Paltiing 5 - Ya Baru nga Tulag

Maipanggep iya nalukut nga pagbasaan se̍ ya Urbun Karne̍ru

¹ Ket iya diwanan nga ima nito nakatugew ito trunu, nasingec ya isa nga nalukut nga pagbasaan. Nasuratan met ya agsumbangir na, se̍ napigkettan pe̍ ka pitu nga naikapet.

² Ket nasingec pe̍ ya isa nga naturay nga anghe̍l nga nagkagi ka nabileg, nga kinunen na, “Nagan ngata ya maikari nga mangipac kadiya naikapet, se̍ mangucrad idi nga nalukut nga pagbasaan?” kunen na.

³ Ngem orey ka langit man, winno iya lubung, winno iya uneg niya ginet, awan pulus maikari nga manglukat se̍ mangsingen iya linaun nito nalukut nga pagbasaan.

⁴ Itu nga nakabrit tac nga silaladingit, gapu ta awan maikari nga manglukat winno mangsingen iya linaun nito nalukut nga pagbasaan.

⁵ Ket itun, kinunen nito isa kadito panglakayen iyaken, “Madi ka agberritin a, ta singem, nangabac mettin ya Liyun, nga igina ya kapututan nito Huda, se̍ pungut diya kapututan nito Ari Dabid. Iginan ya makaipac kadiya pitu nga naikapet, se̍ mangucrad iya nalukut nga pagbasaan,” kunen na.

⁶ Ket itun, uwed pe̍ nasingec nga Urbun Karne̍ru, ket arig nga isa nga napatey ya beggi na. Nakasikad met iya sangu nito trunu nga line̍cbut dito eppat nga sibibiyag nga parsuwa se̍ dito panglakayen. Ket to Urbun Karne̍ru, uwed pitu nga sacgud na, se̍ pitu nga mata na, nga itu diya pitu nga ispiritu nito agkapitu nga Ispiritu ne̍ Apu Diyus nga naibon iya amin nga lubung.

⁷ Ket to Urbun Karne̍ru, nawe̍ na nimet to nalukut nga pagbasaan nga uwed ito diwanan nga ima nito nakatugew ito trunu.

⁸ Ket ito inalac nito Urbun Karne̍ru to nalukut nga pagbasaanin, naglakeb dito eppat nga sibibiyag nga parsuwa se̍ dito duwa nga pulu ket eppat nga panglakayen iya sangu na, nga dinaydayaw dan. Ket ya tunggal isa igida, nakaikem da ka arpa nga makuwe̍rdasan nga pagtukar, se̍ balituc nga malukung nga napnu ka nabangug nga mapooran, nga itu ya kaiyarigan diya karkararag diya toley ne̍ Apu Diyus.

⁹ Ket dito naglakeb, kinanta da ya isa nga kabarbaru nga kanta. Agten idi to nikanta da: “Ikew ya maikari nga mamet iya nalukut nga pagbasaan se̍ mangipac kadito naikapet. Ta ikew ya napatey itun, ket gapu iya pannakaidaga niya beggim mettas, uwed da toley nga sinubbut mu nga nipaay mu e̍ Apu Diyus, nga gayat iya tunggal kapututan, pagkakagi, pagiliyan se̍ nasyun.

¹⁰ Ket pinagbalin mu da nga isa nga naturay nga bungguy, se̍ agsirsirbi nga agpaay iya Diyus tida; ket agturay da nad iya lubung,” kunen da.

¹¹ Ket itun, simingen nac manin, ket uwed nagicnac nga timtimec diya adu nga unay nga anghe̍le̍s, nga rinibribu winno minilmilyun ya bilang da. Ket line̍cbut da to trunu, se̍ dito sibibiyag nga parsuwa, se̍ dito panglakayen.

¹² Ket nagkagkagi da ka nabileg nga kinunen da, “Ya Urbun Karne̍ru nga napatey itun, igina met ya maikari nga pagipaayan ka amin nga turay, kinabacnang, sirib, pannakabalin, dayaw, kinaari, se̍ pateg!” kunen da.

¹³ Ket itun, nagicnac diya kinagkagi diya amin nga naparsuwa nga uwed ka langit, se̍ diya uwed iya lubung, se̍ diya uwed iya uneg niya ginet, se̍ diya uwed ka baybay. Ngarud, nagicnac diya kinagkagi diya amin-amin nga naparsuwa, nga kinunen da, “Pagipaayan ngarud ya nakatugew iya trunu se̍ ya Urbun Karne̍ru ka amin nga pateg, dayaw, kinaari, se̍ pannakabalin ka agnanayun nga awan patingga na!” kunen da.

¹⁴ Ket kinunen dito eppat nga sibibiyag nga parsuwa, “Agten iyan kuma ngarudin!” kunen da. Ket dito panglakayen, naglakeb da nga agdaydayawin.