Paltiing 6 - Ya Baru nga Tulag

To pannakaipac dito naikapet

¹ Ket itun, nasingec to panangipac nito Urbun Karne̍ru ito mona kadito pitu nga naikapet ito nalukut nga pagbasaan. Ket nagicnac ya isa nga uni nga arig nga eddug, nga itu ya panagkagi niya isa kadito eppat nga sibibiyag nga parsuwa, nga kinunen na, “Umbe̍t kan!” kunen na.

² Ket pinumsekkac, ket nasingec met ya isa nga puraw nga kabayu. Ket ya nakasakey igina, nakaikem met ka pana. Ket nae̍cdan ka balangat, ket nawe̍ mangabac kin nga sibaballaigi.

³ Ket ito nipac nito Urbun Karne̍ru to maikadduwa nga naikapet, nagicnac ya kunen nito maikadduwa nga sibibiyag nga parsuwa, nga kinunen na, “Umbe̍t kan!” kunen na.

⁴ Ket uwed rinumwar manin nga sabali nga kabayu, ket nadgang met ya kulur na. Ket ya nakasakey ito kabayu, nae̍cdan ka turay nga mangpagubat kadiya toltoley iya lubung, tasun agpipinnatey da. Ket igina, nae̍cdan met ka isa nga dackel nga ispada.

⁵ Ket itun, nipac manin nito Urbun Karne̍ru to maikatlu nga naikapet, ket nagicnac manin ya kunen nito maikatlu nga sibibiyag nga parsuwa, nga kinunen na, “Umbe̍t kan!” kunen na. Ket pinumsekkac, ket uwed nasingec nga nangisit nga kabayu win. Ket ya nakasakey igina, nakaikem ka isa nga pagtimbengngan.

⁶ Ket uwed nagicnac kun nga arig nga timec nga gayat iya edyan dito eppat nga sibibiyag nga parsuwa, nga kunen na, “Ya pateg niya isa nga tabu nga trigu, ket itu ya tangdan iya isa nga algew win. Ket no beggas se̍bada, isa nga salup ngas ya maalac iya isa nga algew. Ket no ya lana ulibu se̍ ya basi ubas, madi mu da kessayan!” kunen na.

⁷ Ket ito nipac nito Urbun Karne̍ru to maikapat nga naikapet, nagicnac ya kunen nito maikapat nga sibibiyag nga parsuwa, nga kinunen na, “Umbe̍t kan!” kunen na.

⁸ Ket ito pinumsekkac, uwed met nasingec nga kabayu nga ngumilangila ya kulur na. Ket Patey ya nagan nito nakasakey ito kabayu. Ket uwed pe̍ nip-ipuyut igina nga agnagan ka Hade̍s. Ket nae̍cdan da ka turay nga mangpatey iya pagkapat niya toltoley iya lubung gapu ka gubat, bisin, sakit nga makapatey, se̍ gapu kadiya nauyung nga an-animal nga uwed iya lubung.

⁹ Ket itun, nipac nito Urbun Karne̍ru to maikalima nga naikapet ito nalukut nga pagbasaan, ket uwed met nasingec iya sidung niya pagdatunan antuni, nga itu diya kararuwa diya napatey gapu iya panangipateg da iya kagi ne̍ Apu Diyus, se̍ gapu iya panangipakaemmu da iya pudnu nga patpatiyen da.

¹⁰ Ket kinagi met dito kararuwa nga kinunen da ka nabileg, “Apu nga Mannakabalin, ikew ya awan basul na, se̍ napudnu! Nungey yin aya ya panangukum mu kadiya toltoley iya lubung, tasun maibales kuma ngin to pannakatey mi?” kunen da.

¹¹ Ket itun, ya tumunggal isa igida, nae̍cdan da ka puraw nga sutana. Ket naibaga igida nga agton da kanu pekkem mas ka e̍teng, nga sitatalna da kuma, agingga ka madatngan to naikeddeng nga bilang diya pada da nga agsirsirbi nga kakabsat nga mapatey nga agten mettas ito pannakapatey da itun.

¹² Ket itun, nasingec nga nipac manin nito Urbun Karne̍ru to maikanem nga naikapet ito nalukut nga pagbasaan. Ket nangyegyeg met itun ka nabileg gin. Ket ngimisit met pe̍ yin ya sinag, nga arig nga kangisit niya panes nga naariman ka nangisit nga dutdut. Ket ya bulan nga nadakar itun, dinumgang met nga aminin, nga agten iya kadgang niya daga.

¹³ Ket diya bitbituwen, naiterterkag da iya ginet itun nga gayat iya abac lawa, nga arig met nga agterterkag diya naata pekkem nga bisic niya kayu nga igus no mabluut ka nabileg ya kayu win.

¹⁴ Ket ya abac lawa, nagpukaw met gayamin, nga arig nga pannakalukut niya isa nga nalukut nga pagbasaan. Ket diya amin nga tagtageytey se̍ purpuru iya lubung, naiyalis da mettin manipud iya sigud nga edyan da.

¹⁵ Ket itun, nagsorsoroc mettin diya ar-ari nga agturturay nga uwed iya lubung, se̍ diya duduma pe̍ nga uwed saad da iya gubiye̍rnu, se̍ diya pangpangulu diya suldadu, se̍ diya babacnang se̍ diya duduma pe̍ nga mabigbig nga toley. Ngarud, diya amin nga toley, orey diya tagtagabu winno diya siwayawaya nga toley, ket nagsorsoroc da ngarud kadiya liyaliyang se̍ kadiya dadackel nga batu kadiya tagtageytey.

¹⁶ Ket pinumpumkaw da, nga kunen da maipanggep kadiya batbatu se̍ kadiya tagtageytey, “Ay, miterkag kuma ngin dakami, ta lingdan dakami kuma ngarudin iya pannakasingen niya agtugtugew iya trunu se̍ iya unget niya Urbun Karne̍ru!

¹⁷ Ta nadatngan ngarudin ya agdindinamag nga timpu niya panangukum da, ket awan met makalasat iyanin!” kunen da.