Paltiing 7 - Ya Baru nga Tulag

Dito 144,000 nga iIsrae̍l

¹ Kalpasan niyan, uwed nasingec nga eppat nga anghe̍le̍s, nga agsisikad iya le̍cbut niya lubung. Ket tengtenglen da met ya belluut nga agtaud iya eppat nga edyan da, tasun madi mabluut ya sap-ew niya ginet, winno baybay, winno ya orey nagan na nga kayu.

² Ket uwed met nasingec itun nga isa nga sabali nga anghe̍l. Nagparang yani nga gayat ka daya, ket uwed igina ya pagmarka niya sibibiyag nga Diyus. Ket nagkagi ka nabileg nga binilin na dito eppat nga anghe̍le̍s nga nakaitalkan niya turay nga mangpirdi kadiya uwed iya sap-ew niya ginet se̍ iya baybay gapu ka belluut.

³ Ket kinunen na ngarud kadito eppat nga anghe̍le̍s, “Madi kayu pekkem pirdiyen ya ginet, winno ya baybay, winno diya kaykayu, agingga ka di kami mamarkaan diya muging diya agsirsirbi iya Diyus tida,” kunen na.

⁴ Ket nadamag ku itun ya bilang dito namarkaan, ket sangagasut eppat nga pulu ket eppat nga ribu kanu ya bilang da. Ket nagtaud dito namarkaan kadiya amin nga kapututan dito an-anac nito Israe̍l.

⁵ Uwed sangapulu ket duwa nga ribu nga nagtaud kadiya kapututan nito Huda, ket uwed sangapulu ket duwa nga ribu nga nagtaud kadiya kapututan nito Rube̍n, ket uwed sangapulu ket duwa nga ribu nga nagtaud kadiya kapututan nito Gad,

⁶ ket uwed sangapulu ket duwa nga ribu nga nagtaud kadiya kapututan nito Ase̍r, ket uwed sangapulu ket duwa nga ribu nga nagtaud kadiya kapututan nito Ne̍ptali, ket uwed sangapulu ket duwa nga ribu nga nagtaud kadiya kapututan nito Manase̍s,

⁷ ket uwed sangapulu ket duwa nga ribu nga nagtaud kadiya kapututan nito Simyun, ket uwed sangapulu ket duwa nga ribu nga nagtaud kadiya kapututan nito Le̍bi, ket uwed sangapulu ket duwa nga ribu nga nagtaud kadiya kapututan nito Isakar,

⁸ ket uwed sangapulu ket duwa nga ribu nga nagtaud kadiya kapututan nito Sabulun, ket uwed sangapulu ket duwa nga ribu nga nagtaud kadiya kapututan nito Huse̍, se̍ uwed pe̍ sangapulu ket duwa nga ribu nga nagtaud kadiya kapututan nito Be̍nhamin.

To bungguy diya adu nga nakakawwes ka puraw

⁹ Ket kalpasan niyan, pinumsekkac manin, ket uwed nasingec nga nakad-adu nga toley nga naurnung. Ket gapu ta adu da nga unay, awan met toley nga makabael nga mangbilang igida. Naggayat dito toltoley kadiya amin nga nasyun, kapututan, pagiliyan se̍ pagkakagi. Ket agsisikad da iya sangu nito trunu se̍ to Urbun Karne̍ru. Nakakawwes da ka puraw nga sutana, se̍ agik-ikem da ka bain.

¹⁰ Ket dito toltoley, pinumkaw da nga kinunen da ka nabileg, “Ya pannakaisalakan tida, ket gayat iya Diyus tida nga agtugtugew iya trunu, se̍ gayat iya Urbun Karne̍ru!” kunen da.

¹¹ Ket itun, diya amin nga anghe̍le̍s, nagsisikad da iya le̍cbut nito trunu, se̍ iya le̍cbut pe̍ dito panglakayen, se̍ dito eppat nga sibibiyag nga parsuwa. Ket naglakeb da mettin iya sangu nito trunu, nga nagdaydayaw da e̍ Apu Diyus.

¹² Ket kinunen da, “Sapay kuma ta maipaay iya Diyus tida ya amin nga panangipateg, kinaari, sirib, panagyaman, panagdayaw, turay se̍ pannakabalin, ket agten iyan kuma ngarudin ka agnanayun nga awan patingga na! Agten iyan kuma ngarud!” kunen da.

¹³ Ket itun, kinatbar nac ya isa kadito panglakayen, nga kinunen na iyaken, “Nagan diya toley nga didi nga nakakawwes ka puraw nga sutana, se̍ awac ya naggayatan da?” kunen na.

¹⁴ Ket kinunec igina, “Madic emmu, apu. Ikew met ya makaemmu iyan,” kunec. Ket kinunen na iyaken, “Didi nga toltoley, igida diya naglak-am ito nakaru nga panagrigat. Ket linabaan da met diya sutana da iya daga mettas niya Urbun Karne̍ru, ket itu nga nakapurpuraw diya sutana dan.

¹⁵ Ket iyan ya gapu na nga uwed da iya sangu niya trunu ne̍ Apu Diyus, ket algew-gabi, agsirsirbi da igina iya te̍mplu na. Ket ya agtugtugew iya trunu, salacniban na da gapu mettas iya kauwed na.

¹⁶ Madi da pulus nga agbisin winno mewwew win. Madi da mapudutan iya sinagin, winno iya orey nagan na nga makapapudutin.

¹⁷ Ta ya Urbun Karne̍ru nga uwed iya sangu niya trunu, igina met ya agay-aywan igidan, ket iturung na da ka arig nga ubbug nga mange̍cde̍ ka biyag. Ket liwliwaen ne̍ Apu Diyus da, tasun awan pulus agberberrit igidan,” kunen na.