niya apuy, se̍ nangisit nga agten iya kulur niya batu nga sapiru, se̍ nangila nga agten iya kulur niya burbura nga asupre̍. Ket diya ulu dito kabayu, arig met nga ulu niya liyun, ket agipugpugsu da ka apuy, asuc se̍ asupre̍.

¹⁸ Ket dito apuy se̍ asuc se̍ burbura nga asupre̍ nga rinumwar kadito musung dito kabayu, pakaiyarigan da ya tellu nga mangpukaw ka toley. Ket gapu kadidi nga tellu nga mangpukaw, natey met ya pagkatlu niya bilang diya amin nga toley iya lubung.

¹⁹ Ta uwed pannakabalin dito kabayu ito musung da, se̍ iya ipus da pe̍, ta arig nga malaga dito ipus da, nga uwed ulu da. Ket didi pe̍ to inusar da nga nangpasakit kadiya toltoley.

²⁰ Ket diya duduma nga toley nga nakalasat kadidi nga panagrigat nga pakatayan, madi da met latta nagbabawi kadito dake̍c nga winangwangel da. Madi da nipac to panagtungpal da kadiya sacsairu se̍ kadito didiyusen da nga bultu, nga agten kadito naariman ka balituc, pirac, burinsi, batu winno kayu. Ket didi latta dito dinaydayaw da, orey madi makasingen se̍ makagicna winno makadalan didi.

²¹ Ket dito toley nga nakalasat, madi da met pe̍ binabawi to panagpatpatey da ka toley, winno to pananggamgamut da, winno to pannakikamkamalala da se̍ to panagtactakew da.