Paltiing 4 - Ya Baru nga Tulag

Maipanggep iya panagdaydayaw ka langit

¹ Kalpasan niyan, uwed manin sabali nga nasingec, ta uwed arig nga silulukat nga gagayangan ka langit. Ket nagicnac manin to timec nga nagicnac itun, nga arig nga uni tangguyub. Ket kinunen na, “Umbe̍t ka idi ngudu, ket ipasingec ikew ya masapul nga mapasamac iya maadpangan nga kalpasan didi,” kunen na.

² Ket sigida nga naidalan nac gapu iya Ispiritu ne̍ Apu Diyus. Ket ya nasingec, ket isa nga trunu nga naisaad ka langit, ket uwed nakatugew iyanin.

³ Ket nasileng met ya langa nito nakatugew iyan, nga arig nga sileng niya napaw-is nga batu, nga arig nga haspe̍ nga nasilap, se̍ iya karne̍lya nga nadgang. Ket iya le̍cbut nito trunu, uwed arig nga bunglun nga nakulur ka be̍rde̍, nga arig nga napaw-is nga batu nga e̍sme̍ralda.

⁴ Ket iya le̍cbut nito trunu manin, uwed pe̍ duwa nga pulu ket eppat nga sabali nga trunu. Ket uwed duwa nga pulu ket eppat nga panglakayen nga nakatugew kadito trunu. Nakakawwes da ka puraw, ket diya ulu da, nakabalangat ka balituc.

⁵ Ket uwed met kilkilawet nga tumactaud ito nagtengnga nga trunu, se̍ uwed pe̍ un-uni se̍ panaged-eddug ka nabileg. Ket iya sangu nito trunu, uwed met pitu nga dilag nga nasibtan, nga itu diya pitu nga ispiritu niya agkapitu nga Ispiritu ne̍ Apu Diyus.

⁶ Ket iya sangu nito trunu, uwed arig nga baybay nga sinan-sarming ya sap-ew na, ket arig met nga kristal nga masarang. Ket iya le̍cbut nito nagtengnga nga trunu, uwed eppat nga sibibiyag nga parsuwa, nga nasanap met diya beggi da ka adu nga mata, iya sangu se̍ iya likud da.

⁷ Ket arig nga liyun to mona nga sibibiyag nga parsuwa; ket to maikadduwa, arig nga urbun baka. Ket to maikatlu, karuprupa toley. Ket to maikapat, arig met nga agkaykayab nga bugkew.

⁸ Ket ennem ya payac niya tunggal isa kadito sibibiyag nga parsuwa, ket nasanap pe̍ ka adu nga mata orey diya linung se̍ sap-ew niya payac da. Ket algew-gabi nga madi da sumardeng nga mangikankanta iya agten idi: “Nalinteg, nalinteg, nalinteg nge̍ Apu Diyus, nga Apu nga Mannakabalin ka amin. Igina ya uwed itun, uwed ita, se̍ ya umbe̍t nad pekkem,” kunen da.

⁹ Ket dito eppat nga sibibiyag nga parsuwa, ikankanta da ngarud ya panagdayaw se̍ panagyaman da, se̍ ya nakaskasdaaw nga kinaturay nito nakatugew ito trunu, nga igina ya agbibiyag ka agnanayun nga awan patingga na.

¹⁰ Ket tunggal agkanta da, aglakeb met dito duwa nga pulu ket eppat nga panglakayen iya sangu nito trunu, nga agdayaw da iya nakatugew iyan, nga igina ya agbibiyag ka agnanayun nga awan patingga na. Ket ipay da diya balangat da iya sangu nito trunu, nga panangipasingen da iya panagdayaw da iya nakatugew iyan. Ket kunen da,

¹¹ “Ikew nga Apu se̍ Diyus mi, maikari ka nga tutu iya kinaari, dayaw, se̍ turay mu. Ta ikew ya namarsuwa iya amin nga banbanag, ket napauwed da gapu mettas iya tarigagay mu. Ket iya agten iyan, naparsuwa da ngarudin.”